1 “Nenangdù a he kenè ku ebpezumahan te arig is kedtengteng ku te menge raǥa. 2 Su hengkey man is bales he ibeǥey te Mekeǥeǥehem he Megbevayà diyà te langit te ebeelan te etew? 3 Kenè be kezeetan wey vangkit is para te ebaal te mezaat? 4 Netuenan te Megbevayà is langun he ebeelan ku. 5 Emun midtarùtarù a wey nenlimbung a, 6 ne zeyzey ke edhukuman a te Megbevayà. Su egketuenan din emun ebpekesalà a. 7 Emun wazà a med-ikul te hustu he zalan su iyan ku mibpezumdumahan is iveg te menge mata ku, wey midremerikan ku is keugelingen ku, 8 deyzey ke egkengezeetan is menge pinemula ku etawa zeyzey ke zuma he etew is ebpekekaan kayi. 9 Emun netintal a te vahi etawa neeriǥan a te esawa te zuma ku he meǥinged, 10 deyzey ke egkuwaan etawa edhulizen te senge memaama is esawa ku. 11 Su is kebpekivahi, mekeeled-eled he salà, ne ereg he edsilutan is ebaal zuen. 12 Iring heini te hapuy he ebpekeigmuk su ebpekezezaat heini te langun he azen ku.

13 “Emun wazè ku veliya is ketenged te menge suluǥuen ku zutun te kedriklamu zan kayi te kedì, 14 hengkey is egkehimu ku emun edhukuman a te Megbevayà? Hengkey is idtavak ku ke ed-imbistigahan e zin? 15 Kenè be is Megbevayà he mibaal kedì iyan daan mibaal te menge suluǥuen ku?

16 “Emun wazà a medtavang te menge pubri wey valu he menge vahi he edlised, 17 wey mibpeleleǥed a te keenen diyà te menge ilu, deyzey ke edsilutan a te Megbevayà. 18 Piru puun pa te vatè e pa ed-eturen ku en is menge ilu; seled te tivuuk he untung ku wazè ku vey-ani is menge valu he vahi. 19 Emun duen etew he egkeehè ku he egkerasey te kegkeǥenew su kurang sikandin te visti, 20 ne ebeǥayan ku te visti he para te meǥenew he vineelan puun te vulvul te menge kerehidu ku. Ne ebpeselamat sikandin kayi te kedì te ebpuun diyà te ǥehinawa zin. 21 Emun mibpesekitan ku pinaaǥi te velad ku is ilu, su ǥeina te zuen ku ǥehem diyà te hukmanan, 22 ne zeyzey ke metamped is belad ku. 23 Kenè ku egkehimu heeyan he menge vaal su igkahandek ku is silut wey ǥehem te Megbevayà.

24 “Wazà a medsarig te ketiǥeyunan ku; wazè ku isipa he iyan heini ebpekeveǥey kedì te kesiguruwan. 25 Wazà a mebpegalbu tenged te zekelà he ketiǥeyunan ku wey te langun he menge azen he naangken ku. 26 Wazè ku ezapa is andew he merayag is kedsilè din wey is bulan he mekaayam-ayam is kedwaleng din. 27 Wazà mevulug metaǥù diyà te ǥehinawa ku is ked-azap kayi. 28 Emun tutuu he mibeelan ku heini he menge salà ne ereg a he edsilutan su midluivan ku is Megbevayà diyà te langit.

29 “Wazè ku ikelipey is kegkezeeti te menge kuntada ku etawa kebpekebmereǥen dan. 30 Wazà a mebaal te salà pinaaǥi te kedrewaki ku kandan. 31 Wazà nevitil ziyà te pemilya ku. 32 Wazè ku ikesuat ke minsan hendei zà duen mekehizeǥà is menge langyew su ebirtu is baley ku para kandan. 33 Wazè ku ieles is menge salè ku iring te ebeelan te zuma. 34 Wazà a mebpereremek dà wey med-eles tenged te kegkahandek te egkeǥiyen te menge etew.

35 “Emun duen pezem ebpemineg kedì! Guntaan, andam a he ebpirma te kemetuuzan he wazè ku salà. Emun duen igkesumbunga kedì te Mekeǥeǥehem he Megbevayà, egkesuat a he keǥiya zin kedì, ne emun kenà ne isurat din. 36 Su ibpikit ku heini ziyà te pemenayen etawa ziyà te ulu ku he iring te kuruna su ibpeehè ku he andam a he ed-etuvang kayi. 37 Egkeǥiyan ku is Megbevayà te langun he ebeelan ku. Ed-etuvang a ziyà te kandin he iring te pengulu he wazà meeled.

38 “Emun mezaat is kegemita ku te tanè ku etawa midtakew ku heini ziyà te zuma, 39 etawa mibeǥayan ku te mezaat he ǥehinawa is nemenerebahu ziyà te tanè ku su migkuwa ku is menge abut dan he wazè ku sikandan beyazi, 40 ne zeyzey ke iyan edtuvù diyà te tanè ku is dezeisey he kayu wey menge sagbet ne kenà iyan is trigu wey barli.”

Kayi metapus is menge lalag ni Job.