1 Migkaǥi is Nengazen kayi te kedì te, 2 “Sikew is etew, rewaki nu is menge tarù he ebpeneuven kayi te Israel he ebpenagnà te binèbeelan dan dà. Keǥiyi nu sikandan he mebpemineg dan kayi te menge lalag ku: 3 Iyan a, is Nengazen he MEGBEVAYÀ, migkaǥi he mekehizuhizu is tulebung he menge ebpeneuven he ebaalvaal zà te menge tagnè dan he wazè dan nelewasan. 4 He Israel, is menge ebpeneuven diyà te keniyu iring te menge leew he asu he ziyà te nevengkag he menge inged. 5 Wazè dan petizeeni is menge etew. Iring heini te wazè dan purungi is neǥevà he verengbeng te Israel su para melig-en heini ke egkeuma is tebek dutun te andew te kedsilut te Nengazen. 6 Kenà tutuu is nelewasan dan ne tarù is menge tagnè dan. Kesikandan te ebpuun diyà te Nengazen is menge lalag dan, piru iyan tutuu is wazè ku sikandan suǥua. Ne ebperateng pa sikandan te kegketuman te mibpengaǥi zan. 7 Kenà tutuu is nelewasan dan ne tarù is menge tagnè dan. Kesikandan te iyan haazà migkaǥi ku piru wazè ku haazà mekaǥi.

8 “Umbe siak, is Nengazen he MEGBEVAYÀ migkaǥi a he edsupaken ku is tarù he menge tagnè dan wey kenà tutuu he menge nelewasan dan. 9 Edsilutan ku sikandan is menge ebpeneuven he kenà tutuu is nengelewasan dan wey tarù is menge tagnè dan. Kenà sikandan egkilelaan he zuma te menge etew ku, ne is menge ngazan dan kenà idsurat diyà te listahan te menge etew ziyà te Israel, ne kenà sikandan ebpekeseled diyà te tanà te Israel. Ne human niw egketuenan he iyan a Nengazen he MEGBEVAYÀ.

10 “Heini he menge ebpeneuven, midtazin dan is menge etew ku pinaaǥi te kegkaǥi he meupiya is kebpekesavuk te langun, piru iyan tutuu is kenà heini meupiya. Iring heini te mibangun is menge etew te kenà melig-en he verengbeng, ne mibpekeplaan dà heini te menge ebpeneuven te minasa he utew zà deisey he simintu is insahug duen. 11 Keǥiyi nu heeyan is mibpekapla he egkevengkag heeyan is berengbeng dan. Ed-enuzen heini te mereǥes he uzan, egkeuluǥan heini te menge giyew he iring te menge vatu ne egkeremaǥen heini te mevendes. 12 Ne emun egketempag en heini, ed-insà is menge etew ziyà te kandan te, ‘Hengkey is nehimu te impekaple niw?’

13 “Umbe siak, is Nengazen he MEGBEVAYÀ, egkaǥi a te: Tenged te utew ku kegkepauk, edtempaǥen ku is menge verengbeng pinaaǥi te mevendes he keramag, wey ked-uzan te zezekelà he menge ǥiyew, wey mereǥes he uzan. 14 Uya, edtempaǥen ku is berengbeng he mibpekeplaan te minasa he utew zà deisey he simintu is insahug duen. Edtempaǥen ku heini taman te egkaahà is pundasyun kayi. Ne emun egketempag en, egkeutunan kew ne egkeǥerè kew. Ne zutun egketuenan te langun he iyan a Nengazen. 15 Ebeelan ku keniyan te verengbeng wey ziyà te mibpekapla duen is rimeǥas te utew ku kegkepauk. Ne ibpehibelu ku he wazè en is berengbeng wey is mibpekaplà duen 16 he iyan is menge ebpeneuven diyà te Israel he midtagnà he meupiya is kebpekesavuk te menge etew ziyà te Jerusalem, minsan pa te iyan tutuu is kenà heini meupiya. Iyan a, is Nengazen he MEGBEVAYÀ, is migkaǥi kayi.

17 “Guntaan, sikew is etew, penagnè ka te ebpekesuǥat te menge vahi he nenagnà te binèbeelan dà. 18 Keǥiyi nu sikandan te iyan a is Nengazen he MEGBEVAYÀ migkaǥi te: Mekehizuhizu kew is menge vahi he mid-akal te menge etew ku, batà etawa meǥurang, pinaaǥi te menge hinepetan niw, he ibevekelew niw wey ibpikit niw ziyà te menge lembung niw. Egkesuat kew he meveyveyai niw is menge etew ku su wey niw sikandan mepenepii. 19 Mibpendezeisey a keniyu ziyà te etuvangan te menge etew ku tenged dà te nepipira he kemkem te barli wey nepipira he supas. Mibpenhimetayan niw is kenà ereg he edhimetayan, ne mibpesagdan niw he meuyag-uyag is ereg pezem he ebpatey.

20 “Umbe siak, is Nengazen he MEGBEVAYÀ, migkaǥi a he utew a supak te menge hinepetan niw he migamit niw te ked-akal te menge etew he iring te penuǥes he nekeutel kandan. Id-awè ku heini puun te menge vekelawan niw, ne ibpaawè ku is menge etew he neiring te tagbis he neutel niw. 21 Id-awè ku zaan is menge lembung niw, ne edlibriyen ku is menge etew ku puun te ǥehem niw, ne kenè niw en sikandan egkeuman egkebiktima. Ne zutun egketuenan niw he iyan a Nengazen.

22 “Naawà is kezasig te menge metazeng tenged te menge tarù niw, ne minsan siak wazà a mebeǥey kandan te seeng. Ne midasig niw is menge lalung he kenè dan ewai is kelelalung dan pinaaǥi te kedsaad niw kandan he egkelibri sikandan te kemetayen. 23 Umbe, kenè kew en ebpekelawas te tarù is ibpesavut din wey kenè kew en ebpekehimu he ebpenagnà. Edlibriyen ku is menge etew ku puun te ǥehem niw. Ne zutun egketuenan niw he iyan a Nengazen.”