1 Ne migkeǥiyan te Nengazen si Moises te, 2 “Pemineg ka! Mibpilì ku si Bezalel, is anak he maama ni Uri he apù ni Hur he sakup te tribu ni Juda. 3 Ne ed-ulinan ku sikandin pinaaǥi te ǥehem ku, ne ebeǥayan ku te ketau wey ebilidad te kebaal te minsan hengkey he vuluhaten. 4 Ebeǥayan ku sikandin te ketau te kebaal te mekempet he menge vutang he vulawan, pelata, wey brunsi, 5 te kebpurma te mahalen he menge vatu he ibpemikit, kegkurti te kayu, wey kebaal te zuma he edeyzeyanan he terebahu. 6 Ne nepilì ku zaan he edterebahu duma kandin si Oholiab he anak he maama ni Ahisamac te ebpuun diyà te tribu ni Dan. Ne ebeǥayan ku zaan te ebilidad is langun he menge pandey su para mehimu zan is minsan hengkey he idsuǥù ku he ebeelan he iyan is: 7 Tulda he Edtelevukaayan, Kavan te Kebpekid-uyun ku keniyu wey is tangeb din, is langun he menge gelemiten duen te Tulda– 8 sikan is lemisahan wey menge gelemiten kayi, sikan is selevukà te sulù he lunsey he vulawan wey is langun he himan kayi, sikan is pemuhatà he tutungà te veyewà, 9 sikan is pemuhatà te edtutungen he menge pemuhat, wey is langun he menge gelemiten kayi, sikan is bisin wey te selevukè din, 10 sikan is mekempet he menge visti te memumuhat he para egemiten ni Aaron wey zuen te menge anak din he maama emun ebpemuhat dan, 11 sikan is lana he idlana wey sikan is mehemut he veyewà he para zuen te Segradu he Lugar. Kinahanglan he ebpekepurung ebpekesungkad te insuǥù ku is kebeeli kayi te langun.”

12 Midsuǥù si Moises te Nengazen 13 he keǥiyi zin is menge Israilihanen: “Kinahanglan he edtumanen niw is menge ebpeveelan ku zutun te Andew te Kedhimeley, su iyan heini taman te taman he tuus diyà te pid-elangan tew he ebpetanudtanud keniyu he siak is Nengazen midhimu ku sikiyu he menge etew ku. 14 Kinahanglan he edtumanen niw is menge ebpeveelan ku zutun te Andew te Kedhimeley, su segradu heini he andew. Is minsan hentei he kenà edsunud te ibpetuman ku mehitenged keniyan he andew, kinahanglan he edhimetayan. Is minsan hentei he edterebahu keniyan he andew, ne kenè niw en isipa he zuma niw. 15 Seled te heenem he andew is kedterebahu niw, piru te ikepitu he andew, ne himeley kew. Su heini he andew ne segradu para kedì, is minsan hentei keniyu he edterebahu kayi he andew ne kinahanglan he edhimetayan. 16-17 Umbe sikiyu is menge Israilihanen, kinahanglan he tumana niw is ibpetuman ku keniyu te Andew te Kedhimeley taman te huziyan he lapis te menge kevuwazan. Su iyan heini pirmeninti he tuus te ebpedayun he kebpekid-uyun ku keniyu. Su seled te heenem he andew mibeelan ku is langit wey is kelibutan, ne te ikepitu he andew ne midhimeley a.”

18 Ne hein nekepasad is Nengazen he ebpekidlalag ki Moises diyà te puntur te Buntud he Sinai, imbeǥey zin diyà te ki Moises is dezuwa he midlumpipì he vatu he zutun isurat te Megbevayà is menge velaud din.