1 Iyan heini menge ngazan te menge maama he anak ni Jacob*Jacob: te Hebreo, Israel. he miduma kandin diyà te Ehipto, duma te menge pemilya zan: 2 Si Reuben, si Simeon, si Levi, si Juda, 3 si Isacar, si Zebulun, si Benjamin, 4 si Dan, si Naftali, si Gad, wey si Asher. 5 Ne 70 langun is kevuwazan ni Jacob he nemenduma kandin diyà te Ehipto, ragkes en si Jose he zaan en he ziyà te Ehipto.

6 Neuma is timpu he minatey si Jose wey is langun he menge suled din. Midlavey haazà he lapis te kevuwazan, 7 piru meǥaan dà nevuwad is menge kevuwazan dan, ne utew en subra is kahabet dan, umbe nekeeneb en sikandan dutun te tanà te Ehipto he neubpaan dan.

8 Ne zuen beǥu he nehimu he hadì diyà te Ehipto he wazà mesayud mehitenged ki Jose. 9 Ne migkeǥiyan din is menge sakup din te, “Ahaa niw man! Ebpemiligru kiw su utew en subra is kahabet te menge kevuwazan ni Israel. 10 Kinahanglan he zuen tew paaǥi he para kenà sikandan medsigudu mebmahabet, su wey zan kenà mekesukul kenitew pinaaǥi te kedtampu te menge etew he ebpekigira kenitew, su wey zan kenà mekaawà kayì te kenitew.”

11 Umbe, duen menge upisyal he midseriǥan te kedlisliseza te menge kevuwazan ni Israel pinaaǥi te kebpeterebehuwa kandan te utew subra, ne zutun netukud dan is menge inged he iyan is Pitom wey Rameses he zutun is menge budiga te hadì te Ehipto.†hadì te Ehipto: te literal, Faraon. 12 Iyan, dutun te utew sikandan edèdaaǥa, nasì en sikandan mebmahabet ne mid-iseg en mebmeluag is egkeubpaan dan, ne tenged kayi egkahandek kandan is menge tig-Ehipto. 13 Tenged kayi, impeiseg dan pa is kebpesipelahi zan te menge Israilihanen. 14 Wazè dan kegkehizu te menge Israilihanen. Utew zan midlisedlised sikandan pinaaǥi te kebpeterebehuwa kandan te kebaal te menge brik wey kedsimintu. Ne midrasey zan sikandan te kebpeterebehuwa zan diyà te pemuleey zan.

15 Ne migkeǥiyan duen te hadì diyà te Ehipto si Shifra wey si Pua he menge Hebriyuhanen he mengunguyamu te, 16 “Emun ebpenguyemuwan niw is ed-anak he Hebriyuhanen, ne himetayi niw emun maama, iyan, emun bahi ne kenè niw en himetayi.” 17 Ne ǥeina te egkahandek te Megbevayà haazà is menge mengunguyamu, wazè dan tumana haazà is migkaǥi kandan duen te hadì; wazè dan himetayi is menge vatà he maama he neuyemuwan dan.

18 Ne impetawag duen te hadì diyà te Ehipto sikan is menge mengunguyamu ne migkeǥiyan din te, “Maan is midsupak niw is insuǥù ku keniyu? Maan is wazè niw penhimetayi is menge vatà he maama he neuyemuwan niw?” 19 Ne midtavak dan is hadì te Ehipto he ke sikandan te, “Is menge vahi he Hebriyuhanen ne kenà iring te menge vahi he Ehiptohanen; lelemuwan sikandan umbe edlusazan dan en te kenè pa ebpekeuma is mengunguyamu.” 20 Mibpurungan te Megbevayà haazà is menge mengunguyamu. Ne mid-iseg pa mebmahabet haazà is menge kevuwazan ni Israel. 21 Ne ǥeina te midtahud dutun te menge mengunguyamu is Megbevayà, mibeǥayan din sikandan te keugelingen dan he menge pemilya. 22 Ne midsuǥù te hadì te Ehipto is langun he sakup din he itimbag dan diyà te Wahig he Nilo is langun he menge maama he veǥu he id-anak te menge Israilihanen, iyan, kenè dan mulà idtimbag emun bahi.