1 Migkaǥi is Nengazen kayi te kedì te, 2 “Sikew is etew, keǥiyi nu is duma nu he menge meǥinged he emun ibpesurung ku te menge kuntada is sevaha he lugar, is menge meǥinged keniyan he lugar kinahanglan he mebpilì te sevaha kandan he egkehimu he perevantey te inged dan. 3 Emun egkaahà dutun te vantey he ebpelingguma is menge kuntada, ipezaǥing din is trumpita he para te kebpetizaan te menge etew. 4 Is minsan hentei he ebpekezineg duen te trumpita piru kenè din edseǥipaan, ne ebpatey sikandin dutun te kedsurunga kandan, ne ziyà mismu igkevasul te kandin is kemetayen din. 5 Su ǥeina te hein nezineg din is trumpita ne wazà sikandin medseǥipà, umbe iyan dà sikandin egkevasul te kemetayen din. Su emun pezem midseǥipà sikandin ne egkelibri zin is keugelingen din. 6 Iyan, emun naahà duen te vantey is ebpelingguma he menge kuntada piru wazè din ipezaǥing is trumpita te kebpetizaan te menge etew, ne emun duen ebpatey kandan dutun te kedsurunga kandan, edsukuten ku zutun te vantey is kemetayen dan minsan iyan ibpatey zan is tenged te salè dan.”

7 Mibpedayun megkaǥi is Nengazen te, “Sikew is etew, mibpilì ku sikew he ed-elima te menge etew te Israel, umbe pemineǥa nu is egkeǥiyen ku, ne segugunè nu petizeeni is menge etew. 8-9 Emun egkeǥiyan ku is lalung he etew he siguradu he ebpatey sikandin tenged te salè din ne wazè nu sikandin keǥiyi he engkezi zin is mezaat he menge vaal zin, iyan ka edsukutan ku te kemetayen din. Iyan, emun migkeǥiyan nu haazà is lalung he etew he engkezi zin is mezaat he menge vaal zin, ne wazè din seǥipaa is migkaǥi nu, ebpatey sikandin tenged te salè din, piru wazè nu televaken dutun te kemetayen din.

10 “Sikew is etew, edriklamu is menge etew te Israel he kenè dan egkaantus is silut tenged te menge salè dan. Ebpengguyaan en sikandan ne henduen be te ebpatey zan en tenged kayi. 11 Ne ǥuntaan keǥiyi nu sikandan he siak, is Nengazen he MEGBEVAYÀ he uuyag, migkaǥi a he kenà a egkelipey emun duen ebpatey he lalung he etew. Iyan suat ku he engkezi zan is mezaat he menge vaal zan su wey zan meuyag-uyag. Umbe sikiyu is menge etew te Israel, engkezi niw en is mezaat he menge vaal niw. Maan is egkesuat kew he ebpatey?

12 “Ne ǥuntaan, sikew is etew, keǥiyi nu is duma nu he menge meǥinged he emun ebaal te salà is metazeng he etew, is meupiya he menge vaal zin dutun te nehuna he timpu ne kenà ebpekelibri kandin. Ne emun iyan ed-engked te mezaat he menge vaal zin is lalung he etew ne kenè en sikandin edsilutan tenged duen te nehuna he kelelalung din. 13 Emun egkaǥi a ziyà te metazeng he etew te siguradu he egkeuyag-uyag sikandin, piru kegketapus dutun ebaal sikandin te salà su edsarig he ebpekelibri kandin is nehuna he meupiya he menge vaal zin, heeyan he etew ebpatey tenged te salè din. Kenè ku en edtentenuzan is meupiya he menge vaal zin. 14 Ne emun egkeǥiyan ku is lalung he etew he siguradu he ebpatey sikandin, piru mibpezumdumahan din is sambag kandin ne mid-engkezan din is mezaat he menge vaal zin ne mibaal te hustu wey metazeng– 15 penenglitan, in-ulì din is insandà diyà te kandin etawa tinakew zin, wey midtuman din is menge sulunuzen he ebpekeveǥey te untung te wazà mebaal te mezaat, ne heeyan he etew siguradu he egkeuyag, ne kenà sikandin ebpatey. 16 Is minsan hengkey he salà he nehimu zin ne kenè en edtentenuzan is kedèdeeti kandin tenged dutun. Ne tenged te mibaal sikandin te hustu wey metazeng, siguradu he egkeuyag-uyag sikandin.

17 “Piru is menge zuma nu he meǥinged, Ezekiel, edriklamu he kenè kun hustu is paaǥi ku. Piru iyan kenà hustu is kandan he paaǥi. 18 Emun ed-engked he edtinazeng is metazeng he etew su ebaal en sikandin te mezaat. Ebpatey sikandin. 19 Ne emun is lalung ed-engked he ebaal te mezaat he menge vaal, ne ebaal en sikandin te hustu wey metazeng, egkeuyag-uyag sikandin. 20 Menge etew te Israel, migkaǥi kew he kenà hustu is paaǥi ku. Edhukuman ku is kada sevaha keniyu sumalà te menge vaal niw.”

21 Hein ikelima he andew te ikesepulù he vulan, dutun te ike-12 he tuig te kegkevihaǥa kenami, duen sevaha he etew he nekepelaǥuy puun te Jerusalem he midhendiyà te kedì, ne ke sikandin te, “Nezeetan en is inged he Jerusalem!” 22 Dutun te nehuna he kezukileman, te wazè pa mekeuma haazà is etew, midumala a te Nengazen ne nekeuman ad mekekaǥi. Umbe hein meselem he nekeuma haazà is etew, ne ebpekekaǥi ad.

23 Migkaǥi is Nengazen kayi te kedì te, 24 “Sikew is etew, is menge etew he ed-ubpà diyà te nevengkag he menge inged diyà te Israel egkaǥi te, ‘Sebsevaha zà si Abraham, ne imbeǥey ziyà te kandin is tivuuk ha tanà. Ne mahabet kiw mulà, umbe siguradu he egkaangken tew ǥihapun heeyan he tanà.’ 25 Ne guntaan keǥiyi nu sikandan, he iyan a, is Nengazen he MEGBEVAYÀ migkaǥi te, ‘Egkeisip niw ve he egkaangken niw ǥihapun haazà is tanà minsan egkaan kew te usa he zuen din pa lengesa, wey ed-azap kew te zuma he menge ed-ezapen niw, wey ebpenhimatey kew te etew? 26 Edsarig kew te ispada niw, ebaal kew te utew mezaat he menge vaal, wey mengungumpadi kew. Ne egkeisip niw ǥihapun is ked-angken duen te tanà? 27 Iyan a, is uuyag he Nengazen he MEGBEVAYÀ, nenangdù he siguradu he ebpemematey te tebek sikan is nengesamà he uuyag duen te nerundus he inged. Is menge nengesamà he uuyag diyà te menge vevesukà edewiyen te zumezaas he menge langgam, ne is duma kandan he ziyà te menge elesà wey menge surung ebpematey te zaru. 28 Edhimuwen ku he mekevulungbulung he tanà is Israel, ne id-awè ku is kebpehivantug te menge etew kayi mehitenged te egkehimu zan. Minsan is menge vuvungan kayi egkehimu he mekevulungbulung, ne wazè en ebayà dutun. 29 Emun ebengkaǥen ku en wey edhimuwen he mekevulungbulung heeyan is tanà tenged te langun he utew mezaat he menge vaal te menge etew kayi, egketuenan dan he iyan a Nengazen.’ ”

30 Migkaǥi is Nengazen kayi te kedì te, “Sikew is etew, is duma nu he menge meǥinged edhisgut mehitenged kenikew emun egketiǥum sikandan diyà te uvey te verengbeng te inged etawa ǥemawan te menge valey zan. Ebpelelelaǥà sikandan is egkaǥi te, ‘Hendini kew su ebpemineg kiw ki Ezekiel ke hengkey is ibpakaǥi kandin te Nengazen!’ 31 Umbe, ed-uvey is menge etew ku ziyà te kenikew iring duen te layun dan ebeeli, ebpinuu zan diyà te etuvangan nu he henduen be te tutuu he ebpemineg dan kenikew, piru iyan benar is wazè dan tumana is mibpengaǥi nu. Netuleng dan dà te kegkaǥi he mahal e zan, piru iyan diyà te ǥehinawa zan is dekelà he kadar te selapì. 32 Diyè te kandan, iring ke zà te perekanta he zuen din meupiya he laǥeng he egkanta te kentahan para te kebmahal wey sevaha ka he metau he edtukar te instrumintu. Mibpemineg dan dà is menge lalag nu piru wazè dan heini tumana. 33 Ne emun egkehitavù en heini is silut kandan he siguradu he egkehitavù, egketuenan dan he zuen bes iyan ebpeneuven he zuma zan.”