1 Midsuǥù te Nengazen si Moises 2 he keǥiya zin heini ziyà te tivuuk he keet-etawan te Israel:

Pengungubpaan kew he segradu su waǥas a is Nengazen he Megbevayè niw. 3 Kinahanglan he edtehuzen niw is iney niw wey amey niw, wey kinahanglan he tumana niw is ebpeveelan ku keniyu zutun te Andew te Kedhimeley. Iyan a kes Nengazen he Megbevayè niw.

4 Kenè kew med-azap te zuma he menge ed-ezapen wey kenè kew mebaal te ledawan te zuma he ed-ezapen. Iyan a kes Nengazen he Megbevayè niw.

5 Emun ebpemuhat kew te pemuhat para mehimu he meupiya is kebpekidepitè niw kedì, ipemuhat niw heini te paaǥi he egkezawat ku heini para keniyu. 6 Keena niw is usa kayi zutun te andew te kebpemuhat niw etawa sunud he andew. Piru emun duen egkesamà he usa taman te iketelu he andew kinahanglan he edtutungen heini. 7 Emun egkeenen niw heini te iketelu he andew ne kenè ku heini edewaten su utew mezaat heini. 8 Is minsan hentei he egkaan kayi ne zuen din televaken su ebpendezeisayen din is para kediey, umbe haazà he etew kenè niw en isipa he zuma niw.

9 Emun edraǥun kew ne kenè niw emina te edraǥun is diyà te kilid te pemuleey niw, ne kenè niw en likui pekirerawa is nengesamà. 10 Iring ded dutun is beeli niw ziyà te pemuleey niw te paras, kenè niw en likui wey kuwaa is nengeulug. Teǥaka niw en heeyan para te menge pubri wey te menge lumelengyawà. Iyan a kes Nengazen he Megbevayè niw.

11 Kenè kew mebpenakew, medtarùtarù, etawa medlimbung te iring niw he etew.

12 Kenè kew penangdù te tarù he egemiten niw is ngazan ku, su emun ebeelan niw heeyan ne ebpeel-elezan a keniyu. Iyan a kes Nengazen.

13 Kenè niw limbungi wey tekawi is iring niw he etew. Kenè niw lenglengani te edsuhul is etew he impeterebahu niw.

14 Kenè niw keǥiyi te mezaat is bengel, wey kenè kew medsavuk te egkesipà diyà te ibayà te lakap. Tumana niw heini su ibpekilala niw is kedtehuza niw kedì. Iyan a kes Nengazen.

15 Kinahanglan he meketezenganen wey hustu is kedhukum niw ziyà te hukmanan; kinahanglan he wazè niw ibpelavi, sepian etawa pubri.

16 Kenè kew ituk te zuma niw he etew. Kenè kew vaal te minsan hengkey he ebpekezezaat te untung din. Iyan a kes Nengazen.

17 Kenè niw dumuti is duma niw he etew. Dewaya niw sikandin emun nekesalà sikandin su para wazè niw televaken. 18 Kenè kew penimales etawa dumut te zuma niw he etew, kekenà, mahala niw sikandin iring te kebmahala niw te keugelingen niw. Iyan a kes Nengazen.

19 Tumana niw is menge sulunuzen he ibpesunud ku. Kenè niw pepeniwelayi is sevaha he uyaǥen te selakew en he kelasi te uyaǥen. Kenè kew pemula te zezuwa he kelasi te venì diyà te sevaha zà he pemuleey. Kenè kew sul-ub te sevaha he visti he zezuwa he kelasi te manggad.

20 Emun is sevaha he maama ebpekidhilavet te sevaha he uripen he vahi he ed-esewaan en te sengememaama, piru heini is bahi wazè pa mevelukasi te kegkeuripena kandin etawa wazè pa meveǥayi te vayàbayà, kinahanglan he edsilutan sikandan. Piru kenà sikandan edhimetayan su kenè pe man ebpekevayàbayà haazà is bahi. 21-22 Kinahanglan he med-uwit sikan is maama te meemahan he kerehidu ziyà te ǥemawan te Tulda he Edtelevukaayan he vayad te salè din. Pinaaǥi te kebpemuhata te memumuhat dutun te kerehidu ziyà te etuvangan ku, egkevelukasan haazà is maama te salè din ne ebpeseyluwen ku sikandin.

23 Emun ebpekeuma kew en diyà te tanà he ibeǥey ku keniyu, kenè niw keena is beǥas te kayu he ibpemula niw zutun te egkehuna he tetelu he tuig. Isipa niw heini he meremerik. 24 Dutun te ikeepat he tuig, is langun he veǥas kayi ihalad niw kayi te kedì he idalig kedì, umbe kenè niw zaan heini keena. 25 Piru te ikelima he tuig ne ebpekekaan kew en te menge veǥas kayi. Ne emun edtumanen niw heini he sulunuzen, utew meveǥas is menge kayu niw. Iyan a kes Nengazen he Megbevayè niw.

26 Kenè kew kaan te usa he zuen din pa lengesa.

Kenè niw veeli is ebeelan te menge kineegmanen etawa veyilan.

27 Emun idlalew niw is minatey kenè niw tempezi is bulvul niw ziyà te kada tengkilizan te ulu niw etawa sumpè niw, 28 wey kenè niw zaan pelii is lawa niw. Wey kenè kew zaan mebpepatik. Iyan a kes Nengazen.

29 Kenè niw peel-elezi is menge anak niw he vahi pinaaǥi te kebpeǥesa niw kandan te kebelegyà te zengeg dan, su ebpekeiniyat heini, ne utew ebmahabet diyà te lugar niw is ed-ulaula kayi.

30 Tumana niw is ebpeveelan ku keniyu zutun te Andew te Kedhimeley, ne tehuza niw is lugar he zutun a keniyu ed-ezapa. Iyan a kes Nengazen.

31 Kenè kew zangep diyà te menge veyilan he ebpekidlalag te gimukud te nemematey en, su emun ebeelan niw heini ed-isipen kew he meremerik. Iyan a kes Nengazen he Megbevayè niw.

32 Tehuza niw is menge meǥurang, wey tehuza a zaan keniyu is Megbevayè niw. Iyan a kes Nengazen.

33 Kenè niw temudmuzi is kenà menge Israilihanen he ed-ubpà duma keniyu. 34 Irerepengan niw sikandan, wey mahala niw sikandan iring te kebmahala niw te keugelingen niw, su umuuliey kew zaan dengan diyà te Ehipto. Iyan a kes Nengazen he Megbevayè niw.

35 Kenè kew limbung diyà te kedtimbang niw, kedtakes niw, etawa kedsukud niw. 36-37 Gemita niw is hustu he timbangan, tekesà, wey sukud.

Iyan a kes Nengazen he Megbevayè niw he mibpeǥawas keniyu ziyà te Ehipto. Tumana niw is langun he menge sulunuzen he ibpesunud ku wey menge suǥù ku.