46
Midhendiyà si Jacob te Ehipto
1 Ne zutun migenat si Jacob duma te pemilya zin, ne mid-uwit dan is langun he menge azen dan. Ne hein nekeuma zan diyà te Beersheba, mibpemuhat din is Megbevayà te amey zin he si Isaac. 2 Ne hein mezukilem, mibpaahà is Megbevayà ki Jacob. Ne mid-umew te Megbevayà si Jacob, ke sikandin te, “Jacob.” Ne midtavak si Jacob te, “Heini e zed.” 3 Ne ke sikandin te, “Megbevayà a; iyan a kes Megbevayà te amey nu. Kinahanglan he kenè ka mahandek he ebpehendiyà te Ehipto, su edhimuwen ku sikiyu he utew zekelà he nasyun. 4 Eduma a keniyu ke edhendiyè kew te Ehipto ne edhimuwen ku he mekeulì daan keuzemà is menge kevuwazan nu. Ne sikew, emun ebpatey ka ne iyan si Jose edleveng kenikew.”
5 Ne zutun, migenat en maan ensi Jacob he ebpuun te Beersheba, ne impeuntud dan sikandin te menge kerwahi he imbeǥey te hadì te Ehipto para kandin. Ne impeuntud dan daan is menge esawa zan wey menge anak dan. 6-7 Midtundan dan daan is langun he menge uyaǥen dan wey mid-uwit dan is menge ketiǥeyunan dan he nekuwa zan diyà te tanà he Canaan. Miduma ni Jacob pehendiyà te Ehipto is langun he menge kevuwazan din: is menge anak din wey menge apù din.
8 Iyan heini menge ngazan te menge Israilihanen he menge kevuwazan ni Jacob he midhendiyà te Ehipto:
si Reuben is kinekekayan he anak ni Jacob, 9 ne is menge anak he maama ni Reuben ne iyan si Hanoc, si Palu, si Hezron, wey si Carmi.
10 Is menge anak he maama ni Simeon iyan ensi Jemuel, si Jamin, si Ohad, si Jakin, si Zohar, wey si Shaul ne iyan heini anak ni Simeon pinaaǥi te vahi he tig-Canaan.
11 Is menge anak he maama ni Levi ne iyan si Gershon, si Kohat, wey si Merari.
12 Is menge anak he maama ni Juda ne iyan si Er, si Onan, si Shela, si Perez, wey si Zera (piru si Er wey si Onan, diyè dan dà mebpatey te Canaan), ne zuen menge anak ni Perez he si Hezron wey si Hamul.
13 Is menge anak he maama ni Isacar ne iyan si Tola, si Pua, si Jashub, wey si Shimron.
14 Is menge anak he maama ni Zebulun ne iyan si Sered, si Elon, wey si Jaleel.
15 Iyan heini menge anak wey menge apù ni Jacob he in-anak ni Lea ziyà te inged he Padan Aram. Ne 33 is langun he menge kevuwazan ni Jacob wazà lavet te anak din he vahi he si Dina.
16 Is menge anak he maama ni Gad ne iyan si Zefon, si Hagi, si Shuni, si Ezbon, si Eri, si Arodi, wey si Areli.
17 Is menge anak he maama ni Asher ne iyan si Imnah, si Ishva, si Ishvi, si Beria, wey is etevey zan he si Sera. Duen menge anak ni Beria he iyan si Heber wey si Malkiel.
18 Menge kevuwazan heini ni Zilpa, is suluǥuen he imbeǥey ni Laban diyà te anak din he si Lea. Ne heini is 16 ne menge kevuwazan ded daan ni Jacob.
19-20 Is menge anak he maama ni Jacob pinaaǥi te esawa zin he si Raquel ne iyan si Jose wey si Benjamin. Is menge anak ni Jose, ne si Efraim wey si Manase. Diyà sikandan ianak te Ehipto. (In-anak sikandan ni Asenat, sikan is anak ni Potifera he iyan memumuhat diyà te inged he On.)
21 Is menge anak he maama ni Benjamin ne iyan si Bela, si Beker, si Ashbel, si Gera, si Naaman, si Ehi, si Rosh, si Mupim, si Hupim, wey si Ard.
22 Iyan sikandan kes 14 he menge anak wey menge apù ni Jacob diyà te ki Raquel.
23 Is anak he maama ni Dan ne iyan si Hushim.
24 Is menge anak he maama ni Naftali ne iyan si Jaziel, si Guni, si Jezer, wey si Shilem.
25 Menge kevuwazan heini ni Bilha, sikan is suluǥuen he imbeǥey ni Laban diyà te anak din he si Raquel. Pitu sikandan he menge kevuwazan daan ni Jacob.
26 Is kezakel te menge anak wey apù ni Jacob he midhendiyà te Ehipto ne 66 langun, kenà ragkes is menge esawa te menge anak din. 27 Is menge anak he maama ni Jose he in-anak diyà te Ehipto, ne zezuwa. Ne 70 is langun he menge kevuwazan ni Jacob dutun te timpu te kedseled dan diyà te Ehipto.
28 Si Jacob, ne impehuna zin si Juda ziyà te ki Jose su wey ikepenurù kandin is ibayà pehendiyà te tanà he Goshen. Ne hein nekeume en ensi Jacob diyà te tanà he Goshen, 29 impaandam ni Jose is kerwahi zin, ne mid-untud sikandin su egenat te kedtelavuk te amey zin diyà te Goshen. Ne hein nekeuma si Jose migkepkepan din is amey zin ne utew neuǥet is kedsineǥew zin. 30 Ne migkaǥi si Jacob diyà te anak din he si Jose te, “Egkehimu en ke ebpatey a su neehè ku en he uuyag ke pa iyan.”
31 Ne migkaǥi zutun si Jose ziyà te menge suled din wey ziyà te langun he menge sakup te amey zin te, “Edhendiyà a te hadì su kinahanglan he edlelaǥan ku sikandin te, ‘Sikan is menge suled ku wey is langun he menge sakup te amey ku nekeuma zan en dini te kediey he ebpuun te ed-ubpaan dan diyà te Canaan.’ 32 Egkeǥiyan ku sikandin te, ‘Is menge maama, ne menge bekidu sikandan te menge uyaǥen, ne mid-uwit dan daan is langun he menge azen dan wey is langun he menge uyaǥen dan.’ 33 Ne emun ibpeumew kew te hadì ne ed-insaan kew zin ke hengkey is terebahu niw, 34 kinahanglan he medtavak kew, ke sikiyu te, ‘Sikami is menge suluǥuen nu, menge bekidu key; puun dà te kedekdekelè dey su iyan daan heini ulaula te menge ginikanan dey.’ ” Ne ke si Jose te, “Dutun edtuǥutan kew zin he ed-ubpà diyà te tanà he Goshen, su is menge Ehiptohanen utew zan egkeepesi is minsan hentei he menge bekidu te menge uyaǥen.”