2
Is Ikezuwa he Kegezami ki Job
Ne sevaha he andew, midtiǥum en maan is menge velinsuǥuen diyà te etuvangan te Nengazen, ne midtampu zaan kandan si Setanas. Migkaǥi is Nengazen diyà te ki Setanas te, “Hendei ka ebpuun?” Midtavak ni Setanas is Nengazen te, “Midriǥuriǥu a ziyà te kelibutan.” Migkaǥi is Nengazen diyà te kandin te, “Neseǥipè nu ve is suluǥuen ku he si Job? Wazà iring kandin diyà te kelibutan. Metazeng sikandin wey wazà igkesawey kandin. Midtahud e zin wey ebpeninguhà he kenà mekevaal te mezaat. Wazà maawà is kegkemepezumdumahan din kedì minsan pa ke impepesipelahan nu sikandin kedì te wazà hinungdan.” Midtavak si Setanas te, “Edewaten te etew is kegkehanew te langun he ziyà te kandin basta meuyag sikandin. Piru emun iyan en sikandin ebpesekitan nu ne siguradu ebpenrewakan ke zin.” Migkaǥi is Nengazen diyà te ki Setanas te, “Sigi, beeli nu is egkesuatan nu te ebaal ziyà te kandin, piru kenè nu sikandin himetayi.” Umbe, migenat si Setanas puun diyà te etuvangan te Nengazen ne mibpesekitan din si Job pinaaǥi te menge levag he nenuvù puun diyà te igiek din taman te ulu zin. Ne migkuwa si Job te keving te ziniyun he neǥevà ne ingkaǥis din haazà duen te menge levag din dutun te ebpinuu sikandin te avu. Migkaǥi is esawa zin te, “Ibpedayun nu ve ǥihapun is kegkemepezumdumahan nu te Megbevayà? Penrewaki nu sikandin wey ka mebpatey en!”
10 Midtavak si Job te, “Wazà pulus keniyan te egkeǥiyen nu. Su kinahanglan he kenà iyan te zà edewaten diyà te Megbevayà is meupiya, kekenà, elin ta edewaten is mezaat.”
Minsan pa te iyan haazà nehitavù ki Job piru wazà sikandin mekesalà pinaaǥi te kegkaǥi te mezaat.
Is Tetelu he Emiǥu ni Job
11 Duen tetelu he emiǥu ni Job he iyan en si Elifas he tig-Teman, si Bildad he tig Shua, wey si Zofar he tig-Naama. Hein nezineg dan is langun he kelised he nehitavù diyà te ki Job, neuyun dan he edhendiyè dan te kandin su eduyuǥan dan wey edlenganen dan. 12 Ne hein nepantew zan sikandin ne hapit dan kenà egkekilala. Midlelendag sikandan wey mibpemindas dan is bisti zan ne mibukbukan dan te eliyavuk is ulu zan su ibpeehè dan is kegkeseeng dan. 13 Ne mibpinuu zan diyà te tanà duma ki Job seled te pitu he andew wey pitu he kezukileman. Wazè dan mebpekidlalag kandin su neehè dan he utew merasey is nehitavù kandin.