1 Ne midtavak si Elifaz is tig-Teman te, 2 “Hengkey ves is igketavang te etew ziyà te Megbevayà? Minsan is metau he etew, kenà ebpeketavang kandin. 3 Egkepenunuat nu ve is Mekeǥeǥehem he Megbevayà emun metazeng ka? Duen be egkekuwa zin diyà te kenikew emun wazà igkesawey kenikew? 4 Edewayen ka wey edhukuman te Megbevayà kenà tenged te kedtehuza nu kandin, 5 kekenà, tenged te utew en subra is kelelalung nu ne kenè ke en ed-engked he ebaal te salà. 6 Egkuwaan nu is bisti te iring nu he etew su ibpesandè nu tenged te utang din kenikew. 7 Wazè nu veǥayi te wahig is egkemezahan, wey wazè nu veǥayi te keenen is egkevitil. 8 Egemiten nu is kegkemekeǥeǥehem nu wey is kezekelà te zengeg nu wey ka mekaangken te tanà. 9 Emun ebpekitavang diyà te kenikew is balu he menge vahi, ibpeulì nu sikandan he wazè dan uwiten. Wey elin daan is menge ilu wazè nu purungi etura. 10 Iyan heeyan hinungdan ke maan is ebpeliǥuyan ka te menge litag, wey egkeumahan ka te egketik-ew he kegkahandek. 11 Umbe, egkerusireman ka ne kenè ke en ebpekaahà, wey egkelapew ke en te zalem.

12 “Is Megbevayà, ne ziyà te kinetikangan he langit, lavew pa te kinetikangan he menge vituen. 13 Umbe, egkaǥi ka te, ‘Wazà metueni te Megbevayà is ebeelan ku. Ne kenè e zin egkehukuman su neelangan sikandin te kivel. 14 Netembunan sikandin te mekepal he menge ǥapun, umbe kenè kiw zin egkaahà ke edhiphipanew sikandin diyà te zivavew te langit.’

15 “Ebpedayun ke ve he ed-ikul te vetasan he neuǥet en he edsunuzen te lalung he menge etew? 16 Nepenggevuan is untung dan; iring sikandan te pundasyun te valey he naanud te zalem. 17 Migkeǥiyan dan is Mekeǥeǥehem he Megbevayà te, ‘Bey-ani key en kenikew! Su wazè nu egkehimu kayi te kenami!’ 18 Piru iyan is Megbevayà mibpenù te menge valey zan te meupiya he menge vutang. Umbe emun duen idsambag kayi te lalung he menge etew, ne kenè ku ebpemineǥen.

19 “Emun egkaahà te metazeng wey wazà mekesalà he menge etew is kegkezeeti te lalung he menge etew, egkelipey zan wey ed-engitan dan sikandan. 20 Ke sikandan te, ‘Nezeetan is menge kuntada tew, ne migkaan te hapuy is ketiǥeyunan dan.’

21 “Job, pesakup ka te Megbevayà wey pekidhusey ka kandin su wey ke zin penubtuvazi. 22 Dewata nu is menge penurù din wey tepiza nu ziyà te ǥehinawa nu is menge lalag din. 23 Emun ebpekid-uliey ka te Mekeǥeǥehem he Megbevayà, wey id-awè nu is kelelalung he ziyà te pemilya nu, ne idlikù din is meupiya he kebpekesavuk nu. 24 Kenè nu dekelaa ziyà te ǥehinawa nu is ketiǥeyunan nu, kekenà, isipa nu is menge vulawan nu he wazà utew pulus su iring dà te pantad etawa menge vatu ziyà te wahig. 25 Ne iyan egkehimu he ketiǥeyunan nu is Mekeǥeǥehem he Megbevayà. Iring sikandin te waǥas he vulawan wey selapì para kenikew. 26 Ne zutun egkeǥezaman nu is kelipey he ebpuun diyà te Mekeǥeǥehem he Megbevayà, ne kenè ka egkeeled he ed-uvey ziyà te kandin. 27 Ampù ka ziyà te kandin ne ebpemineǥen ke zin, wey tumana nu is menge saad nu ziyà te kandin. 28 Ne ke hengkey is ebpelenuwen nu te ebaal ne egketuman heini, wey ebmerayag is beyeey nu. 29 Emun duen etew he edluyahan, ne emun id-ampù nu ziyà te Megbevayà he lig-eni sikandin, ne edtevangan din haazà is etew. 30 Minsan is menge etew he ebpekesalà, edlibriyen din pinaaǥi te ketazeng nu.”