1 Iyan heini lista te menge tribu te Israel wey is menge tanà he egkaangken dan:

Is tanà te tribu ni Dan ne ziyà te zizaya. Is dulunà kayi ebpuun diyà te Hetlon pehendiyà te Lebo Hamat taman te Hazar Enan he ziyà te zulunà te Damascus wey Hamat diyà te zizaya. Is keluag te tanà te tribu ni Dan, ebpuun diyà te edsilaan taman te zapit te edsenlepan te Israel.

2 Is tanà te tribu ni Asher ne ziyà te zivavà he vahin te tanà te tribu ni Dan, ne is keluag kayi, ebpuun diyà te edsilaan taman te zapit te edsenlepan te Israel.

3 Is tanà te tribu ni Naftali ne ziyà te zizaya he vahin te tanà te tribu ni Asher, ne is keluag kayi, ebpuun daan diyà te edsilaan taman te zapit te edsenlepan te Israel.

4 Is tanà te tribu ni Manase ne ziyà te zivavà he vahin te tanà te tribu ni Naftali, ne is keluag kayi, ebpuun daan diyà te edsilaan taman te zapit te edsenlepan te Israel.

5-7 Is edsunud pa he menge tanà iyan is gaked te tribu ni Efraim, ni Reuben, wey ni Juda, he is menge keluag kayi ebpuun daan te edsilaan taman te zapit te edsenlepan te Israel.

8 Is tanà he ziyà te zizaya te Juda, iveǥey niw ziyà te Nengazen he ispisyal he gasa. 12 he kilumitru is keleyatan kayi, ne is keluag kayi, ebpuun daan diyà te edsilaan taman te zapit te edsenlepan te Israel iring te ǥaked te zuma he menge tribu te Israel. Is baley te Nengazen ne edtukuzen diyà te teliwazà kayi he tanà. 9 Mehitenged duen te tanà he ibeǥey niw ziyà te Nengazen he ebengunan te valey zin, ne 12 he kilumitru is keleyatan din ne lelima he kilumitru is keluaǥan din. 10 Is ketengà kayi he tanà ne para te menge memumuhat. Is keleyatan kayi puun te edsilaan pehendiyà te edsenlepan ne 12 he kilumitru, ne is keluaǥan kayi he puun te zizaya pehendiyà te zivavà, ne lelima he kilumitru. Ne ziyà te teliwazà kayi ne zutun is baley te Nengazen. 11 Heini he tanà, ne para te pinilì he menge memumuhat, he iyan is menge kevuwazan ni Zadok. Metinumanen sikandan he nenilbi kedì wey wazà med-awà kayi te kedì. Kenà iring te mibeelan te zuma he menge kevuwazan ni Levi he miduma te menge Israilihanen te ked-awà kayi te kedì. 12-13 Heini he tanà, ne ispisyal he gasa para te menge memumuhat, ne iyan heini utew segradu he tanà. Ne ziyà te avey kayi iyan is tanà he para te zuma he menge kevuwazan ni Levi. Heini is tanà, ne 12 he kilumitru is keleyatan din ne lelima he kilumitru is keluaǥan din. 14 Kinahanglan he kenè dan ivelegyà etawa iliwà is minsan deisey zà he vahin kayi, su iyan heini utew meupiya he tanà wey segradu heini para te Nengazen.

15 Is egkesamà he tanà he zuen din keleyatan he 12 he kilumitru wey keluaǥan he dezuwa wey tengà he kilumitru, ne para heini mulà te kezekelan. Egkehimu heini he ed-ubpaan te menge etew wey ebpepenebtavan te menge uyaǥen dan. Ne ziyà te teliwazà kayi, ne zutun is inged 16 he zuen din keluag he zezuwa he kilumitru kuwedradu. 17 Neliǥuy heini te mehiǥawan he lugar he tig-125 he mitrus kuwedradu. 18 Diyà te ǥawas te inged duen bevesukà he zuen din keleyatan he lelima he kilumitru pehendiyà te edsilaan wey lelima zaan he kilumitru pehendiyà te edsenlepan. Diyà heini te zulunà te segradu he tanà. Is menge abut kayi he tanà ne para te keenen te edterebahu ziyà te inged. 19 Is minsan hentei he edterebahu ziyà te inged he ebpuun diyà te nekedseselekawà he tribu te Israel egkehimu he ebasuk kayi he tanà. 20 Umbe, is tivuuk he tanà he ibeǥey niw ziyà te Nengazen he ispisyal he gasa, ragkes en is segradu he tanà wey sikan is inged, 12 he kilumitru kuwedradu.

21-22 Is egkesamà he menge tanà, diyà te edsilaan wey edsenlepan duen te segradu he tanà wey zuen te inged, ne gaked te pengulu. Is keluag kayi he tanà 12 he kilumitru ne nekeuma heini ziyà te zulunà te Israel ziyà te edsilaan wey edsenlepan. Umbe is diyà te teliwazà te tanà he para te pengulu iyan is segradu he tanè ku, is baley ku, is tanà te menge kevuwazan ni Levi, wey is inged. Is tanà he para te pengulu ziyà te mid-elangan te tanà he para te tribu ni Juda wey te tanà he para te tribu ni Benjamin.

23 Iyan heini menge tanà he egkaangken te wazè pa mevehini he menge tribu:

Is tanà te tribu ni Benjamin ne ziyà te egkezivavà te tanà te pengulu, ne is keluag kayi puun te edsilaan taman te edsenlepan te Israel.

24 Is tanà te tribu ni Simeon, ne ziyà te egkezivavà te tanà te tribu ni Benjamin, is keluag kayi, ebpuun daan te edsilaan taman te edsenlepan te Israel.

25-27 Is edsunud he menge tanà, ne iyan is gaked te tribu ni Isachar, ni Zebulun, wey ni Gad, he is keluag dan, ebpuun daan te edsilaan taman te edsenlepan te Israel. 28 Is divavà he zulunà te tanà te tribu ni Gad, ebpekeikul te Tamar pehendiyà te menge serebseb te Meriba Kadesh edlaus diyà te zal-ug te Ehipto taman te Zaǥat he Mediteraneo.

29 Iyan heini menge tanà he egkezawat te menge tribu te Israel he egkepengevilin dan. Iyan a, is Nengazen he MEGBEVAYÀ, is migkaǥi kayi.

30-34 Is heepat he verengbeng he nekeliǥuy te inged he Jerusalem, duen din tigtetelu he pultahan. Is menge pultahan diyà te zizaya he verengbeng, ne egngezanan te Reuben, Juda, wey Levi. Is menge pultahan diyà te zapit te edsilaan he verengbeng, egngezanan te Jose, Benjamin, wey Dan. Is menge pultahan diyà te zivavà he verengbeng, egngezanan te Simeon, Isachar, wey Zebulun. Ne is menge pultahan diyà te zapit te edsenlepan, egngezanan te Gad, Asher, wey Naftali. Is kada verengbeng, 2,250 he mitrus is keluǥayad din. 35 Umbe is tivuuk he keleyatan duen te verengbeng, ne 9,000 he mitrus, ne puun dutun he timpu haazà is inged egngezanan he “Keniyan is Nengazen!”