1 Hein ikewalu he andew he iyan kegkepasad te kedhimuwa ki Aaron he memumuhat, impetawag ni Moises si Aaron wey sikan is menge anak din he maama, wey is menge edumala te menge Israilihanen. 2 Migkeǥiyan ni Moises si Aaron te, “Kuwa ka te sevaha he turiti he vaka wey sevaha he meemahan he kerehidu he pudu wazè din sazir, ne ipemuhat nu ziyà te Nengazen. Is baka, pemuhat he para idlumpiyu, ne is kerehidu, pemuhat he edtutungen. 3 Ne keǥiyi nu is menge Israilihanen he megkuwa zan te meemahan he kambing he pemuhat he para idlumpiyu. Wey megkuwa zan daan te vaka wey kerehidu he pudu tig senge-tuig pa is keǥurang he wazè din sazir he pemuhat he edtutungen. 4 Megkuwa zaan sikandan te vaka wey meemahan he kerehidu he pemuhat dan para te meupiya he kebpekidepità. Ipemuhat dan heini zuma zuen te pemuhat he para gasa he midsehuǥan te lana, su ǥuntaan he andew ibpaahà te Nengazen is kebpekiduma zin keniyu.”

5 Umbe, mid-uwit dan diyà te egkesineruwan duen te Tulda he Edtelevukaayan is langun he insuǥù kandan ni Moises he uwita zan. Mid-amur-amur zan is langun diyà te etuvangan te Nengazen. 6 Migkaǥi si Moises diyà te kandan te, “Midsuǥù kew te Nengazen te kebaal kayi te kebpemuhat su wey zin ikepezayag diyà te keniyu is gehem din.” 7 Ne migkeǥiyan din si Aaron te, “Uvey ka ziyà te pemuhatà ne ipemuhat nu is pemuhat he para idlumpiyu wey is pemuhat he edtutungen su wey ka mevelukasi wey is pemilya nu puun te menge salè niw. Ne sumalà te insuǥù te Nengazen, ipemuhat nu zaan is pemuhat te menge etew su wey zan mevelukasi puun te menge salè dan.”

8 Umbe, mid-uvey si Aaron duen te pemuhatà ne midlapè din sikan is turiti he vaka he pemuhat he para idlumpiyu kandin. 9 Is lengesa kayi mid-uwit te menge anak din diyà te kandin, ne intiyuk din is tezù din dutun te lengesa, ne impirik din heini ziyà te menge sungeysungey te menge suyuk duen te pemuhatà. Is nesamà he lengesa in-itis din diyà te zizalem duen te pemuhatà. 10 Midtutung din diyà te pemuhatà is menge tavà, is menge vuwà, wey is deisey he vahin te atey, sumalà te insuǥù te Nengazen ki Moises. 11 Is usa wey is lundis kayi midtutung din diyà te ǥawas te kampu. 12 Ne midlapà daan ni Aaron sikan is uyaǥen he pemuhat he edtutungen. Is lengesa kayi, mid-uwit te menge anak din diyà te kandin, ne in-itis din heini ziyà te peliǥuy zuen te pemuhatà. 13 Mid-uwit dan daan diyà te kandin sikan is sinapù he uyaǥen ragkes is ulu kayi, ne midtutung din heini ziyà te pemuhatà. 14 Midlùluan din is menge parti he ziyà te seled te ǥetek wey is menge paa, ne midtutung din diyà te pemuhatà duma te zuma he parti zuen te uyaǥen.

15 Ne kegkepasad dutun mid-uwit din is menge pemuhat te menge etew. Midlapè din sikan is kambing, ne impemuhat din para melumpiyuwi is menge etew iring duen te mibeelan din diyà te pemuhat he para melumpiyuwi sikandin. 16 Ne mid-uwit din daan sikan is uyaǥen he pemuhat he edtutungen diyà te teliwazà, ne impemuhat din heini sumalà te paaǥi te kebpemuhata kayi. 17 Mid-uwit din daan is pemuhat he gasa ziyà te teliwazà. Midtarin sikandin dutun te sengekemkem, ne midtutung din diyà te pemuhatà he in-uman duen te pemuhat he edtutungen kada meselem.

18 Midlapà daan ni Aaron sikan is baka wey sikan is meemahan he kerehidu he para te menge etew he pemuhat he para te meupiya he kedepità. Is lengesa kayi mid-uwit te menge anak din diyà te kandin, ne impirikpirik din heini ziyà te peliǥuy zuen te pemuhatà. 19 Is menge tavà kayi he menge uyaǥen, is melambù he ikug, is menge tavà diyà te seled te ǥetek, is menge vuwà, wey is deisek he menge parti te menge atey, 20 in-untud te menge anak ni Aaron diyà te menge kumeng duen te menge uyaǥen. Ne midtutung ni Aaron sikan is menge tavà diyà te pemuhatà. 21 Sumalà te insuǥù ni Moises, imbayew ni Aaron is menge kumeng wey is kewanan he menge vuvun duen te menge uyaǥen su pemuhat haazà he ibayew.

22 Ne hein nepasad ni Aaron haazà is langun, imbayew zin is menge velad din dutun te ked-ampù din para te menge etew. Ne mibpenaug sikandin puun duen te pemuhatà. 23-24 Ne midseled si Moises wey si Aaron duen te Tulda he Edtelevukaayan. Ne hein migawas sikandan, mibpenubtuvazan dan is menge etew. Ne impezayag te Nengazen is gehem din diyà te menge etew pinaaǥi te kebpevulus te hapuy he mid-amin medtutung te menge pemuhat diyà te pemuhatà. Ne hein naahà heini te menge etew, nemengulahì dan tenged te kegkelipey, ne midluhud dan te ked-azap te Nengazen.