9
1 Ne zutun midtuvazan te Megbevayà si Noe wey is menge anak din, ne ke sikandin te, “Mevuwad kew ne mebmahabet kew utew su wey meeneb is kelibutan te menge etew. 2 Utew egkehandek keniyu is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig. Iyan kew ebayàbayà kandan te langun. 3 Is minsan hengkey he linimbag he ebpekewaleng he egeǥehinawa, ne idtuǥut ku he egkeenen niw su ibeǥey ku en keniyu, iring te kebeǥaya ku zengan keniyu te menge sagbet. 4 Piru kenè niw keena is langgam he wazè pa maawà dutun is lengesa zin, he iyan igkeuyag din. 5 Ke zuen etew wey minsan langgam he ibpetiǥis din is lengesa niw te menusiyà wey kew mebpatey, ebelesan ku. Ebelesan ku is minsan hentei he ebunù te zuma zin he etew. 6 Ke zuen etew he edhimatey te zuma zin he etew edhimetayan daan sikandin te zuma zin he etew. Su midlimbag te Megbevayà is etew he iring te zagwey zin. 7 Ne mesigudu kew mevuwad wey kew mebmezakel ne wey kew mekeeneb te tivuuk he kelibutan.”
8 Ne migkaǥi pa is Megbevayà diyà te ki Noe wey ziyà te menge anak din te, 9 “Edtukuzen ku en guntaan is kebpekid-uyun ku keniyu wey te menge kevuwazan niw, 10 wey is minsan hengkey he linimbag ku he egeǥehinawa he zuma niw keniyan te arka, is menge tagbis, is menge ayam, is menge leew he menge langgam, wey is minsan hengkey zaan he linimbag ku zini te kelibutan. 11 Ne iyan heini kebpekid-uyun ku keniyu: Kenè ku en maan edlimasen is langun he egeǥehinawa pinaaǥi te wahig. Kenè ku en maan edèdeetan is kelibutan pinaaǥi te wahig.” 12 Ne migkaǥi zaan is Megbevayà te, “Duen ibpeehè ku keniyu he egkehimu he tuus te wazà pidtemanan he kebpekid-uyun ku keniyu wey te langun he menge linimbag ku he egeǥehinawa he zuma niw he midlawang keniyan te arka. Ne iyan is: 13 Idsavuk ku en is belugtu ziyà te menge ǥapun he iyan tuus te kebpekid-uyun ku keniyu. 14 Emun edhimuwen ku he ebpenggapun ne egkeehè niw zutun is belugtu, 15 ne kenè ku edlipatan is kebpekid-uyun ku keniyu wey te langun he menge linimbag ku he egeǥehinawa, Kenè ku en maan ibpelapey is menge wahig para te kedlimasa te langun he menge linimbag he egeǥehinawa. 16 Emun egkeehè niw is belugtu ziyà te menge ǥapun, ed-ahaan ku zaan, ne edtenuzan ku is wazà pidtemanan he kebpekid-uyun ku keniyu te langun he linimbag ku ziyan te kelibutan he egeǥehinawa.” 17 Ne migkaǥi zaan is Megbevayà diyà te ki Noe te, “Is belugtu, ne iyan tuus te kebpekid-uyun ku keniyu te langun he egeǥehinawa zini te kelibutan.”
18 Is menge anak ni Noe he migawas dutun te arka ne iyan si Shem, si Ham, wey si Jafet. (Nehimu si Ham he amey ni Canaan.) 19 Iyan heini sikan is tetelu he anak ni Noe ne iyan sikandan menge kepuun te langun he menge etew he nekeeneb te tivuuk he kelibutan.
20 Si Noe sevaha te menge te perevasuk, ne iyan sikandin nehuna he nekepemula te paras. 21 Sevaha zutun he andew, mid-inum sikandin te vinu he zutun ebpuun te menge pinemula zin he paras, ne nelangut sikandin ne midhizeǥà he nelevasan diyà te tulda zin. 22 Si Ham (is amey ni Canaan), mid-ehè din is amey zin he nelevasan ne midtudtulan din is menge kakey zin he ziyè pa te ǥawas te valey. 23 Iyan, si Shem wey si Jafet mulà, migkuwa zan te malung ne insinabley zan ne midseled dan dutun is ed-endud ne midtembunan dan is amey zan he nelevasan. Wazè dan tengtengi sikandin su wey kenè dan maahà haazà is amey zan he nelevasan. 24 Ne hein nepukew si Noe zutun te kegkelangut din, ne netuenan din ke hengkey is mibeelan kandin te anak din he hazi, 25 ke sikandin te,
“Berakat he rewaki ka te Megbevayà, Canaan. Mehimu ka he uripen te menge suled nu, ne mehimu he utew minus is pid-etawan nu.”
26 Ne migkaǥi zaan sikandin te, “Berakat daan he zeliǥa is Nengazen he iyan Megbevayà ni Shem!
Ne verakat he mehimu he uripen ni Shem si Canaan.
27 Berakat daan he utew meluag is tanà he ebpeubpaan te Megbevayà te menge kevuwazan ni Jafet,
ne berakat he ikeǥalew sikandan te menge kevuwazan ni Shem, iyan, uripen dan mulà si Canaan,” ke si Noe.
28 Ne puun dutun te kedlapey te zaǥat, 350 pa he tuig is keluǥayad te untung ni Noe. 29 Ne hein 777 en is penuiǥen din, minatey sikandin.