37
1 Ne ziyà med-ubpà si Jacob te tanà he Canaan he iyan daan sikan is tanà he mid-ubpaan dengan te amey zin he si Abraham. 2 Iyan heini guǥud mehitenged te pemilya ni Jacob:
Hein 17 is penuiǥen ni Jose, mid-uǥup en sikandin te menge kakey zin te kebantey te menge uyaǥen. Haazà he menge kakey zin, ne menge anak ni Bilha wey ni Zilpa he menge esawa te amey zin. Ebpenudtulen ni Jose ziyà te amey zin mezaat he menge ulaula te menge kakey zin.
3 Ne si Jacob, edhuna is kebmahala zin ki Jose kenà haazà is duma he menge anak din, su ǥeina te meǥurang en sikandin te kegkeetew ni Jose. Umbe mibpetehìan din si Jose te meupiya he visti wey melayat. 4 Ne hein nesavut te menge kakey ni Jose he mibmahal si Jose te amey zan, kenà sikandan, nepeukan dan si Jose ne layun en memesakit he lalag dan emun ebpekidlalag dan kandin.
5 Sevaha he kezukileman neketeǥeinep si Jose. Hein midtudtul zin haazà is teǥeinep din diyà te menge kakey zin, ne mid-iseg is kegkepeuki zan kandin. 6 Su iyan heini midtudtul zin diyà te menge kakey zin, ke sikandin te, “Neteǥeinep ku 7 he zutun te ziyè kiw te vevesukà is ebpemagkes te ǥinarab, ne netekewtekew kiw te zuen binagkes ku he mid-enew he midhitindeg he midlingutan duen te keniyu he menge vinagkes su edtahud dan.” 8 Migkaǥi haazà is menge suled din te, “Hengkey? Egkehimu ka edhadì wey ebayàbayà kenami?” Umbe mid-iseg pa is kegkepeuki zan ki Jose.
9 Ne nekeuman si Jose meketeǥeinep ne midtudtul zin en maan diyà te menge kakey zin. Ke sikandin te, “Nekeuman a meketeǥeinep, neehè ku is andew, vulan, wey 11 he menge vituen he edtahud kedì.” 10 Midtudtul zaan ni Jose haazà is teǥeinep din diyà te amey zin piru midsawey sikandin te amey zin. Migkaǥi is amey zin te, “Hengkey, mama, is ibpesavut nu? Egkehimu ve he siak wey is iney nu wey is menge suled nu ne ebpekepevayàbayè key kenikew?” 11 Ne utew neepesi si Jose te menge suled din, piru si Jacob mulà mid-isip-isip din heini he menge hitavù.
12 Sevaha zutun he andew, midhendiyà is menge kakey ni Jose te Shekem su ebpemepenabtab te menge uyaǥen te amey zan. 13 Ne zutun, migkeǥiyan ni Jacob si Jose te, “Is menge kakey nu ne ziyà te Shekem su ebpemepenabtab dan te menge uyaǥen tew. 14 Hendiyè ka wey nu melauy ke meupiya ve is egkeulaula te menge kakey nu wey te menge uyaǥen, ne meǥaan ke zà likù kayi wey a metudtuli kenikew.” Midtavak si Jose te, “Uya, amà.”
Umbe, puun dutun te Hebron, midhendiyà si Jose te Shekem. 15 Ne hein diyè en sikandin is edriǥuriǥu ziyà te unayan, duen etew he nenginginsà kandin ke hentei is ebpen-ahaan din. 16 Midtavak si Jose te, “Ebpen-ahaan ku is menge kakey ku. Netuenan ve ke hendei zan ebpemepenabtab?” 17 Migkaǥi haazà is etew te, “Mid-awè dan en kayi. Nezineg ku he ebpehendiyè kun sikandan te Dotan.” Ne midtelukun si Jose ziyà, ne neturedu zin sikandan diyà te Dotan.
18 Hein malù pa meziyù si Jose is ebpelingguma, ne naahà sikandin te menge suled din, ne mibpelenuwan dan en sikandin te edhimatey. 19 Ke sikandan te, “Heeyan en kes meneneǥeinep is ebpelingguma. 20 Kuwa kew en su edhimetayan tew sikandin, ne id-ulug tew sikandin kayi te vudsi he punduwà te wahig. Egkeǥiyen tew zà he midhimetayan sikandin te dumezaas he langgam. Ed-ahaan te kun be ke metuman is menge teǥeinep din.” 21 Ne hein nezineg heini ni Reuben is pelanu, egkesuatan din he edluwasen din si Jose. Ke sikandin te, “Kenè tew edhimetayan. 22 Iulug niw zà sikandin te vudsi kayi te sibsivayan, kenè niw sikandin himetayi.” Umbe migkaǥi heini ni Reuben su wey zin melibri si Jose wey zin ikeulì diyà te amey zan.
23 Ne hein nekeuma si Jose ziyà te kandan, migewezan dan ne midluwas dan sikan is bisti ni Jose he nepurung mezeyzeyani 24 ne intimbag dan sikandin diyà te vudsi he punduwà te wahig. Ne haazà is budsi ne wazè din taǥù he wahig.
25 Ne te egkaan sikandan, ne zuen dan nepantew he ebpemelingguma he nigusyanti he menge Ismailihanen he ebpuun diyà te Gilead. Duen menge kemilyu zan he migkergahan dan te menge penaket, bawì, wey menge perehemut he ed-uwiten dan diyà te Ehipto. 26 Migkeǥiyan ni Juda haazà is menge suled din te, “Hengkey is egkepupulus tew ke edhimetayan tew is hazi tew he id-eles tew is kedhimetayi tew kandin? 27 Deyzey pa vuwa ke ibelegyè tew sikandin keniyan te menge Ismailihanen. Kenè tew edhimetayan su hazi tew man sikandin.” Ne mid-uyunan haazà te menge suled din.
28 Hein midsaǥad haazà is menge nigusyanti he tig-Midian, mibatun dan si Jose puun dutun te vudsi, ne imbelegyè dan sikandin te 20 he vuuk he pelata. Ne mid-uwit dan si Jose ziyà te Ehipto.
29 Ne hein midlikuan ni Reuben haazà is budsi ne wazè en dutun si Jose, ne mibindas din is bisti zin su utew neseeng. 30 Ne zutun, midlikù sikandin diyà te menge suled din he egkaǥi te, “Wazè en dutun kes hazi tew. Ebmenmenu ad be te ked-ulì ku ziyà te ki amà?”
31 Midhimatey sikandan te kambing ne midlupit dan te lengesa is bisti ni Jose. 32 Ne mid-uwit dan is bisti ni Jose ziyà te amey zan, migkaǥi sikandan te, “Neehè dey heini. Ahaa kun heini, ki Jose ve heini etawa kenà.” 33 Nekilala ni Jacob haazà is bisti. Ke sikandin te, “Kumbalà heeyan ni Jose. Midhimetayan sikandin te kumekaid he langgam! Siguradu he mibpurungan sikandin deesi te langgam.” 34 Ne mibindas ni Jacob is bisti zin ne mibivisti te saku he tuus te kegkeseeng din. Neuǥet is kedlalew zin te anak din. 35 Midhendutun te kandin is langun he menge anak din su edlenganen dan, piru wazà maawà is kegkeseeng din. Ke sikandin te, “Beleǥaza ad keniyu! Iyan ibpatey ku is kegkeseeng ku tenged te kebpatedany te anak ku.” Ne midsigudu en sikandin medsineǥew tenged ki Jose.
36 Ne mid-uwit si Jose te menge Midianhen diyà te Ehipto ne imbelegyè dan sikandin diyà te ki Potifar he sevaha he upisyal te hadì te Ehipto, he kepitan te menge vantey te turuǥan.