2
Is Pemuhat he para Gasa
Emun duen ebpemuhat te pemuhat he para gasa te Nengazen, ne ǥemita zin is kineupiyahan he kelasi te herina, ne sehuǥi zin heini te lana wey veyewà. Uwita zin heini ziyà te menge memumuhat he menge kevuwazan ni Aaron. Ne edterinan te memumuhat haazà te sengekemkem he herina he midsehuǥan te lana, wey ragkes is langun he veyewà he insahug kayi he midtarin din, ne edtutungen din diyà te pemuhatà. Edtutungen din heini he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen. Is egkesamà dutun te herina, ne ǥaked ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.
Emun duen ebpemuhat te supas he midhilutù diyà te evuwan he pemuhat he para gasa, kinahanglan he iyan egemiten din is kineupiyahan he kelasi te herina he wazà tepayi. Egkehimu he ibpemuhat is mekepal he supas he midsehuǥan te lana etawa menipis he supas he midezasan te lana.
Emun is ibpemuhat he supas ne ziyà hilutua te mevavew he hilutuey, kinahanglan he iyan egemiten is kineupiyahan he kelasi te herina he edsehuǥan te lana, piru kenà edtepayan. Ebpenevien heini ne ed-itisan te lana. Pemuhat heini he para gasa.
Emun diyà edhilutua te karà is supas he ibpemuhat, kinahanglan daan he iyan egemiten is kineupiyahan he kelasi te herina ne edsehuǥan daan heini te lana.
Uwita heini he menge pemuhat diyà te memumuhat su wey zin ikepemuhat diyà te Nengazen duen te pemuhatà. Edterinan heini te memumuhat, ne haazà is tinarin din edtutungen din diyà te pemuhatà he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen. 10 Ne is samà dutun te pemuhat, ne ǥaked en ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.
11 Is langun he pemuhat he para gasa he ibpemuhat diyà te Nengazen kinahanglan he wazè din tapey, su kenè kew engayan he edtutung te tapey etawa teneb dutun te kebpemuhata niw te Nengazen te pemuhat pinaaǥi te hapuy. 12 Egkehimu ke ibpemuhat niw is tapey etawa teneb he iring te kebpemuhata niw te egkehuna he sebpet niw, piru kenà heini ereg he edtutungen diyà te pemuhatà. 13 Timusi niw is langun he menge pemuhat niw he para gasa, su is timus, simbulu te wazà pidtemanan he kebpekid-uyun niw te Megbevayà. Timusi niw is langun he menge pemuhat niw.
14 Emun ibpemuhat niw is egkehuna he sebpet niw he iyan gasa he ibeǥey niw ziyà te Nengazen, pemuhat kew te ginaling he menge trigu he midsandag. 15 Sehuǥi niw heini te lana wey veyewà. Pemuhat heini he para gasa. 16 Edtutungen te memumuhat is duma zuen te ginaling he midsehuǥan te lana, wey is langun he veyewà he insahug duen te ginaling he para te kedtentenuzi te Nengazen. Pemuhat heini pinaaǥi te hapuy para te Nengazen.