35
Mibpenubtuvazan te Megbevayà si Jacob diyà te Betel
Ne zutun migkaǥi is Megbevayà diyà te ki Jacob te, “Penines ka ne halin ka ziyà te Betel ne ziyè ka ubpà. Ne vaal ka ziyà te pemuhatà para kediey, kes Megbevayà he mibpaahà kenikew zengan dutun te timpu he ebpeleǥuyan nu is kakey nu he si Esau.”
Umbe migkeǥiyan ni Jacob is tivuuk he pemilya zin wey is langun he menge sakup din te, “Ipenimbag niw is menge ed-ezapen niw. Mebpenlumpiyu kew te keugelingen niw ne ilisi niw is bisti niw. Ne edhendiyè kiw te Betel; ne ebaal a zutun te pemuhatà ne ed-ezapen ku is Megbevayà he midtavang kedì te menge kelised ku, wey miduma kedì minsan hendei a ebpevayà.” Ne haazà is menge ed-ezapen dan wey menge eritis, imbeǥey zan ki Jacob ne inleveng din diyà te sihung te kayu he ulayan diyà te uvey te Shekem. Ne hein migenat en dutun ensi Jacob, mibpengelinteuwan te Megbevayà he mahandek is menge meǥinged te menge siringan dan he inged, umbe wazè dan mezal-as ensi Jacob.
Nekeuma ensi Jacob wey is menge zuma zin diyà te inged he Luz he egngezanan daan he Betel ziyà te tanà he Canaan. Ne mibeelan din dutun is pemuhatà. Iyan inngazan din dutun he lugar is El Betel, he ke và dà egkeǥiya, “Megbevayà te Betel,” su hein mibpeleǥuyan din is kakey zin he si Esau, dutun mebpaahà kandin is Megbevayà.
Ne zutun, minatey si Debora he mid-uyamu zengan ki Rebeka. Ne ziyà ileveng sikandin te sihung te kayu he ulayan he ziyà te alug te Betel. Egngezanan haazà he kayu he Alon Bacut, he ke và egkeǥiya, “kayu he midsineǥawan.”
Ne zutun te timpu he nekeulì ensi Jacob he ebpuun te Padan Aram, mid-uman en maan mebpaahà is Megbevayà diyà te kandin, ne mibpenubtuvazan din si Jacob. 10 Migkeǥiyan sikandin te Megbevayà te, “Jacob is ngazan nu, puun guntaan ne kenè en maan Jacob is igngazan kenikew, kekenà, Israel en.” Umbe Israel en is ngazan ni Jacob.
11 Ne mid-uman megkaǥi is Megbevayà diyà kandin te, “Iyan a sikan is Mekeǥeǥehem he Megbevayà. Edhimuwen ku he mevuwad ka. Egkehimu ka he kepuun te sevaha he nasyun wey te mezakel he menge nasyun, ne egkehimu he hadì is duma he menge kevuwazan nu. 12 Heini is tanà he imbeǥey ku ziyà te ki Abraham wey ziyà te ki Isaac, ibeǥey ku zaan kenikew wey ziyà te menge kevuwazan nu.” 13-14 Ne mid-awà is Megbevayà dutun te tanà he zutun mebpekidlalag ki Jacob. Ne impelastar ni Jacob dutun is batu. Mid-itisan din te vinu wey lana su wey mehimu he segradu. 15 Ne haazà is tanà, migngezanan ni Jacob te Betel, he ke và egkeǥiya, “baley te Megbevayà.”
16 Ne mid-awà ensi Jacob dutun te Betel duma is pemilya zin. Meǥaan dutun ed-anak si Raquel. Ne te wazè dan pa mekeuma ziyà te inged he Efrat ne ebeliliten en si Raquel su ed-anak. Ne utew sikandin midlised. 17 Ne zutun te egkeseǥunsun en is belilit, migkaǥi is mengunguyamu te, “Kenè ka meseeng su maama en maan is id-anak nu.” 18 Ne hein edluwèluwe en te ǥehinawa si Raquel, migngezanan din is anak din ki Ben Oni. Piru migngezanan mulà ni Jacob haazà is batà ki Benjamin. 19 Ne mibpatey zutun si Raquel ne ziyè dan ileveng te uvey te zalan pehendiyà te inged he Efrat. (Ne haazà is inged he Efrat ne iyan guntaan inged he Betlehem.) 20 Ne zuen batu he impelastar ni Jacob diyà te leveng ni Raquel, ne taman en guntaan kemulu pa egketuusi is leveng ni Raquel tenged dutun.
21 Ne midlaus pa medhipanew ensi Jacob ne ziyà dan med-ubpà te tanà he ziyà dapit te inged he Migdal Eder. 22 Ne zutun te timpu he kemulu pa ed-ubpà ensi Jacob dutun, midhulizan ni Reuben is esawa te amey zin he si Bilha. Hein netuenan haazà ni Jacob, utew sikandin nepauk.
Is menge Anak ni Jacob he menge Maama
(1 Cronica 2:1, 2)
Duen 12 he menge anak ni Jacob. 23 Is menge anak din diyà te ki Lea ne iyan si Reuben, is kakey, ne sunud si Simeon, si Levi, si Juda, si Isacar, wey si Zebulun. 24 Is menge anak din diyà te ki Raquel, ne iyan si Jose wey si Benjamin. 25 Is menge anak din diyà te ki Bilha, sikan is suluǥuen ni Raquel he vahi, ne iyan si Dan wey si Naftali. 26 Is menge anak din diyà te ki Zilpa, sikan is suluǥuen ni Lea he vahi, ne iyan si Gad wey si Asher. Iyan heini sikandan langun menge anak ni Jacob he maama he in-anak diyà te inged he Padan Aram.
27 Mid-ulì si Jacob diyà te amey zin he si Isaac he ziyà te Mamre he uvey te inged he Kiriat Arba (he iyan daan Hebron). Iyan haazà mid-ubpaan dengan ni Abraham wey ni Isaac. 28 Is keluǥayad te untung ni Isaac 180 he tuig. 29 Meǥurang en utew sikandin te kebpatey zin, ne in-amur sikandin te menge kepuun din he nemematey en. Inleveng sikandin te menge anak din he si Esau wey si Jacob.