1 “Penenglitan duen egketebekaayan te zezuwa he etew ne haazà he kasu mid-uwit dan diyà te kurti, ne midhukum is menge datù ke hentei kandan is nekesalà wey ke hentei is wazà mekesalà. 2 Ne emun iyan hukum te zatù he ebpenlegkuten haazà is nekesalà, ne ibpelangkeb sikandin diyà te etuvangan duen te zatù ne ebpenlegkuten sikandin te sungkad is kahabet din te salà he nehimu zin. 3 Piru kenà ebpesubrahan te 40 he lagkut su emun edsubra te 40 ne egkepeel-elezan sikandin.

4 “Kenè niw busali is baka he ibpeǥunas niw.

5 “Is telesuled he maama he ed-ubpà diyà te sevaha zà he tanà, emun minatey is sevaha kandan he wazè din anak, is esawa zin kenà ereg he ebpeesawa te zuma he kenà sakup te pemilya te esawa zin. Is suled te esawa zin ne iyan ereg he ed-esawa kandin. Ne ketengdanan heini te ipag din diyà te kandin. 6 Ne is kinekekayan he anak dan ne ed-isipen he anak duen te minatey he suled dutun te maama su para kenà maawà is ngazan din diyà te Israel.

7 “Iyan, emun kenà egkesuatan te ed-esawa te suled duen te minatey haazà is balu, ne medhendiyà haazà is balu te ebpemendumala he ziyà te pultahan te inged ne megkaǥi te, ‘Kenà egkesuat is ipag ku he ebeǥey te kevuwazan he ebpekeuwit te ngazan te minatey he esawa ku kayi te Israel. Kenè din edtumanen is ketengdanan din kayi te kediey te ipag din.’ 8 Ne zutun ibpetawag sikandin te ebpemendumala te inged ne ebpekidlalag sikandan kandin. Ne emun kenè din ed-esewaan haazà is balu, 9 ne med-uvey haazà is balu ziyà te etuvangan te ebpemendumala ne pul-uta zin is sandalyas duen te ipag din wey ilevi zin diyà te vuked duma is kegkaǥi te, ‘Iyan heini ebeelan diyà te etew he kenà egkesuat he ebeǥey te kevuwazan diyà te suled din he minatey.’ 10 Ne is pemilya kayi he etew ne iyan igngazan duen diyà te Israel is pemilya he mibpul-utan te sandalyas.

11 “Emun duen dezuwa he maama he ebpetebekà ne ed-uvey is esawa te sevaha su edtevangan din is esawa zin pinaaǥi te keburegnusa zin te sineruwan te kuntra te esawa zin, 12 ne kinahanglan he edtempezen is belad dutun te vahi ne kenà egkehizuwan.

13-14 “Kenè kew medlimbung emun edtimbang kew etawa edsukud kew. 15 Gamit kew te hustu he timbangan wey hustu he sukud, su para mekembuwayan kew zuen te tanà he ibeǥey keniyu te Nengazen he Megbevayè niw. 16 Su mezaat is ked-isipa te Nengazen he Megbevayè niw te etew he ebpenlimbung.

17 “Tentenuzi niw ke hengkey is mid-ulaula te menge Amalikanhen diyà te keniyu hein migawas kew puun te Ehipto. 18 Midlusuzan kew zan dutun te utew kew en nengeveley, ne mibpenhimetayan dan is menge zuma niw he ziyà te huziyanan. Wazè dan kegkahandek te Megbevayà. 19 Umbe, dèdeeti niw is menge Amalikanhen emun ibpehimeley kew en te Nengazen he Megbevayè niw su egkezaag niw en is langun he menge kuntada niw zuen te tanà he ibeǥey zin keniyu su wey niw maangken. Ne kenè niw heini lipati.