1 Kenè kew mebaal te menge ed-ezapen iring te ledawan, tedeman he vatu, etawa mibpurma he vatu, he ed-ezapen niw, su iyan a is Nengazen Megbevayè niw.

2 Tumana niw is ebpeveelan ku keniyu zutun te Andew te Kedhimeley wey tehuza niw is lugar he zutun a keniyu ed-ezapa. Iyan a kes Nengazen.

3 Emun edtumanen niw is menge sulunuzen he ibpesunud ku wey menge suǥù ku, 4 ebpeuzanan ku sikiyu zutun te hustu he timpu su wey mebeǥey te sebpet is tanà ne ebpekepemeǥas is menge kayu. 5 Egkehimu he utew zekelà is sebpet niw ne minsan is timpu te kegunas niw te menge pungu ebpekeuma pa taman te kebpenrupù te beǥas te menge paras, ne is timpu te kebpenrupù niw te beǥas te paras ebpekeuma pa te timpu te kebpemula niw. Umbe ebpekevayèbayè kew te kegkaan niw ne ebpekepengungubpaan kew pa he melinawen diyà te lugar niw.

6 Edhimuwen ku he melinew is lugar niw, umbe ebpekelipezeng kew he wazè niw igkahandek. Edsegseǥen ku is dumezaas he menge langgam, wey wazà menge kuntada he edsurung keniyu. 7 Iyan kew edsurung te menge kuntada niw ne ebpenhimetayan niw sikandan. 8 Is 5 keniyu ebpekezaag te 100 ne is 100 keniyu ebpekezaag te 10,000. 9 Ed-eturen ku sikiyu ne ebeǥayan ku te mahabet he menge kevuwazan su wey ku metuman is kebpekid-uyun ku keniyu. 10 Tenged te kezekelà te menge abut niw, kenè niw pa egkaamin te egkaan is egkehuna he menge abut niw, ne igkaawà niw zà heini ziyà te midteǥuan niw zuen su ed-ilisan niw te veǥu he sebpet. 11 Ed-ubpà a zuma keniyu ne kenè ku sikiyu idselikwey. 12 Eduma a keniyu ne iyan a egkehimu he Megbevayè niw ne ebpedayun is kegkehimu niw he menge etew ku. 13 Iyan a kes Nengazen he Megbevayè niw he mibpeǥawas keniyu puun te Ehipto su wey kew kenè en meuripen te menge Ehiptohanen. Mibeǥayan ku en sikiyu te vayàbayà umbe wazè en ereg he igkeeled niw.

14-15 Piru emun kenè kew ebpemineg kedì etawa kenè kew edtuman te langun he menge suǥù ku wey menge sulunuzen, ne tenged kayi egkesupak niw is kebpekid-uyun ku keniyu, 16 iyan heini ebeelan ku keniyu: Egketeranta kew te kegkahandek su ebpeeǥiyan ku sikiyu te menge zaru he kenà egkeulian wey dateng he ebpekezezaat te menge mata niw wey menge lawa niw. Ebpemula kew ne kenà heini ebpulus diyà te keniyu su edsurungen kew te menge kuntada niw ne egkeenen dan is menge abut niw. 17 Egkuntedahan ku sikiyu para mezaag kew te menge kuntada niw ne iyan sikandan edumala keniyu. Tenged te kegketeranta niw ne ebpelaǥuy kew minsan wazà edal-as keniyu. 18 Ne emun kenè kew pa ebpemineg kediey, ne edsilutan ku sikiyu te kepipitu edtekepa. 19 Edhimuwen ku he kenà medlampus is gehem he ibpahambug niw; ne kenè ku sikiyu ebpeuzanan, umbe ebpurung ebadtik is menge tanè niw. 20 Egkehimu he wazà pulus te menge kedhaǥù niw, su is menge tanè niw, kenà ebeǥey te sebpet ne is menge kayu niw ne kenà ebpemeǥas.

21 Emun ebpedayun kew pa ǥihapun he edsupak kediey su kenè kew ebpemineg kediey, ed-umanan ku pa te kepipitu en maan egketakep he silut keniyu. 22 Edsuǥuen ku ziyà te keniyu is dumezaas he menge langgam ne ebpenhimetayan dan is menge anak niw wey menge uyaǥen niw, ne tenged kayi zeisey zà is egkesamà keniyu he henduen be te wazè en edhiphipanew ziyà te menge zalan niw.

23 Ne emun kenè kew pa ǥihapun ebpemineg kediey, su ebpedayun kew hinuun te kedsupak kedì, 24 iyan a mismu egkuntra keniyu ne ebpurungan ku sikiyu edsiluti. 25 Ibpesurung ku sikiyu te menge kuntada niw he iyan silut niw tenged te kedsupak niw te kebpekid-uyun ku keniyu. Minsan med-eles kew pa ziyà te inged niw ebpeeǥiyan ku ǥihapun sikiyu te menge kemeresayan, ne tenged dutun egkepeǥes kew he ebpezizalem te gehem te menge kuntada niw. 26 Egkurang is keenen niw, umbe sevaha zà he evuwan is egemiten te sepulù he vahi te kedlutù te supas, ne ebevehinen dan pa heini para keniyu. Uya, ebpekekaan kew piru kenè kew egkahantey.

27 Ne emun kenè kew pa ǥihapun ebpemineg kediey su ebpedayun kew hinuun te kedsupak kedì, 28 ne tenged te pauk ku egkuntrahan ku sikiyu ne edsilutan ku sikiyu te pitu pa maan he takep. 29 Ebpeeǥiyan ku sikiyu te vitil ne egkepeǥes kew he egkaan te keugelingen niw he menge anak. 30 Edrundusen ku is menge simbahan niw ziyà te metikang he menge lugar ragkes is menge pemuhatà he tutungà te veyewà. Ne idtimbag ku sikiyu is ebpematey ziyà te zivavew te kenà egeǥehinawa he menge ed-ezapen, ne idselikwey ku sikiyu. 31 Ebengkaǥen ku is menge inged niw wey menge simbahan niw, ne kenà ebpekepenunuat kedì is hemut te menge pemuhat niw. 32 Ebengkaǥen ku is lugar niw ne egkeinuinu zà is menge kuntada niw he edsakup kayi. 33 Ebpeeǥiyan ku sikiyu te tebek he edezaat te tanè niw ragkes en is menge inged kayi, ne ibpeyapat ku sikiyu ziyà te zuma he menge nasyun, ne egkehimu he mekevulungbulung is tanè niw. 34-35 Dutun te menge vihag kew ziyà te lugar te menge kuntada niw ne egkevengkag is lugar niw, ne ebpekehimeley is tanè niw. Su zutun te ed-ubpè kew pa zutun te tanè niw ne wazè niw heini ipehimeley minsan dutun te tuig te kebpehimelaya te tanà. Piru zutun he timpu human en heini ebpekehimeley zutun te wazè en kayi ed-ubpa.

36-37 Sikiyu is egkengesamà te tebek he ed-uwiten te menge kuntada niw ziyà te kandan he menge lugar, edterenteduwen ku, ne minsan daǥing dà te menge zahun he egkeremaǥen ebpemelaǥuy kew en he henduen be te edel-asen te edhimatey keniyu, minsan wazà edal-as keniyu. Ne ebpekedsusukung kew is egkengepiley. Umbe kenè kew ebpekesukul te menge kuntada niw. 38 Ebpematey kew ziyà te lugar te menge kuntada niw. 39 Is egkesamà keniyu ednaneynaney ebpematey tenged te menge salè niw wey te menge salà te menge kepuun niw.

40-41 Tenged te kedluivi wey kedsupaka niw kediey egkuntedahan ku sikiyu ne ibpevihag ku pehendiyà te lugar te menge kuntada niw. Iyan, emun ed-engkezan niw is menge salè niw wey menge salà te menge kepuun niw wey ed-engkezan niw en is ke bmesinupaken niw, wey edewaten niw is silut tenged te menge salè niw, 42 edtumanen ku is kebpekid-uyun ku te menge kepuun niw he si Abraham, si Isaac, wey si Jacob ne idlikù ku sikiyu ziyà te tanè niw. 43 Piru kinahanglan he ibpaawè ku zèpa sikiyu puun te tanè niw he iyan bayad niw te menge salè niw, tenged te kedselikwaya niw te menge suǥù ku wey menge sulunuzen he ibpesunud ku. Ne ebpekehimeley is tanà dutun te egkeewaan niw. 44 Piru minsan edsilutan ku sikiyu, ne kenè ku sikiyu idselikwey ziyà te lugar te menge kuntada niw; kenè ku sikiyu edezeetan he wazè en egkesamà keniyu. Ne kenà egkehimu he id-awè ku is kebpekid-uyun ku keniyu, su iyan a is Nengazen Megbevayè niw. 45 Edtumanen ku ziyà te keniyu is kebpekid-uyun ku te menge kepuun niw he impeǥawas ku puun te Ehipto su impeehè ku ziyà te menge nasyun is gehem ku. Mibeelan ku heini ziyà te menge kepuun niw su para siak is Nengazen mehimu he Megbevayè dan. Iyan a kes Nengazen.

46 Iyan heeyan sikan is nekedseselekawà he menge suǥù wey menge sulunuzen he imbeǥey te Nengazen diyà te menge Israilihanen diyà te Buntud he Sinai pinaaǥi ki Moises.