1 Neuma is timpu he netudtulan si Jose he edezaru is amey zin he si Jacob. Umbe miduma zin is dezuwa he anak din he si Manase wey si Efraim ne midhendiyà dan te amey zin. 2 Hein netudtulan si Jacob he nekeuma is anak din he si Jose, midteǥel sikandin med-enew ne mibpinuu ziyà te hizeǥaan din. 3 Ne migkaǥi si Jacob diyà te ki Jose te, “Mibpaahà dengan kediey is Mekeǥeǥehem he Megbevayà diyà te inged he Lus he ziyà te Canaan ne zutun midtuvazan e zin. 4 Ke sikandin te, ‘Ebeǥayan ku sikew te mezakel he menge kevuwazan su wey ka mehimu he amey te mezakel he menge etew. Ne ibeǥey ku heini is tanà te Canaan diyà te menge kevuwazan nu, ne egkehimu heini he kandan te taman te taman.’ ”

5 Ne ke si Jacob en maan te, “Ne ǥuntaan, sikan is dezuwa he anak nu he maama he kayi ianak te Ehipto te wazè e pa mekeuma zini, ne egkeragkes sikandan te kediey he menge anak. Kediey en si Efraim wey si Manase, iring te menge anak ku zaan si Reuben wey si Simeon. 6 Ke zuen menge anak nu he wazè pa ianak ne kenikew mulà. Ke zuen menge kevuwazan dan ne elin ebpekepengevilin te menge azen he ebpuun ki Efraim wey ki Manase.”

7 Ne zutun migkaǥi pa maan sikandin te, “Egketenuzan ku is kebpatey te iney nu. Ebpuun key zengan diyà te Padan ne midhipanew key pehendiyà te tanà te Canaan. Hein uvey key en diyà te Efrat ne minatey sikandin, umbe ziyè ku zà sikandin ileveng te kilid te zalan pehendiyà te Efrat.” (Ne haazà is inged he Efrat ne iyan guntaan inged he Betlehem.)

8 Ne hein naahà ni Israel is dezuwa he anak ni Jose, mid-insà sikandin te, “Hentei heini?” 9 Ne midtavak si Jose te, “Iyan en heini, amà, sikan is menge anak ku he imbeǥey kediey te Megbevayà.” Ne migkaǥi si Israel te, “Ipeuvey nu sikandan kayi su wey ku sikandan mepenubtuvazi.” 10 Egkezeetan en dutun is menge mata ni Israel su utew en sikandin meǥurang, ne tenged dutun henduen te kenè en sikandin ebpekaahà, umbe impeuvey ni Jose is menge anak din diyà te ki Israel. Ne midhezekan wey migkepkepan sikandan ni Israel. 11 Ne migkaǥi si Israel ziyà te ki Jose te, “Kunaan ku zengan ke kenè ku en sikew egkaahà, piru ǥuntaan intuǥut te Megbevayà he kenà iyan ke zà neehè ku, kekenà, elin daan is menge anak nu.”

12 Ne migkuwa ni Jose is menge anak din he midsekepu ni Israel, ne midlangkeb sikandin he iyan kedtahud din te amey zin. 13 Ne zutun impeuvey en maan ni Jose is menge anak din diyà te apù dan su wey mepenubtuvazi sikandan. Ne ziyà si Efraim te egkekewanan ni Jose, ne si Manase ziyà te egkeǥivang ni Jose. 14 Ne si Israel, impedlambid din is menge velad din ne ingkawè din is kewanan he velad din ne indampè din te purù ni Efraim minsan pa te iyan si Efraim hazi. Ne is givang he velad din indampè din diyà te purù ni Manase he iyan sikan is kakey. 15 Ne zutun mibpenubtuvazan din sikandan ke sikandin te,

17 Ne hein naahà ni Jose he indampè te amey zin is kewanan he velad din diyà te purù ni Efraim, wazè din haazà mesuati umbe migewezan din is kewanan he velad te amey zin su wey iyan din mezampà is purù ni Manase. 18 Migkaǥi si Jose te, “Amà, kenà haazà hustu. Su iyan heini kakey; kinahanglan he iyan nu sikandin edempaan te kewanan.” 19 Piru midtavak is amey zin te, “Uya, mama, netuenan ku. Is menge kevuwazan ni Manase egkehimu he egkevantug ded daan he menge etew. Piru egkelewanan sikandin ni Efraim su egkehimu he utew bentuǥan is menge kevuwazan din, ne egkehimu sikandan he mezakel he menge grupu te menge etew.” 20 Umbe midhimu zin he lavew si Efraim ki Manase. Ne zutun he andew, mibpenubtuvazan din sikandan he egkaǥi te, “Egemiten te menge Israilihanen is menge ngazan niw te kebpenuvadtuvad. He egkaǥi te, ‘Berakat he tuvazi kew te Megbevayà he iring ki Efraim wey ki Manase.’ ”

21 Ne zutun migkaǥi si Israel ziyà te ki Jose te, “Meǥaan en is kebpatey ku, iyan, edumahan kew zed te Megbevayà, ne ibpeulì din ded keuzemà is menge kevuwazan tew ziyà te tanà he mid-ubpaan te menge kepuun tew. 22 Ne sikew Jose is ebpekepenunud te Shekem kenà is menge suled nu. Heeyan he lugar ne naaǥew ku te kebpekidtebek ku te menge Amorihanen.”