1 Migkeǥiyan te Nengazen si Moises te, 2 “Ipehinungud niw kedì is kada penganey he maama te menge anak niw wey is kada meemahan he egkehuna he anak te menge uyaǥen niw su migaked ku en heini.” 3 Ne migkeǥiyan ni Moises is menge etew te, “Tentenuzi niw heini he andew is andew te kebpeǥewasa keniyu ziyà te Ehipto, he zutun kew mengeuripen, ne tenged te kebpeǥewasa zin keniyu zutun pinaaǥi te mekeǥeǥehem he velad din. Kenè kew kaan te edtepayan. 4 Tentenuzi niw heini he andew zutun te vulan he Abib, he iyan kes andew te kebpeǥewasa keniyu ziyà te Ehipto. 5 Is tanà te menge Canaanhen, menge Hitihanen, menge Amorihanen, menge Hivihanen wey menge Jebusihanen, iyan kes tanà he impenangdù te Nengazen diyà te menge kepuun niw he ibeǥey zin keniyu, su heini he tanà, ne meupiya wey uuzaran. Ne emun ibpeseled kew en te Nengazen dutun he tanà, tumana niw heini he sulunuzen kayi he vulan te egkehuna he vulan te tuig: 6 Iyan keena niw seled te pitu he andew is supas he wazè din tapey ne zutun te ikepitu he andew tukud kew te pista he para te Nengazen. 7 Iyan dà keena niw is supas he kenà edtepayan seled dutun te pitu he andew. Dutun he timpu, kinahanglan he wazà tapey ziyà te menge valey niw wey ziyà te minsan hendei ziyà te ǥawas. 8 Dutun he andew keǥiyi niw is menge anak niw he iyan id-ul-ulaha niw zutun is tenged te kedtentenuzi niw te mid-ulaula te Nengazen para keniyu hein migawas kew puun te Ehipto. 9 Heini he pista, igkepetug-iring te patik diyà te menge velad niw etawa vuked niw he ebpetanudtanud keniyu he kinahanglan he edtudtulen niw is insuǥù te Nengazen su impeǥawas kew zin diyà te Ehipto pinaaǥi te ǥehem din. 10 Umbe, tumana niw heini kada egkeuma is kedtumana zuen te kada tuig.

11 “Emun diyè kew en te tanà te menge Canaanhen su ibeǥey en te Nengazen haazà diyà te keniyu sumalà is impenangdù din diyà te menge kepuun niw, 12 iveǥey niw ziyà te Nengazen is kada penganey he maama etawa meemahan he uyaǥen. Su ǥaked sikandan te Nengazen. 13 Ne tenged kayi egkehimu he edlekaten niw ziyà te Nengazen is asnu niw he pengenayan pinaaǥi te kebpemuhat diyà te kandin te nati he kerehidu. Ne emun kenè niw en edlekaten, kinahanglan he edhimetayan niw pinaaǥi te kebunggua zuen. Egkehimu zaan he edlekaten niw ziyà te Nengazen is kada penganey he maama zuen te menge anak niw. 14 Dutun te huziyan he timpu, emun ed-insà is menge anak niw ke hengkey is ibpesavut dutun, ne ke sikiyu te, ‘Impeǥawas kiw te Nengazen puun diyà te Ehipto su midlibri kiw zin te kegkeuripena kenitew pinaaǥi te kegemita zin te ǥehem din. 15 Su hein kenè kiw edtuǥutan te hadì te kegenat, midhimetayan te Nengazen is langun he penganey he menge anak he maama diyà te Ehipto, wey minsan is meemahan he menge penganey te menge uyaǥen dan. Umbe, ibpemuhat tew ziyà te Nengazen is menge meemahan he penganey he menge uyaǥen tew ne ebelukasan tew is penganey he menge anak tew he maama.’ 16 Heini he tulumanen, iring te patik diyà te velad wey vuked he kenà egkelipatan su layun egkaahà su pinaaǥi kayi kenà egkelipatan is kebpeǥewasa kenitew te Nengazen puun diyà te Ehipto pinaaǥi te kegamit din te ǥehem din.”

17 Hein impeǥenat en te hadì is menge Israilihanen, wazà sikandan ipevayà te Megbevayà te zalan he ziyà ebpekevayà te ed-ubpaan te menge Filistihanen minsan pa te iyan haazà mepantek su migkaǥi is Megbevayà te, “Is menge Israilihanen, emun ebpekepekidtebek dan te menge Filistihanen, ne kela ke mahalin is isip dan ne edlikù dan diyà te Ehipto.” 18 Ne tenged kayi, ziyà sikandan ipevayà te Megbevayà te ibayà he ibpehendiyà te Zaǥat he Meriǥà he ziyà ebpekevayà te sibsivayan minsan pa te mekived haazà he zalan. Dutun te kedhipanew te menge Israilihanen puun diyà te Ehipto neǥumeenan sikandan para te kebpekidtebek. 19 Mid-uwit ni Moises is menge tulan ni Jose su geina te impepenangdù ni Jose is menge suled din su ke sikandin te, “Kenà duwazuwa he edtevangan kew te Megbevayà, ne emun ed-awè kew en kayi te Ehipto kinahanglan he ed-uwiten niw is menge tulan ku.”

20 Hein mid-awè en is menge Israilihanen diyà te Sucot, ne ziyà sikandan megkampu te Etam, he kilid te sibsivayan. 21 Emun maandew zutun te kedhipanew zan egiyahan sikandan te Nengazen. Ebpetelihuna kandan sikandin pinaaǥi te mekepal he ǥapun he egkeiring te tukud diyà te egkehunaan dan; ne emun mezukilem, ne pinaaǥi maan te regreg he egkeiring te tukud diyà te egkehunaan dan. Ne iyan haazà ebpeketeyew kandan umbe ebpekehimu sikandan he edhipanew te maandew wey mezukilem. 22 Emun maandew kenà ed-awà diyà te egkehunaan dan sikan is mekepal he ǥapun he iring te tukud, ne emun mezukilem kenà ed-awà diyà te egkehunaan dan sikan is regreg he iring te tukud.