1 Iyan heini menge sulunuzen mehitenged te pemuhat he vayad te salà. Segradu utew heini he pemuhat.

2 Is pemuhat he vayad te salà edlepaan diyà te lepeey te pemuhat he edtutungen. Ne is lengesa kayi ibpirik diyà te peliǥuy te pemuhatà. 3 Pudu ibpemuhat is tavà kayi: is melambù he ikug, is menge tavà diyà te seled te getek, 4 is menge vuwà ragkes is menge tavà kayi, wey is deisey he vahin te atey. 5 Heini is langun edtutungen te memumuhat diyà te pemuhatà he pemuhat pinaaǥi te hapuy para te Nengazen. Pemuhat heini he vayad te salà. 6 Ebpekekaan te egkesamà kayi he pemuhat is langun he maama ziyà te pemilya te menge memumuhat, piru kinahanglan he ziyè dan heini egkeena te segradu he lugar, su utew heini segradu. 7 Ebpeked-iring dà is sulunuzen mehitenged te pemuhat he para idlumpiyu wey te pemuhat he vayad te salà: is usa kayi he menge pemuhat gaked en te memumuhat he nemuhat kayi. 8 Is lundis te uyaǥen he pemuhat he edtutungen ne ǥaked daan te memumuhat he nemuhat duen. 9 Iring daan te langun he menge pemuhat he para gasa, he midhilutù diyà te evuwan etawa karà etawa mevavew he hilutuey, ne ǥaked en daan heini te memumuhat he nemuhat duen. 10 Is langun he menge pemuhat he para gasa, he midsehuǥan te lana etawa wazà, ne ǥaked en daan te menge kevuwazan ni Aaron ne purungi zan heini bevehina.

11 Iyan heini menge sulunuzen mehitenged te pemuhat he para te meupiya he kedepità te Nengazen:

12 Emun ebpemuhat is etew te pemuhat para te meupiya he kedepità su ebpeselematan din is Nengazen, ne perisi zin heini te supas. Med-uwit sikandin te supas he wazè din tapey iring te supas he mekepal he midsehuǥan te lana, supas he menipis he midezasan te lana, wey supas he iyan mibeelan is meupiya he kelasi te herina he midsehuǥan te lana. 13 Ne gawas keniyan, med-uwit daan sikandin te supas he zuen din tapey. 14 Mebpemuhat sikandin te tigselimbaha ziyà te kada kelasi kayi he supas he gasa ziyà te Nengazen. Ne ǥaked en heini te memumuhat he mibpemirik te lengesa he pemuhat he para te meupiya he kedepità. 15 Is usa te uyaǥen he pemuhat he para te kebpeselamat diyà te Nengazen, kinahanglan he egkeenen te nemuhat wey te pemilya zin wey te menge memumuhat dutun dà te andew te kebpemuhata kayi; kinahanglan he wazà egkesamà kayi zutun te sunud he andew.

16 Emun is pemuhat din para te meupiya he kedepità he ibpemuhat din he para te kedtuman te penaad etawa pemuhat he keugelingen din he suat, is usa kayi egkeenen dutun dà he andew te kebpemuhata zuen. Iyan, emun duen pa egkesamà he usa, egkehimu heini he egkeenen dutun te sunud he andew. 17 Ne emun duen pa maan egkesamà he usa taman te iketelu he andew, kinahanglan en he edtutungen heini. 18 Emun duen egkaan duen te usa zutun te iketelu he andew, ne haazà he pemuhat kenà edewaten te Nengazen ne wazà pulus te kebpemuhata zuen. Ed-isipen heini he utew mezaat ne zuen televaken te minsan hentei he egkaan kayi. 19 Emun ebpekezegkit is usa ziyà te minsan hengkey he mid-isip he meremerik, ne kenè ne heini ereg he egkeenen, ne edtutungen en heini. Is minsan hentei he ed-isipen he lumpiyu, egkehimu he egkaan kayi. 20 Piru is minsan hentei he ed-isipen he meremerik he egkaan kayi te usa he para te Nengazen, ne heeyan he etew kenè niw en isipa he zuma niw. 21 Emun duen ebpezegkit dutun te minsan hengkey he ed-isipen he meremerik, iring te meremerik he menge vutang te etew, etawa meremerik he langgam, etawa minsan hengkey he meremerik, ne egkaan sikandin te usa kayi he pemuhat he para te Nengazen, ne heeyan he etew kenè niw en isipa he zuma niw.

22 Midsuǥù te Nengazen si Moises 23 he keǥiya zin heini ziyà te menge Israilihanen:

Kenè kew kaan te tavà te vaka, kerehidu, etawa kambing. 24 Is tavà te langgam he ebpatey zà etawa nepatey te zuma he langgam egkehimu he egemiten niw ziyà te minsan hengkey he egemitan niw zuen, piru kenè niw keena. 25 Is minsan hentei he egkaan te tavà he egkehimu he ibpemuhat diyà te Nengazen he pemuhat pinaaǥi te hapuy, ne kenè niw en isipa he zuma niw. 26 Minsan hendei kew ed-ubpà, ne kenè kew megkaan te lengesa te langgam ragkes en is lengesa te tagbis. 27 Is minsan hentei he egkaan te lengesa, ne kenè niw en isipa he zuma niw.

28 Mid-uman medsuǥù is Nengazen ki Moises 29 he keǥiya zin heini ziyà te menge Israilihanen:

Is minsan hentei he ebpemuhat te pemuhat he para te meupiya he kedepità, kinahanglan he mebeǥey sikandin te vahin kayi he pemuhat diyà te Nengazen he iyan ebpekezawat duen is menge memumuhat. 30 Heini he pemuhat, ne uwita zuen te ebpemuhat diyà te pemuhatà. Uwita zin is tavà wey is kumeng duen te uyaǥen, ne ivayew zin sikan is kumeng diyà te etuvangan te Nengazen su pemuhat he ibayew. 31 Edtutungen duen te memumuhat sikan is tavà diyà te pemuhatà, piru sikan is kumeng, ne ǥaked en ni Aaron wey te menge kevuwazan din he menge memumuhat. 32-33 Is kewanan he vuvun duen te uyaǥen ne ibeǥey ziyà te memumuhat he nemuhat te lengesa wey tavà kayi. 34 Ibeǥey te Nengazen is kumeng wey is buvun te pemuhat niw ziyà te menge memumuhat he si Aaron wey is menge kevuwazan din. Iyan heini vahin he edewaten dan diyà te keniyu taman te taman.

35 Iyan haazà bahin te menge pemuhat pinaaǥi te hapuy he para te Nengazen, he ibahin diyà te ki Aaron wey te menge kevuwazan din dutun te andew te kebpehinunguza kandan, su wey zan mekepenilbi te Nengazen pinaaǥi te kegkememumuhat dan. 36 Dutun he andew te kedhimuwa te menge memumuhat he menge memumuhat, midsuǥù te Nengazen is menge Israilihanen he iveǥey zan haazà he vahin he para te menge memumuhat, para kandan haazà taman te taman, ne tumana zan heini wey te peleebuten he kevuwazan dan.

37 Iyan haazà menge sulunuzen mehitenged te pemuhat he edtutungen, pemuhat he para gasa, pemuhat he para idlumpiyu, pemuhat he vayad te salà, pemuhat he para te kedhimuwa te memumuhat he memumuhat, wey pemuhat he para te meupiya he kedepità. 38 Menge sulunuzen heini he imbeǥey te Nengazen diyà te ki Moises diyà te sibsivayan he ziyà te Buntud he Sinai, hein midsuǥù din is menge Israilihanen te kebpemuhat diyà te kandin.