42
Midhendiyà is menge Suled ni Jose te Ehipto su Ebpemasa Zan te Keuyaǥan
Hein nezineg ni Jacob he zuen belegyà he egkeenen diyà te Ehipto, migkeǥiyan din is menge anak din he maama te, “Hengkey pa is edteǥazan niw? Nezineg ku he zuen kun egkeenen diyà te Ehipto. Hendiyè kew ne pemasa kew te egkeenen su wey kiw kenà mebpatey kayi te vitil.” Ne zutun midhendiyà te Ehipto is sepulù he kakey ni Jose su ebpemasa zan te egkeenen. Wazà ni Jacob ibpezuma si Benjamin is hazi ni Jose te menge kakey zin, su egkahandek si Jacob kela ke zuen mezaat he egkeulaula ki Benjamin.
Ne midhendiyà is menge anak ni Jacob te Ehipto, ne zuen menge zuma zan he ziyà te zuma he inged su ebpemasa zaan te egkeenen, su bitil en diyà te tivuuk he Canaan. Ne iyan si Jose gubirnedur te tivuuk he ǥinhedian te Ehipto, iyan sikandin ebelegyà te egkeenen diyà te tivuuk he menge meǥinged dutun. Ne zutun te kebpekeuma te menge kakey zin, midluhud dan diyà te etuvangan ni Jose he iyan kedtahud dan. 7-9 Ne zutun te naahà sikandan ni Jose, nekilala zin sikandan, piru henduen be te kenè din uvag egkengekilala ne midhenggeran din sikandan ne ke sikandin te, “Hendei kew ebpuun?” Ne midtavak dan te, “Diyè key ebpuun te Canaan, ne midhengkayi key su ebpemasa key te egkeenen.” Ne netenuzan din is menge teǥeinep din mehitenged kandan ne ke sikandin diyà te kandan te, “Teruen kew! Umbe midhendini kew su ed-ahaan niw is kebpekesavuk dey wey niw metueni ke egkezaag key keniyu!”
10 Ne midtavak dan te, “Es! Es! Kenà iyan, datù, su sikami is menge suluǥuen nu, iyan dey zà inhendini is kebpemasa te egkeenen. 11 Su menge anak key pudu te sevaha zà he etew. Kenè key teruen su sikami is menge suluǥuen nu, kenà iyan dey inhendini is kebpeniid!” 12 “A, teruen kew iyan,” ke si Jose, “su midhendini kew wey niw iyan maahà is kebpekesavuk dey wey niw metueni ke egkezaag key keniyu.” 13 Ne midtavak dan te, “Sikami, datù, is menge suluǥuen nu, ne sepulù key wey zezuwa he menge anak te sevaha zà he etew. Diyè pa is amey zey te Canaan. Diyà daan te kandin is hazi zey. Duen pa sevaha he hazi zey he minatey en.”
14 Ne midtavak si Jose te, “Tutuu ves iyan he kebpeniid dà is inhendini niw. 15 Egezaman ku sikiyu wey ku metueni ke tutuu ve is migkaǥi niw. Idsesapè ku he mintras uuyag pa is hadì te Ehipto ne kenè kew ebpekaawà kayi emun kenà edhendini is hazi niw. 16 Kinahanglan he ebpeveyaan te sevaha keniyu is hazi niw. Is duma keniyu ne ebpirisuwen ku su egezaman ku sikiyu wey ku metueni ke teruen kew. Su emun kenà tutuu is migkaǥi niw ne egketuenan ku he tutuu ves iyan he iyan inhendini niw is kebpeniid.” 17 Ne mibpirisu zin sikandan taman te tetelu he andew.
18 Ne zutun te iketelu he andew migkeǥiyan sikandan ni Jose te, “Duen ebpeveelan ku keniyu wey kew melibri su siak, edtahud a te Megbevayà. 19 Emun tutuu is migkaǥi niw, kinahanglan he itaǥak niw is sevaha keniyu te teltelesuled kayi ne ulì kew wey niw ikehated is egkeenen diyà te menge pemilya niw he egkengevitil. 20 Ne zumaha niw zini sikan is hazi niw su wey ku metueni he wazè kew medtarùtarù para kenè ku sikiyu ebpehimetayan.” Ne mibeelan dan haazà.
21 Ne pesikaǥi zan dutun te, “Umbe egkeulaula en heini kenitew su silut tenged te mid-ulaula tew ziyà te hazi tew he si Jose. Su minsan pa te utew sikandin nerasey wey midhengyuan kiw zin, midtengtengan tew zà ne wazè kiw mebpehangyù. Umbe edlised kiw en guntaan.” 22 Ne migkaǥi zutun si Reuben te, “Migkeǥiyan ku zengan sikiyu te, ‘Kenè niw pesipelahi is hazi tew? Piru wazè kew mebpemineg kedì. Umbe edsilutan kiw en guntaan tenged te kemetayen din.’ ” 23 Wazè dan metueni he egkesavut ni Jose is egkeǥiyen dan, su emun ebpekidlalag sikandin kandan ne zuen tigseysey zin. 24 Mid-awà dèpa si Jose ziyà te kandan su edsineǥew. Ne netetegteǥaad ne midlikù sikandin ne mid-uman mebpekidlalag kandan. Ne zutun mibpilì din si Simeon dutun te kandan ne impevakus din diyà te etuvangan dan.
25 Ne midsuǥù ni Jose is menge suluǥuen din he penua zan te keuyaǥan is menge saku te menge kakey zin ne insuǥù din daan he ieles diyà te saku te kada sevaha is selapì he imbayad din dutun, ne insuǥù din daan he veǥayi sikandan te lutù para te ked-ulì dan. Ne netuman is langun he insuǥù ni Jose. 26 Ne hein nepasad heini migkergahan dan is menge asnu zan te keuyaǥan, ne migenat dan.
27 Ne hein mezukilem en midhulavung dan diyà te sevaha he lugar. Ne mibengkasan te sevaha kandan is saku zin su ibpekaan din is asnu zin ne neehè din is selapì he imbayad din. 28 Ne migkeǥiyan din is menge suled din te, “Inlikù is imbayad ku! Su neketaǥù kayi te saku ku.” Ne zutun mibpengguyaan sikandan langun is mibpengulbaan. Mibpein-inseey sikandan te, “Hengkey vuwa heini is mid-ulaula te Megbevayà kenitew?”
29 Ne hein nekeulì dan diyà te amey zan he si Jacob he ziyà te Canaan midtudtulan dan sikandin te langun he neulaula kandan. Ke sikandan te, 30 “Sikan is gubirnedur he impevayàbayà te tivuuk he ginhedian, mid-eǥetan key zin he migkaǥi te iyan inhendiyè dey is kebpeniid kandan. 31 Piru midtavak dey sikandin te kenè key menge meniniid, ne tutuu is egkeǥiyen dey. 32 Migkaǥi key zaan he 12 key he teltelesuled he menge anak te sevaha zà he etew. Minatey is sevaha he hazi zey, ne ziyè ded mulà is sevaha te amey zey ziyà te Canaan. 33 Piru migkeǥiyan key zin te, ‘Egezaman ku sikiyu ke tutuu ve iyan is migkaǥi niw. Kinahanglan he itaǥak niw zini is sevaha keniyu ne ulì kew wey niw ikehated is keuyaǥan diyà te menge pemilya niw he egkengevitil. 34 Ne kinahanglan he edumahan niw is hazi niw kayi su wey ku metueni ke kenè kew teruen wey kenà kebpeniid dà is inhendini niw. Ne idlikù ku is sevaha he suled niw ziyan te keniyu, ne edtuǥutan ku sikiyu te kednigusyu zini te Ehipto.’ ”
35 Ne hein imbusbus dan is taǥù te menge saku zan neehè dan diyà te kada saku is selapì he imbayad te kada sevaha. Ne zutun te kegkaahaa ni Jacob wey is menge anak din te selapì dan ne utew zan migkulbai.
36 Ne migkaǥi si Jacob diyà te kandan te, “Pinaaǥi keniyu egkeewaan a te menge anak ku. Su minatey en si Jose, neewaan a ni Simeon, ne egkuwaan niw pe bes si Benjamin? Utew e en nerasey.” 37 Ne migkaǥi si Reuben diyà te amey zin te, “Amà, iyan e en metau ki Benjamin. Himetayi nu is menge anak ku he zezuwa emun kenè ku sikandin egkezuma te ed-ulì dini te kenikew.” 38 Piru midtavak si Jacob te, “Kenà egkehimu he ibpezuma ku keniyu si Benjamin. Minatey en is kakey zin ne iyan dà sikandin nesamà is sebsevaha. Kele ke zuen mezaat he egkeulaula kandin diyà te hipenawan, ne siak meǥurang e en, kela ke iyan ibpatey ku is kegkeseeng ku.”