Habakuk
1
Iyan heini menge lalag te ebpeneuven he si Habakuk he impahayag te Nengazen diyà te kandin.
Is Nehuna he Riklamu ni Habakuk
Migkaǥi si Habakuk te, “He Nengazen, taman te keenu is kebuyù ku te tavang diyà te kenikew he zutun ebpemineg ke en human kedì? Keenu key kenikew edlibriya ziyà te menge etew he mibpesipala kenami? Maan is impeehè nu pa kediey heini is kezeetan wey kegubut? Minsan hendei ne egkeehè ku is inhimetayà, kebpepespesipelahà, kedtebek, wey kebikilan. Umbe, nehimu he wazè en pulus te kesuǥuan; wazè en ul-ulaha is hustu he kukuman su is menge etew he nekesalà, ne iyan ebpekezaag diyà te hukmanan ne kenà iyan is wazà mekesalà. Umbe nevulegkù en is hustu he kukuman.”
Is Tavak te Megbevayà ki Habakuk
Midtavak is Megbevayà, “Purungi niw ahaa is egkehitavù diyà te menge nasyun ne egkeinuinu kew te egkeehè niw. Su zuen ebeelan ku ziyà te timpu niw he kenè niw egketuuwan minsan duen pa kayi edtudtul ziyà te keniyu. Su edhimuwen ku he gemhanan is menge tig-Babilonia. Heini he menge etew, utew memesipala ne kenè ne egkesanggen he edsurung diyà te zuma he menge nasyun su wey zan maaǥew is menge lugar he kenà kandan. Igkikinehendekà sikandan te menge etew. Ebeelan dan ke hengkey is egkesuatan dan ne wazà ebpekeeǥen kandan. Is menge kudè dan, meǥaan pa te langgam he liyupardu wey mesipala pa te dumezaas he asu he ebpen-ahà te egkekaan din emun mezukilem. Ebpelelaǥuy heini puun te meziyù he menge lugar, he henduen be te edlayang he kulaǥu he andam he edagmang te edewiyen din. Ebpekeuma is grupu te menge sundaru zan he andam he ebpesipala. Iring heini te mevandes he keramag he ebpuun diyà te edsilaan. Is menge vihag dan iring kahabet te pantad. 10 Bà dan dà edsudia is menge hadì wey menge pengulu. Ne và dan dà ed-engiti is kada vinerengbeng he inged, su ebpekeliyu zan kayi pinaaǥi te kedtambù te tanà diyà te kilid te verengbeng, ne zutun egkaaǥew zan haazà is inged. 11 Ne kegkepasad dutun ne egenat sikandan he henduen dà te keramag he midsaǥad. Heini sikandan, nekesalà, su wazà duma he migkilala zan he Megbevayà, kekenà, iyan dà is kebpekegaga zan.”
Is Ikezuwa he Riklamu ni Habakuk
12 Migkaǥi si Habakuk te, “He Nengazen, Megbevayè ka puun te nehuna. Iyan ka waǥas he Megbevayè ku ne wazè nu kemetayen. He Nengazen he iring te endilungà he vatu, mibpilì nu is menge tig-Babilonia te kedsilut kenami. 13 Geina te metazeng ka, ne kenè nu egkaantus is kedtengteng te kelelalung wey kegubut. Piru maan is mibey-anan nu zà is meluiven he menge tig-Babilonia? Maan is intuǥut nu he mezèdeeti zan is menge etew he emun idhindeg kandan ne edhuna sikandan he lalung? 14 Midhimu nu is menge kuntada zan he iring te menge isdà he wazè dan pengulu he edlavan kandan. 15 Midlipeylipey is menge tig-Babilonia zutun te kebihaǥa zan te menge kuntada zan he henduen dà te menge isdà he midhingutel zan pinaaǥi te vunuwit etawa puket. 16 Ne tenged te mahabet is nevihag dan, midalig dan is keugelingen dan tenged te kebpekegaga zan; iring sikandan te mengingisdà he mibeǥayan din te zengeg is bunuwit din etawa puket din pinaaǥi te kedtutung te veyewà he pemuhat para kayi he menge azen. Su pinaaǥi te vunuwit din etawa puket din ne midsepian sikandin ne egkekaan din is metaam he menge keenen he egkesuatan din te egkaan. 17 Tenged kayi Nengazen, ebpedayun en be sikandan te wazà hizu he kebpemihag dan wey kebpendezaat diyà te menge nasyun?”