1 Dutun te nehuna he andew te vulan, dutun te ike-11 he tuig te kegkevihaǥa kenami, migkaǥi is Nengazen kayi te kedì te, 2 “Sikew is etew, midlipey is menge tig-Tyre tenged te kegkezeeti te Jerusalem. Ke sikandan te, ‘Nezeetan en is beyeey te menge nigusyanti. Kenitew en heini he timpu. Iyan kiw en maan ed-uswag.’ 3 Umbe iyan a, is Nengazen he MEGBEVAYÀ, migkaǥi he egkuntrahan ku is menge tig-Tyre. Ibpesurung ku heini te mahabet he menge nasyun, he edasmag iring te menge vaǥel. 4 Ebengkaǥen dan is menge verengbeng te Tyre wey menge turi kayi. Egkeluten dan is tanà kayi taman te vatu zà is egkesamà. 5 Ne egkehimu zà heini he kegkaǥà te puket te menge mengingisdà. Iyan a, is Nengazen he MEGBEVAYÀ, is migkaǥi kayi. Ibeǥey ku is Tyre ziyà te zuma he menge nasyun he ed-aǥew te menge azen kayi, 6 ne is menge meǥinged diyà te menge inged kayi ebpenhimetayan pinaaǥi te ispada. Ne egketuenan dan he iyan a Nengazen.”

7 Mibpedayun megkaǥi is Nengazen he MEGBEVAYÀ te, “Sikiyu is menge tig-Tyre, ibpesurung ku sikiyu ki Hadì Nebucadnezar he hadì te Babilonia, he hadì te menge hadì. Edsurung sikandin is ebpuun diyà te zizaya duma te mahabet he menge sundaru, menge kerwahi, menge kudà, wey menge pereuntud te kudà. 8 Ibpepenhimetayan din is menge meǥinged diyà te menge inged niw pinaaǥi te ispada. Edsurung is menge sundaru zin he ed-uwit te menge turi-turi, wey menge kelasag, ne edtembuan dan te menge tanà is peliǥuy te menge verengbeng niw su para mepemenehiki heini. 9 Ibpevengkag din is menge verengbeng niw pinaaǥi te zezekelà he menge trusu ne ibperundus din is menge turi niw pinaaǥi te menge masu. 10 Egketembunan kew te eliyavuk tenged te menge kudè din he utew mahabet. Egketegker is menge verengbeng niw tenged te dabekdabek te menge kudè din wey menge kerwahi he edseled diyà te pultahan te nevengkag he inged niw. 11 Edtekutakan te menge kudè din is langun he menge zalan niw. Ibpeǥerè kew zin is menge meǥinged pinaaǥi te ispada, ne egkevengkag is melig-en he menge tukud niw. 12 Ed-eǥawen dan is menge ketiǥeyunan niw wey menge velegyè niw. Edrundusen dan is menge verengbeng niw wey mekempet he menge valey niw, ne idtimbag dan diyà te zaǥat is menge vatu, menge kayu, wey is langun he egkesamà te nengevengkag. 13 Pinaaǥi kayi ibpeengked ku sikiyu te kegkanta wey kedtukar te menge alpa niw. 14 Edhimuwen ku is lugar niw he sevaha he meluag he vatu he zutun igkagkag te menge mengingisdà is menge puket dan. Kenè en egkeuman egkevangun is inged niw. Iyan a, is Nengazen he MEGBEVAYÀ, is migkaǥi kayi.”

15 Migkeǥiyan pa te Nengazen he MEGBEVAYÀ is menge tig-Tyre, “Is menge ed-ubpà diyà te beyvey te zaǥat egkerkeren te kegkahandek dan emun egkezineg dan is kegkezeeti niw wey kebpematey, wey is dag-es te menge teǥepalì diyà te keniyu. 16 Is menge pengulu ziyà te menge lugar he veyvey te zaǥat edrenà puun te pinuuwà te lavew ne edluwasen dan is bisti te hadì wey is mekempet he pendizalem he visti zan. Ne ebpinuu sikandan diyà te tanà is egkerkeren tenged te nehitavù keniyu. 17 Ne edsineǥew sikandan he egkaǥi te: ‘Utew subra is kegkezeeti nu, sikew is nevantug he inged he ed-ubpaan te menge etew he iyan ibpeguyag dan is daǥat. Mekeǥeǥehem ka utew ziyà te menge zaǥat, ne egkehandek is menge etew he ed-ubpà diyà te veyvey te zaǥat. 18 Ne ǥuntaan egkerkeren te kegkahandek is menge ebpemen-ubpà diyà te veyvey te zaǥat tenged te kegkezeeti kayi te inged.’ ”

19 Migkaǥi pa is Nengazen he MEGBEVAYÀ te, “He Tyre, egkehimu ka he mekevulungbulung he inged, egkehimu ka he inged he wazà duen ed-ubpà. Edsepalen ku sikew te mezalem he wahig. 20 Edlenepen ku sikew ziyà te kinezizaleman. Kenè ke en ebpekelikù diyà te lugar he para te menge uuyag. 21 Edtepusen ku en sikew, ne mekahandekhandek is ketepusan nu. Egkahanew ke en, minsan ebpen-ahaan ka ne kenè ke en egkaahà. Iyan a, is Nengazen, is migkaǥi kayi.”