1-2 Migkaǥi is Nengazen he Mekeǥeǥehem diyà te menge memumuhat, “Emun kenà a keniyu ebpemineǥen, wey kena a keniyu edtehuzen te ebpuun diyà te ǥehinawa niw, edrewakan ku sikiyu wey edrewakan ku is igkeuyag-uyag niw. Midrewakan ku en heini su wazà a keniyu veǥayi te zengeg.

3 “Tenged keniyu ebmensuwen ku is menge kevuwazan niw. Idapug ku keniyu is binusbus te menge ibpemuhat niw, ne idtimbag ku sikiyu zuma kayi. 4 Ne egketuenan niw he impaaǥi ku ziyà te keniyu heini he kebmansu su para mekepedayun is kebpekid-uyun ku ki Levi. 5 Iyan kebpekid-uyun ku ki Levi wey is menge kevuwazan din is: midsaazan ku sikandan te meupiya wey meluǥayad he untung, wey kelinew emun edtehuzen e zan. Ne midtahud e zan iyan. 6 Tutuu is menge penurù dan wey wazà sikandan medtarùtarù. Ne miduma sikandan kediey ziyà te kelinew wey ketazeng, ne mahabet is ingkepeengked dan te kebaal te salà.

7 “Kinahanglan he is memumuhat he ebpenurù te hustu he ketau, ne iyan sikandin egkeinsaan te menge etew ke hengkey is hustu he ed-ul-ulahan. 8 Piru sikiyu is menge memumuhat midsuwayan niw is hustu he zalan ne pinaaǥi te penurù niw mahabet is neseligkat; midsupak niw is kebpekid-uyun ku te kepuun niw he si Levi. 9 Umbe, mibpengelinteuwan ku he sudia kew wey mepeel-elezi ziyà te etuvangan te langun he menge etew, su wazè niw sunuza is menge paaǥi ku, kekenà, ebpekelepew ziyà te kebpenurua niw te kesuǥuan he zuen niw ibpelavi.”

10 Ne mid-uman megkaǥi si Malakias te, “Kenè be sevaha zà is Megbevayà ne iyan sikandin midlimbag kenitew? Ne maan is mibpendezeisey tew is kebpekid-uyun te Megbevayà diyà te menge kepuun tew pinaaǥi te kenà kebmetinumanen te kada sevaha kenitew?

11 “Kenà metinumanen is menge tig-Juda. Utew mezaat he vaal is mibeelan dan diyà te Israel wey Jerusalem. Mibpendezeisey te menge tig-Juda is baley te Nengazen he mahal zin wey mibpengesawa is menge maama kandan te menge vahi he ed-azap te zuma he ed-ezapen. 12 Is minsan hentei he etew he ebaal kayi, ne verakat he kenè ne sikandin iragkes te Nengazen diyà te menge kevuwazan ni Jacob, minsan med-uwit pa sikandin te menge pemuhat diyà te Nengazen he Mekeǥeǥehem.

13 “Duen pa mibeelan niw: Impetiǥis niw is menge luhè niw ziyà te pemuhatà he para te Nengazen. Midsineǥew kew wey midlelendag su wazè din seǥipaa wey zewata is menge pemuhat niw. 14 Ed-insè kew ke maan is wazè din seǥipaa is menge ibpemuhat niw. Tenged te iyan is Nengazen nenistiǥus he wazè niw tumana is penaad niw ziyà te esawa niw he impenangdù niw zutun te kebpengesawa niw hein menguhed kew pa. Midrapas niw is penangdù niw te esawa niw he mebmetinumanen kew kandan. 15 Kenè be sikiyu is teleesawa, midsevaha te Nengazen is lawa niw wey gehinawa niw? Geina te egkesuat sikandin he mekaanak kew te egkehimu he ǥaked din. Umbe mebpekevantey kew he kenè niw mesupak is penangdù niw zutun te ked-esewaa niw te esawa niw hein menguhed kew pa. 16 Su migkaǥi is Nengazen he Megbevayà te Israel, ‘Kenè ku igkesuat is kebpesuwayà te teleesawa. Emun edsuwayan te maama is esawa zin, egkeepesan din.’

“Umbe mebpekevantey kew he kenè niw mesupak is penangdù niw te esawa niw.”

17 Migkaǥi pa si Malakias te, “Neperahan en is Nengazen he ebpemineg te menge lalag niw. Ne ed-insè kew te, ‘Hengkey is mibeelan dey he iyan ingkeperahi te Nengazen te menge lalag dey?’ Migkaǥi kew te is langun he mibaal te mezaat ne meupiya is ked-ahaa kandan te Nengazen, ne nekepenunuat sikandan kandin. Migkaǥi kew pa te, ‘Hendei en buwa is Megbevayà he metazeng is kukuman din?’ ”