1 Ne hein naaǥew en te tivuuk he keet-etawan te Israel haazà is tanà, midtiǥum sikandan is langun diyà te Shilo, ne mibaal sikandan te Tulda he Edtelevukaayan dan. 2 Duen pa pitu he tribu te menge Israilihanen he wazè pa meveǥayi te kandan he vahin duen te tanà. 3 Umbe, migkaǥi si Josue ziyà te menge Israilihanen te, “Keenu niw pe bes ed-engkena is tanà he imbeǥey keniyu te Nengazen he Megbevayà te menge kepuun niw? 4 Pilì kew te tigtetelu he etew ziyà te kada tribu niw. Ibpesusi ku kandan is tivuuk he tanà su para mesevuki zan te tuus is egkesuatan dan te ed-angken. Ne edlikù sikandan kayi te kediey he ed-uwit te vineelan dan he mapa he egkeehè ta zutun ke ebmenmenuwen heini te kebahin. 5 Kinahanglan he ebehinen haazà is tanà te pitu he vahin. Kenà idragkes is tanà te tribu ni Juda ziyà te zivavà wey is tanà te menge tribu ni Jose ziyà te zizaya. 6 Isurat niw is menge zulunà duen te pitu he vahin he tanà, ne uwita niw kayi te kediey, su edripahan ku heini ziyà te etuvangan te Nengazen he Megbevayè tew. 7 Piru kenè mulà ebehinan te tanà is menge Levihanen su iyan kandan he vahin is kebpenilbi te Nengazen pinaaǥi te kegkememumuhat dan. Is menge tribu ni Gad, ni Reuben, wey ketengà he tribu ni Manase nekezawat en te kandan he vahin diyà te tanà he zapit te edsilaan te Jordan, he imbeǥey kandan ni Moises te suluǥuen te Nengazen.”

8 Ne hein egenat en sikan is nepilì he menge etew, migkaǥi si Josue ziyà te kandan te, “Susiya niw is tanà ne vaal kew te mapa zin. Ne likù kew zini te kediey kayi te Shilo, su edripahan ku heini ziyà te etuvangan te Nengazen ke hentei ki tribu is egkevehinan te kada vahin dutun te tanà.” 9 Umbe, migenat haazà is menge etew te kedsusi zuen te tanà. Ne mibaal zan te mapa kayi he ebpaahà he pitu he vahin haazà is tanà. Ne inlista zan is dezekelà wey malù dezekelà he menge inged he nesakup te kada senge vahin. Ne kegkepasad dutun midlikù dan diyà te ki Josue ziyà te Shilo. 10 Ne pinaaǥi te kedripa mibeǥayan ni Josue te kandan he vahin is menge tribu te Israel he wazè pa kandan he tanà.

11 Is nehuna he neveǥayan pinaaǥi te kedripaha zuen te tanà iyan is tribu ni Benjamin. Is kandan he vahin nekepetug-elang te vahin te tribu ni Juda wey te menge tribu ni Jose. 12 Is dulunà kayi ziyà te zizaya ne puun te Wahig he Jordan, ne mibpehendiyè te zizaya he vahin te Jerico, pehendiyà en te menge vuvungan diyà te edsenlepan taman te sibsivayan te Bet Aven. 13 Ne puun dutun ebpehendiyà heini te zivavà he kelendiǥan te Luz (he iyan is Betel), ne mibpetupang heini ziyà te Atarot Adar, diyà te vuntud he ziyà te zivavà he vahin te alug he Bet Horon. 14 Puun dutun, ebpehendiyà heini te zapit te edsenlepan te vuntud he ebpekesinaru te Bet Horon diyà te zivavà. Midsangkù heini ziyà te Kiriat Baal (he iyan is Kiriat Jearim), he sevaha he zekelà he inged te tribu ni Juda. Iyan heini zulunà diyà te edsenlepan.

15 Is dulunà diyà te zivavà ne puun te zulunà te Kiriat Jearim. Puun dutun ebpehendiyà heini te edsenlepan diyà te menge teheb diyà te Neftoa. 16 Mibpetupang heini ziyà te lugtenaan te vuntud he zehipag te Suǥud-suǥud he Ben Hinom he ziyà te zizaya he vahin te Suǥud he Refaim. Midlaus heini ziyà te Suǥud-suǥud he Ben Hinom, nekeikul te zivavà he kelendiǥan te inged te menge Jebusihanen, pelaus diyà te En Rogel. 17 Ne mibulegku heini pezizaya pehendiyà te En Shemesh, laus diyà te Gelilot he atbang te Beyeey te Adumim, ne mibpetupang diyà te Batu ni Bohan te anak ni Reuben. 18 Puun dutun nekevayà heini te zizaya he kelendiǥan he atbang te Araba, ne midtupang dutun mismu he suǥud. 19 Ne midtupang en maan diyà te zizaya he kelendiǥan te Bet Holga, ne midunggù diyà te zizaya he suyuk te Daǥat he Minatey, he iyan divavà he purù te Wahig he Jordan. Iyan heini zulunà diyà te zivavà.

20 Is Wahig he Jordan iyan dulunà diyà te edsilaan. Iyan heeyan menge zulunà te tanà he naangken te menge pemilya te tribu ni Benjamin.

21 Iyan heini zezekelà he menge inged he imbeǥey ziyà te tribu ni Benjamin he mibahin diyà te kada pemilya zan:

Jerico, Bet Hogla, Emek Keziz, 22 Bet Araba, Zemaraim, Betel, 23 Avim, Para, Ofra, 24 Kefar Amoni, Ofni, wey Geba: 12 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. 25 Ne elin ebpekeuman kayi is Gibeon, Rama, Beerot, 26 Mizpa, Kefira, Moza, 27 Rekem, Irpeel, Tarala, 28 Zela, Ha Elef, Jebus (he iyan Jerusalem), Gibea, wey Kiriat Jearim: ne 14 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.

Iyan heini nepengevilin te tribu ni Benjamin he mibahin diyà te kada pemilya zan.