1 Midhendiyà is belinsuǥuen te Nengazen te Bokim he ebpuun te Gilgal. Ne migkeǥiyan din is menge Israilihanen te, “Impeǥawas ku sikiyu puun te Ehipto, ne mid-uwit ku sikiyu kayi he tanà te impenaad ku ziyà te menge kepuun niw. Ne migkaǥi a zengan he kenè ku edèdeetan is kebpekid-uyun ku keniyu. 2 Migkaǥi a zaan he kenè kew pekid-uyun te menge etew kayi he tanà, kekenà, pemengkaǥa niw is menge pemuhatè dan. Iyan, hengkey is mibeelan niw? Wazà a keniyu pezumdumahi! 3 Umbe ǥuntaan, kenè ku sikandan edsegseǥen puun te tanè niw. Ne egkeiring sikandan te zuǥi ziyà te ibayè niw, ne sikan is ebpen-ezapen dan egkehimu he zekelà he penggezam keniyu.”

4 Ne hein nezineg haazà te menge Israilihanen, nemekesineǥew sikandan. 5 Umbe, migngezanan dan haazà is lugar te Bokim. Ne mibpemuhat dan is Nengazen dutun.

6 Duen te kebpeǥenata ni Josue te menge Israilihanen, ne migenat dan ne mid-angken is kada sevaha kandan dutun te tanà he para kandan. 7 Nenilbi sikandan te Nengazen hein uuyag pa si Josue. Wey minsan hein minatey en si Josue mibpedayun gihapun sikandan he ebpenilbi te Nengazen dutun te uuyag pa sikan is ebpemendumala he nemekaahà te langun he egkein-inuwan he mibeelan te Nengazen para te Israel. 8 Minatey is anak ni Nun he si Josue he suluǥuen te Nengazen te keǥurang he 110 he tuig. 9 Inleveng sikandin diyà te tanè din diyà te Timnat Heres, diyà te vuvungan te Efraim he egkezizaya te Buntud he Gaash.

10 Ne hein nemematey en is menge etew zutun he lapis te kevuwazan, nekeilis is sunud he lapis te kevuwazan he wazà mekekilala te Nengazen wey wazè dan hanew ke hengkey is mibeelan te Nengazen para te Israel. 11 Mibaal te mezaat diyà te etuvangan te Nengazen is menge Israilihanen wey mid-azap dan is ledawan te ed-ezapen he si Baal. 12 Mid-iniyuǥan dan is Nengazen, he Megbevayà te menge kepuun dan, he iyan mibpeǥawas kandan diyà te Ehipto. Midsunud dan wey mid-azap dan is nekedseselekawà he ebpen-ezapen te menge etew he nekeelingkus kandan. Mibeelan dan is igkepauk te Nengazen. 13 Su mid-iniyuǥan dan sikandin ne nenilbi zan ki Baal wey ki Ashtarot. 14 Ne tenged te pauk te Nengazen te menge Israilihanen, mibey-anan din sikandan he surunga te menge tulisan he egkuwa te menge azen dan. 15 Emun ebpekidtebek sikandan, ibpepildi sikandan te Nengazen, sumalà is migkaǥi zin. Umbe utew zan midlised.

16 Mibeǥayan te Nengazen is Israel te menge pengulu he edlibri kandan te menge tulisan he edsurung kandan. 17 Piru wazè dan pemineǥa is menge pengulu zan. Kekenà, mid-iniyuǥan dan is Nengazen ne mid-azap dan is duma he menge ed-ezapen. Kenè dan iring te menge kepuun dan su utew zà melemu ziyà te kandan is ked-iniyug te menge suǥù te Nengazen he midtuman mulà dengan te menge kepuun dan. 18 Is langun he menge pengulu he imbeǥey te Nengazen kandan ne midtevangan te Nengazen. Ne mintras uuyag pa is menge pengulu zan pedayun is kedlibriya kandan te Nengazen puun te menge kuntada zan. Su nehizuwan din sikandan dutun te kedag-es dan tenged te menge kemeresayan dan te kedèdaaǥa wey kebpesipelahi kandan. 19 Iyan, emun ebpatey en is pengulu zan, ne edlikuan dan en maan is daan he vaal zan wey edhuna pa is kandan he kebaal te salà te menge kepuun dan. Nenilbi zan wey mid-azap dan is duma he menge ed-ezapen ne wazè dan engkezi is mezaat he menge vaal wey is kebmesinupaken dan.

20 Umbe, utew sikandan nepeuki te Nengazen. Migkaǥi is Nengazen te, “Tenged te midrapas kayi te menge etew is midhimu ku ziyà te menge kepuun dan he kebpekid-uyun kandan, wey wazè e zan pezumdumahi, 21 kenè ku en edsegseǥen is menge etew he nesamà dutun te tanà he wazà mesakup ni Josue zutun te uuyag pa sikandin. 22 Egemiten ku heini he menge etew te kegezam te menge Israilihanen ke edtumanen dan be is menge suǥù ku, iring te mibeelan te menge kepuun dan.” 23 Umbe, wazà petuluy segseǥa te Nengazen haazà is nesamà he menge etew wey wazè din ituǥut he mezaag sikandan ni Josue.