1 Migkaǥi si Micas te, “Mekehizuhizu a! Iring a te etew he egkevitil he nengahà te rerawen he menge veǥas te paras etawa higus piru wazè din naahà. 2 Is ibpesavut ku iyan is, wazè en neehè ku he etew kayi te Israel he mepezumdumahan te Megbevayà. Wazè en nesamà he metazeng he etew. Is kada sevaha, edtaǥad te meupiya he timpu te kegkehimetayi zin te zuma zin he meǥinged, iring te etew he edtaǥad te kegkeutela zin te langgam he edhingutelen din. 3 Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman. 4 Is kinemetezengan kandan ne iring dà te zuǥiyen he sagbet he wazè din pulus. Neume en is timpu he edsilutan te Megbevayà heini he menge etew sumalà te impetizaan din kandan pinaaǥi te menge ebpeneuven he iring te menge perevantey te turi. Umbe ǥuntaan egkengeliveǥan sikandan.

5 “Ne ǥuntaan te utew en mezaat is ulaula te menge etew, ne kenè kew en sarig te menge emiǥu niw, minsan is utew niw menge emiǥu. Ne pekeventayi niw is menge lalag niw minsan diyà te minahal niw he esawa. 6 Su kayi he timpu, is anak he maama ne kenà edtahud te amey zin, ne is anak he vahi ne edsukul te iney zin, ne is ambey edsukul te enuǥang din he vahi. Is kuntada te etew iyan mismu is sakup te keugelingen din he pemilya.

7 “Piru siak mulà, edsarig a te Nengazen he Megbevayè ku. Edteǥazan ku sikandin is edlibri kedì. Ne ebpemineǥen din is ked-ampù ku.”

8 Migkaǥi is menge Israilihanen te, “Kenà ereg he edsudì kenitew is menge kuntada tew. Su minsan nezeetan kiw ne ed-uman kiw ed-enew. Wey minsan diyè kiw te merusirem ne iyan is Nengazen kerayag tew. 9 Geina te nekesalè kiw ziyà te Nengazen, dait he ed-entusen tew is silut din kenitew taman te edlevanan kiw zin wey ebeǥayan te hustu he kukuman. Egkeehè tew is kedlibriya zin kenitew pinaaǥi te ked-uwit din te kerayag kayi te kenitew. 10 Egkaahà heini te menge kuntada tew ne egkepeel-elezan sikandan. Su hein aney ne edsudien kiw zan he ke sikandin te, ‘Hendei en is Nengazen he Megbevayè niw?’ Kenà egkeuǥet egkeehè tew is kegkezeeti zan. Egkeiring sikandan te vasak diyà te kersada he edtekutakan.”

11 Migkeǥiyan ni Micas is menge tig-Jerusalem te, “Egkeuma is timpu he ed-umanan niw ebenguna is menge verengbeng niw ne zutun he timpu ne ebmeluag pa is tanà he egkesakup niw. 12 Dutun daan he timpu edhendiyà te keniyu is menge etew he ebpuun diyà te Asiria wey ziyà te menge inged diyà te Ehipto, wey ziyà te menge lugar he ebpuun te Ehipto pehendiyà te wahig he Eufrates, wey is ebpuun diyà te meziyù he menge lugar. 13 Egkehimu he mekevulungbulung is menge nasyun kayi te kelibutan tenged te kegkezeeti te menge meǥinged kayi.”

14 Mid-ampù is menge Israilihanen diyà te Nengazen he ke sikandan te, “Ventayi key is menge etew nu he migaked nu, te iring te kebantey te perevantey te menge kerehidu. Is menge tanà diyà te peliǥuy zey ne zekelà is egketabtab duen, piru sikami nengungubpaan key kayi te sibsivayan he iyan key zà. Ipeuman nu ipemeluag is tanè dey taman te Bashan wey Gilead iring te nehuna he timpu. 15 Ipeehè key kenikew te menge egkein-inuwan iring te mibeelan nu zengan hein impeǥawas key kenikew puun diyà te Ehipto. 16 Ne emun egkaahà heini te menge etew ziyà te menge nasyun ne egkepeel-elezan dan minsan gemhanan sikandan. Ne kenè dan en edlalag wey ebpemineg te menge kedsudia kenami. 17 Edula zan diyà te tanà iring te uled tenged te kegkeeled dan. Egawas sikandan diyà te elesè dan is egkerkeren tenged te kegkahandek dan kenikew, te Nengazen he Megbevayè dey. 18 Wazè en duma he ed-ezapen he iring kenikew. Mibpesaylu nu is menge salà te nesamà he menge etew nu he menge ǥaked nu. Wazà mebpedayun taman te taman is kegkepauk nu su ingkelipey nu is kebmahala nu kenami. 19 Egkeumanan key kenikew egkehizuwi ne id-awè nu is langun he menge salè dey. Iring dà te edtekutakan nu heini ne idtimbag nu ziyà te kezeleman te zaǥat. 20 Ibpeehè nu kenami te menge kevuwazan ni Abraham wey ni Jacob is kebmetinumanen nu wey kebmahala nu kenami sumalà te impenaad nu ziyà te kandan dengan.”