1 “Job, minsan ebpetavang ke pa, ne wazà edtavang kenikew. Minsan is menge velinsuǥuen, kenà edtavang kenikew. 2 Is pauk wey kesina, edhimatey te tulebung he etew he wazè din ketau. 3 Sumalà te nepeniizan ku, egkehimu he ed-uswag is ked-ubpà te tulebung, piru edtik-awan edrewaki te Megbevayà is pemilya zin. 4 Is menge anak din, ne wazà egkepeveyaan dan he ebpekelibri kandan, ne wazà edlavan kandan diyà te hukmanan. 5 Is menge abut din, ragkes en is menge veǥas te pinemula zin he nenuvù duma te zuǥiyen he zezeisey he kayu, ebpenguwaan te menge etew he egkengevitil. Ne is menge ketiǥeyunan din egkuwaan te menge etew he utew egkesuat te ketiǥeyunan. 6 Is kelised wey kemereǥenan ne wazà medtuvù diyà te tanà, kekenà, 7 iyan ibpekebmereǥen te etew is rimeǥas te mezaat he vaal zin; iring heini te igmuk he ebpekelayang diyà te zivavew te hapuy.

8 “Emun iyan a sikew, edangep a ziyà te Megbevayà ne ibpeehè ku kandin is kebpekesavuk ku. 9 Su ebaal sikandin te egkengein-inuwan he menge vaal he kenà egkesavut wey kenà egkevilang. 10 Ebpeuzanan din heini is kelibutan su wey mewehiǥi is menge pemuleey. 11 Ebpeketikangen din is menge egkeayuayu, ne edlibriyen din is egkengeseeng. 12 Edezeetan din is menge pelanu te limbungan he menge etew, su para kenà sikandan mebmezeeǥen. 13 Iyan dà idhingutel zin te memetau is kegkelimbungan dan, wey id-awè din is ebpekezezaat he pelanu te limbungan. 14 Egkerusireman sikandan minsan maandew. Ebpekepenamsam dan su minsan meudtu ne henduen be te egkezukileman sikandan. 15 Edlibriyen te Megbevayà is menge egkengaayuayu te kemetayen wey te kedezaat te gehemanen he menge etew he edaagdaag kandan. 16 Umbe, duen egkeperateng te menge egkengaayuayu, piru kenà mulà ibpelampus te Megbevayà is menge lalung.

17 “Deyzey is etew he edtulizen te Megbevayà is betasan din. Umbe kenè nu isipa he mezaat is kebmensuwa kenikew te Mekeǥeǥehem he Megbevayà, 18 su is ebpelian din, ne edtembaran din; ne is ebpesekitan din, ne ebewian din wey meulii. 19 Layun ke zin edlibriya te vangkit wey kezeetan. 20 Edlibriyen ke zin te kemetayen emun timpu te vitil etawa tebek. 21 Iyan sikandin metau para kenà mekezezaat kenikew is kebpekezeeta kenikew te zuma he etew, ne wazà igkahandek nu emun egkehitavù is bangkit. 22 Ed-engitan nu zà is kezeetan wey vitil, ne kenè ka egkahandek te zumezaas he langgam, 23 su kenè en heini egkaid kenikew. Ne kenè ke en egkereǥenan he ebpemula ziyà te vetuwen he vevesukè nu. 24 Ebpekesiguru ka he meupiya is kebpekesavuk te pemilya nu, wey wazà egketazin he uyaǥen nu. 25 Ebmahabet is menge kevuwazan nu ne egkeiring kahabet te menge sagbet diyà te tanà. 26 Ebmeluǥayad is untung nu ne kenè ka ebpatey te kenè pa hustu he timpu. 27 Sumalà te nesusi zey, ne tutuu heini is langun. Umbe pemineǥa nu heini wey ul-ulaha nu.”