1 “Iyan heini ul-ulaha nu te kebpehinunguza nu ki Aaron wey te menge anak din he menge maama su wey zan mekepenilbi kedì pinaaǥi te kegkememumuhat dan. Kuwa ka te sevaha he turiti he vaka wey zezuwa he meemahan he kerehidu he wazè dan sazir. 2 Kuwa ka te kinemeupiyahan he herina te trigu, ne veeli nu he supas, iyan, kenè nu tepayi; baal ka zaan te mamun he ed-emutan te lana he ulibu, ne vaal ke zaan te kenà mulà ed-emutan te lana, is duma zutun ebpekenipisen nu ne edezasan nu te lana. 3 Itaǥù nu haazà diyà te vaskit ne ipemuhat nu kayi te kedì duma te kebpemuhata nu zuen te sevaha he turiti he vaka wey zezuwa he meemahan he kerehidu.

4 “Dumaha nu si Aaron wey sikan is menge anak din he maama ziyà te idselang pehendiyà te Tulda he Edtelevukaayan, ne ipepemeziǥù nu sikandan. 5 Ne vistiyi nu si Aaron te menge visti te memumuhat he iyan sikan is; bisti he kemisidintru wey sikan is ipud he iyan kes ispisyal he visti te memumuhat, sikan is teleǥuey ziyà te kumeng, wey sikan is meupiya is kegkeveeli zin he vakes duen te ipud. 6 Tengkuluwi nu sikandin ne ipikit nu zutun sikan is midalya he vulawan he tuus he impehinungud sikandin he para te Nengazen. 7 Kuwa ka te lana he para zà te idlana te ebpilien ku, ne ilana nu ziyà te ulu ni Aaron. 8 Ne ipehinungud nu zaan sikan is menge anak din he maama, ne vistiyi nu sikandan te pendizalem he visti, 9 tengkulu, wey vakes. Egkehimu sikandan he memumuhat taman te taman. Iyan heini paaǥi te kedhimuwa nu ki Aaron he memumuhat wey sikan is menge anak din.

10 “Uwita nu sikan is turiti he vaka ziyà te etuvangan te Tulda he Edtelevukaayan, ne keǥiyi nu si Aaron wey sikan is menge anak din he izampè dan is palad dan diyà te ulu zutun te vaka. 11 Ne lepaa nu haazà is baka ziyà te etuvangan te Nengazen diyà te gemawan dutun te Tulda he Edtelevukaayan. 12 Ne kuwa ka te lengesa zutun te vaka ne ipalis nu zuen te menge sungeysungey te menge suyuk duen te pemuhatà. Ne sikan is egkesamà he lengesa ivusbus nu zuen te untuzà dutun te pemuhatà. 13 Ne kuwaa nu is langun he tavà diyà te seled te ǥetek, ne kuwaa nu is deisey he vahin te atey, wey sikan is menge vuwà ragkes is menge tavà kayi, ne tutunga nu zuen te pemuhatà. 14 Ne sikan is sapù duen te vaka, lundis din, wey bituka zin, ne ziyè nu tutunga te gawas te kampu. Heini he pemuhat, pemuhat para idlumpiyu.

15 “Egkepasad haazà, iyan nu en maan kuwaa sikan is sevaha zuen te zezuwa he meemahan he menge kerehidu, ne keǥiyi nu si Aaron wey sikan is menge anak din he izampè dan is palad dan diyà te ulu zuen te kerehidu. 16 Lepaa nu haazà, ne uwita nu is lengesa zin, ne ipirik nu zuen te pesikilizà duen te pemuhatà. 17 Sepùa nu haazà is kerehidu; ne lùlui nu is bituka wey is duma he ebpemeketaǥù diyà te zizalem din ne sikan is menge paa, em-emura nu ragkes duen te ulu wey zuma he vahin. 18 Ne tutunga nu haazà duen te pemuhatà su pemuhat haazà he edtutungen para kedì. Is kehemut kayi he pemuhat te pinaaǥi te hapuy ne ebpekepenunuat kedì.

19 “Ne kuwaa nu en daan sikan is nesamà duen te zezuwa he meemahan he kerehidu, ne idampà ni Aaron wey te menge anak din diyà te ulu zutun is palad dan. 20 Ne himetayi nu haazà, ne kuwa ka te lengesa zutun ne izazas nu ziyà te kewanan he telinga ni Aaron wey kewanan he telinga zuen te menge anak din he maama, wey kewanan he tindezekelà te menge velad wey paa zan. Ne piriki nu te lengesa sikan is peliǥuy zuen te pemuhatà. 21 Ne kuwa ka te lengesa he zutun te pemuhatà, ne isahug nu heini te lana he para idlana ne ipirik nu haazà diyà te ki Aaron wey ziyà te menge visti zin, ipirik nu zaan duen te menge anak din, wey ziyà te menge visti zan. Dutun, si Aaron wey sikan is menge anak din he maama wey is menge visti zan, igkepehinungud en kayi te kediey.

22 “Kuwaa nu is menge tavà duen te kerehidu, sikan is melambù he ikug din, sikan is menge tavà diyà te seled te ǥetek, sikan is deisey he vahin te atey, wey sikan is menge vuwà ragkes is menge tavà kayi, wey sikan is kewanan he vuvun. Iyan heini is kerehidu pemuhat para te kedhimuwa te memumuhat he memumuhat. 23 Kuwa ka te supas duen te baskit he wazà tepayi he iyan sikan is supas he impemuhat kayi te kediey. Ipedsesangì nu is klasi te supas he egkuwaan nu, kuwa ka te sevaha he mamun he mid-emutan te lana he ulibu, wey sevaha he pan he wazà emuti te lana, wey senge-elad duen te menipis he supas. 24 Ne peǥewezi nu haazà is langun ki Aaron, wey te menge anak din he maama, ne ivayew zan haazà kayi te etuvangan ku su pemuhat haazà he ibayew. 25 Ne kuwaa nu haazà is menge supas diyà te menge velad dan, ne tutunga nu zutun te pemuhatà duma te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat kedì. 26 Ne kuwaa nu is kumeng duen te kerehidu ne ivayew nu haazà kayi te etuvangan ku su pemuhat haazà kayi te kediey he ibayew. Iyan heini kenikew he vahin duen te kerehidu he pemuhat he para te kedhimuwa ki Aaron he memumuhat wey te menge anak din.

27 “Ipehinungud nu kayi te kedì is menge vahin duen te kerehidu he pemuhat para te kedhimuwa ki Aaron he memumuhat wey te menge anak din, ragkes en kayi is kumeng wey buvun he imbayew kayi te kedì. 28 Kenà egkahalin is paaǥi ku he iyan heini: Emun ebpemuhat is menge etew ku te menge pemuhat he para te meupiya he kedepità, ne sikan is kumeng wey buvun duen te ayam he ibpemuhat kinahanglan he ibeǥey ziyà te menge memumuhat.

29 “Emun ebpatey en si Aaron, sikan is menge visti zin te kegkememumuhat din kinahanglan he ibeǥey ziyà te kevuwazan din he ebpekeilis kandin te lavew he mememuhat su para igkevivisti zan haazà emun ed-urdinahan sikandan pinaaǥi te kedlenahi kandan. 30 Is kevuwazan ni Aaron he ebpekeilis kandin te lavew he memumuhat he edseled te Tulda he Edtelevukaayan su ebpenilbi kedì dutun te Segradu he Lugar, kinahanglan he ibivisti zin haazà is menge visti seled te pitu he andew.

31 “Kuwaa nu sikan is usa he kerehidu he neǥamit te kedhimuwa ki Aaron wey zuen te menge anak din he memumuhat, ne hilutua nu ziyà te segradu he lugar. 32 Ne zutun dan haazà egkeena zuma zuen te supas duen te baskit te gemawan te Tulda he Edtelevukaayan. 33 Iyan dà sikandan egkehimu he egkaan dutun te usa wey supas he impemuhat para mevelukasi is menge salè dan dutun te kedhimuwa kandan he memumuhat. Wazà duma he egkehimu he egkaan kayi zuma kandan su segradu heini he keenen. 34 Ne emun egkeume en is meselem, ke zuen pa kenà egkekaan duen te usa etawa supas kinahanglan he edtutungen haazà; kenà haazà egkeenen su segradu haazà.

35 “Tumana nu heini is insuǥù ku kenikew mehitenged te kedhimuwa ki Aaron he memumuhat wey te menge anak din. Himuwa nu is ked-urdina kandan seled te pitu he andew. 36 Kada andew zutun, kinahanglan he pemuhat ka te turiti he vaka he pemuhat he para idlumpiyu, su wey melumpiyuwi sikan is pemuhatà. Ne lenahi nu haazà is pemuhatà su wey ikepehinungud heini. 37 Ul-ulaha nu heini kada andew zutun te pitu he andew. Ne egkepurung egkehimu he segradu haazà is pemuhatà, ne ereg he idsivey para te Nengazen is ebpekezegkit dutun.

38 “Kada andew kinahanglan he ibpemuhat nu zutun te pemuhatà is dezuwa he nati he kerehidu he tigsenge-tuig is keǥurang dan. 39 Sevaha te meselem ne sevaha te mahapun. 40 Dutun te kebpemuhata nu zuen te kerehidu te meselem, ne pemuhat ka te zezuwa he kilu he meupiya he kelasi he herina. Sehuǥi nu heini te senge litru he lana te veǥas te mibevayu he ulibu. Pemuhat ka zaan te senge litru he vinu he pemuhat he inumen. 41 Ne sikan is nati he kerehidu he ibpemuhat emun mahapun, iyan ded duma zin sikan is duma zuen te ibpemuhat emun meselem, wey iring daan duen kengezekelà. Is kehemut kayi he pemuhat te pemuhat he pinaaǥi te hapuy ebpekepenunuat kedì. 42 Iyan heini pemuhat he edtutungen, kinahanglan he andew-andew is ked-ul-ulaha niw kayi he pemuhat taman te sunud he menge lapis te kevuwazan. Ipemuhat niw heini kediey zutun te gemawan te Tulda he Edtelevukaayan, su zutun a ebpekidhinguma keniyu wey ebpekidlalag. 43 Dutun ku edhingumaa is menge kevuwazan ni Israel, ne pinaaǥi te mekeǥeǥehem he kebpekiduma ku egkehimu he segradu haazà he lugar. 44 Edhimuwen ku he segradu sikan is Tulda he Edtelevukaayan wey sikan is pemuhatà dutun, ne edhimuwen ku si Aaron wey is menge anak din he maama, he selakew keniyu su iyan mulà kandan he vaal is kebpemuhata kediey. 45 Edlumun a keniyu te menge kevuwazan ni Israel ne egkehimu a he Megbevayè niw. 46 Ne egketuenan niw he iyan a is Nengazen he Megbevayè niw, mibpeǥawas keniyu ziyà te Ehipto su para mekelumun a ziyà te keniyu. Iyan a is Nengazen Megbevayè niw.