32
1 He langit, pemineg ka su egkaǥi a!
He tanà, pemineǥa nu is menge lalag ku.
2 Is menge penurù ku egkeulug he iring te uzan etawa zehemug.
Is menge lalag ku iring te mereǥes he uzan diyà te menge sagbet ne iring te virisbiris diyà te menge pinemula.
3 Ibpahayag ku is ngazan te Nengazen!
Edeliǥen ku is kegkemekeǥeǥehem te Megbevayè tew!
4 Iyan sikandin batu he endilungè ku;
utew hustu is menge vaal zin, wey metazeng is langun he menge paaǥi zin.
Metinumanen sikandin he Megbevayà ne kenà sikandin egkesayep; metazeng sikandin ne hustu is menge vaal zin.
5 Piru sikiyu mibaal kew te salà diyà te kandin ne wazè kew zin en isipa he menge anak din tenged te kezaat niw.
Menge kevuwazan he mekesesalà wey edsuwey te hustu!
6 Iyan en be heeyan ibales niw te keupiya te Nengazen?
Menge tulebung kew en iyan wey kurang te kedsavut.
Kenè be iyan sikandin Amey niw he midlimbag keniyu?
7 Tentenuzi niw is midlavey he menge tuig; isipa niw is nengehuna he lapis te kevuwazan.
Ne iinsè niw ziyà te menge kepuun niw ke hengkey is neulaula ne edtudtulan kew zan.
Insai niw zaan is menge edumala keniyu ne igkelentey zan heini ziyà te keniyu.
8 Su hein mibeǥayan te Levew he Megbevayà is menge nasyun te tanè dan wey hein mibahinbahin din en is menge etew zutun,
ne zuen dulunà te uman grupu kandan he insavuk din sumalà is kezakel te menge velinsuǥuen din.
9 Su mibpilì te Nengazen is menge kevuwazan ni Jacob he iyan mid-isip din he menge etew zin.
10 Neehè din sikandan diyà te disirtu he iyan kes lugar he wazè duen utew ebpeketuvù he pinemula.
Mid-elimahan din sikandan wey mibpelembungan iring te kebpelembungi te etew te mata zin.
11 Mibentayan din sikandan dutun iring te ked-elima te kulaǥu te menge pispis din, dutun te ed-eǥaken din sikandan te kedlayang.
Ebekaren din is menge pakpak din te kedtamuk wey ked-uwit kandan.
12 Nengazen dà is migiya te menge etew zin ne wazè en kinahanglan is tavang te zuma he menge tarù he ed-ezapen.
13 Impevayàbayà din sikandan te menge vuvungan wey impekaan din te menge abut te tanà.
Mid-uyag din sikandan te teneb he ebpuun te kelendiǥan wey lana te ulibu he nenuvù diyà te betuwen he tanà.
14 Mibeǥayan din sikandan te menge kisu wey ǥatas he ebpuun diyà te menge vaka wey kerehidu,
wey mibeǥayan te melambù he menge kerehidu, wey kambing he ebpuun diyà te Bashan.
Mibeǥayan din daan sikandan te memeupiya he menge trigu wey impeinum te kinemeupiyahan he vinu he ebpuun te paras.
15 Mid-uswag is menge Israilihanen piru nekidsukulè dan gihapun.
Mibmelembù dan wey midekelà, iyan mid-iniyuǥan dan is Megbevayà he iyan midlimbag kandan,
wey mid-engkezan dan is endilungè dan he vatu he iyan daan menluluwas dan.
16 Impepengelikud dan wey midretem dan is pauk te Nengazen pinaaǥi te ked-azap dan te zuma he menge ed-ezapen.
17 Mibpemuhat dan is menge mezaat he mulin-ulin he kenà tutuu he megbevayà; menge ed-ezapen he wazè dan keenu mekilala he veǥu zà utew ne wazà mulà tehuza te menge kepuun dan.
18 Midlipatan dan is Megbevayà he iring te vatu he iyan melig-en he egkeendilungan dan he iyan midlimbag kandan.
19 Ne naahà heini te Nengazen, ne tenged te utew zin kegkepauk mid-engkezan din sikandan te ed-isip he anak.
20 Ke sikandin te, “Ed-iniyuǥan ku sikandan su ed-ahaan ta ke hengkey is egkepeveyaan dan,
su mezaat sikandan he lapis te kevuwazan, menge anak he kenà metinumanen.
21 Impepengelikud e zan pinaaǥi te ked-azap dan te kenà tutuu he megbevayà,
ne midhimu zan he mepauk a pinaaǥi te ked-azap dan te wazè din pulus he menge ed-ezapen.
Kela su nasì ku edhimuwa he mesina zan te zuma he etew.
Edhimuwen ku he mepauk dan pinaaǥi te kedtuvazi ku te menge etew he tulebung.
22 Su edriyubriyub is kepauk ku iring te hapuy.
Ebpekevinsul heini te tanà wey te langun he abut kayi,
wey te zizalem te tanà wey pundasyun te menge vuntud.
23 Ibpaaǥi ku sikandan te vangkit, su is pauk ku kandan ne idsuǥat ku kandan iring te menge vesut te panà.
24 Ebpeeǥiyan ku sikandan te vitil; ebpematey sikandan te vitil wey zaru.
Edsuǥuen ku ziyà te kandan is mekahandekhandek he menge langgam he edezaat kandan wey ibpekaǥat ku sikandan te edhereg he uled.
25 Egkehitavù is kebpemematey te tebek diyà te ǥawas te valey zan, ne zutun utew egkeherati is diyà te seled.
Ebpemematey is menge meǥurang, menge vetan-en, wey menge vatà.
26 Migkaǥi a te ibpedsusuwey ku sikandan taman te kenè en sikandan egketenuzan kayi te kelibutan.
27 Ne minsan pa zutun, ne kenè ku idtuǥut he mekepezalig is menge kuntada he edhenduen te, ‘Nezaag tew sikandan te kenitew he ketau ne kenà iyan is Nengazen midhimu kayi.’ ”
28 Is Israel sevaha he nasyun he wazè din ketau wey kedsavut.
29 Ke metau zan pa pezem ne egkesavut dan ke hengkey is egketemanan dan diyà te menge egkehuziyan he timpu.
30 Ebmenmenuwen man te kedal-as te sevaha he etew is nengkelibu he menge Israilihanen?
Ebmenmenuwen te zezuwa he etew he melupig dan is sepulù he libu ziyà te kandan?
Eghimu zan dà haazà emun idtuǥut kandan te Nengazen he iyan endilungè dan he iring te vatu.
31 Su is batu he iyan endilungà te menge kuntada tew ne kenà iring te kenitew he endilungà he vatu ne minsan sikandan nesayud kayi.
32 Ne is menge kuntada tew, he iring kezaat te menge meǥinged dengan diyà te Sodom wey Gomora, iring sikandan te mepait he paras wey ebpekehilu zaan is beǥas din.
33 Wey iring dan daan te hereg te uled he mibeelan he vinu.
34 Nesayud is Nengazen ke hengkey is ebeelan dan,
ne ibpelavey zin en dè pa haazà su idtaǥad din ke egkeuma is midtendek din he timpu te kedsilut kandan.
35 Ke sikandin te, “Iyan e en ebales wey edsilut kandan,
su egkeuma zed gihapun is netendek he timpu he ebpekezulas sikandan.
Hapit en egkeuma is kedezeeti kandan ne kenè en daan heini egkeuǥet.”
36 Edhukum is Nengazen he edlavan te menge etew zin;
egkehizuwan din sikandan is menge suluǥuen din, emun egkeehè din he wazè dan en desen wey zeisey zà is egkesamà kandan, uripen man etawa kenà uripen.
37 Ne ed-insà is Nengazen diyà te menge etew zin te, “Hendei en is menge ed-ezapen dan, he iring te vatu he endilungè dan?
38 Hendei en is menge ed-ezapen dan he egkaan te tavà te menge ibpemuhat dan wey ed-inum te pemuhat dan he vinu?
Petavang kew kandan, aput kew ziyà te kandan!
39 Ahaa niw is puriba ǥuntaan he iyan e zà Megbevayà!
Wazè en duma he Megbevayà gawas kedì.
Iyan a edhimatey ne iyan a zaan ebeǥey te untung; iyan a ebpalì wey iyan a zaan ebawì te palì,
ne wazà egkelibri emun edezeetan ku.
40-41 Guntaan ibayew ku is menge velad ku duma is kegkaǥi te,
‘Iring te uuyag a te wazà pidtemanan,
ne kenà daan duwazuwa he egkemengaan ku is egkindab he ispada ku ne egemiten ku heini te kedsilut;
ebelesan ku is menge kuntada ku wey edsukutan ku is ebpemendumut kediey.
42 Is besut te panè ku ne egkelupit te lengesa zan, ne egkeǥetad sikandan te ispada ku.
Ebpemematey sikandan ragkes en is menge teǥepalì kandan wey is egkengezekepan kandan.
Ebpemematey ragkes en is menge pengulu zan.’ ”
43 Sikiyu is menge etew ziyà te menge nasyun deliǥa niw is menge etew te Nengazen, su ebelesan te Nengazen is nemenhimatey kandan te menge suluǥuen din.
Ebelesan din is menge kuntada zin, ne edlumpiyuwan din is tanè din wey is menge etew zin.
44 Iyan heini menge lalag kayi te kanta he migkaǥi ni Moises duma si Josue he anak ni Nun diyà te menge etew. 45 Ne kegkepasad te kegkeǥiya kayi ni Moises, 46 migkaǥi sikandin diyà te menge etew te, “Ipependalid niw ziyà te ǥehinawa niw is langun he migkaǥi ku keniyu ǥuntaan. Ne ipenurù niw zaan heini ziyà te menge anak niw su wey zan mepurungi te edtuman is langun he egkekaǥi kayi he menge suǥù. 47 Heini he menge suǥù ne kenà bastavasta zà he menge lalag, su ebpekeveǥey heini keniyu te untung. Emun edtumanen niw heini egkembuwayan kew ziyà te tanà he ed-engkenen niw ziyà layun te Jordan.”
Inseysey is Kemetayen ni Moises
48 Dutun mismu he andew migkaǥi is Nengazen diyà te ki Moises te, 49 “Hendiyè ka te Moab, diyà te menge vuntud te Abarim ne tekezeǥa nu is Buntud he Nebo he ebpekesinaru ziyà te Jerico. Ne zutun pentawa nu is Canaan, sikan is tanà he ibeǥey ku ziyà te menge Israilihanen su wey zan maangken. 50 Ne keniyan ka he vuntud ebpatey ne ebpekaamur ka te menge kezuzumahi nu he nemematey en, iring is egkehitavù kenikew te nehitavù te suled nu he si Aaron su minatey sikandin diyà te Buntud he Hor ne nekaamur ziyà te menge kezuzumahi zin. 51 Su pudu kew is dezuwa neewai te kedsarig kediey ziyà te etuvangan te menge Israilihanen hein diyè kew te serebseb te Meriba ziyà te Kadesh, he ziyà te sibsivayan he Zin. Wazè niw ikepaahà is kegkewaǥas ku ziyà te etuvangan dan. 52 Umbe, egkepantew nu zà diyà te meziyù is tanà he ibeǥey ku te menge Israilihanen, piru kenè ka ebpekeseled duen.”