1 Hein mibesahan is menge etew zuen te Libru ni Moises dutun he andew, nevasa he ebenduwan is menge Amunihanen wey menge Moabitanhen te kedtampu ziyà te kedsevaha te menge etew te Megbevayà. 2 Su ǥeina te wazè dan beǥayi te keenen wey inumen is menge Israilihanen hein migawas is menge Israilihanen puun te Ehipto. Kekenà, midsuhulan dan si Baalam su wey zin rewaki is menge Israilihanen. Piru is rawak kandan midhimu te Megbevayà he penuvadtuvad. 3 Ne hein nezineg te menge Israilihanen haazà he kesuǥuan, wazè dan ipetampu kandan is kenà tutuu he menge Israilihanen.

4 Hein wazè pa haazà mehitavù, si Eliashib he memumuhat, he edumala te menge budiga ziyà te valey te Megbevayè dey he kezuzumahi ni Tobia, 5 midtuǥutan din si Tobia te kegamit te zekelà he ruǥu zuen te valey te Nengazen. Heini he ruǥu egkeǥemit he para budiga te menge pemuhat he para gasa, beyewà, menge gelemiten dutun te valey te Nengazen, menge halad te menge memumuhat, menge ikepulù he trigu, binu, wey lana, he sumalà te Kesuǥuan para haazà te menge Levihanen, menge perekanta, wey te menge vantey te menge ǥemawan te valey te Nengazen. 6 Wazà a ziyà te Jerusalem hein nehitavù haazà, su hein ike-32 he tuig te kedhadì ni Artaserkses diyà te Babilonia, midhendiyà a te kandin. Ne te huziyan he timpu midtuǥutan e zin 7 te kedlikù diyà te Jerusalem. Ne hein nekeuma a, netuenan ku is mezaat he mibeelan ni Eliashib he iyan is kebpeubpaa zin ki Tobia ziyà te ruǥu he ziyà te lama zuen te valey te Megbevayà. 8 Ne tenged te utew ku kegkepauk, impenimbag ku is langun he menge gelemiten ni Tobia ziyà te ǥawas duen te ruǥu. 9 Ne impelumpiyuwan ku haazà is ruǥu, ne hein nepasad, impelikù ku zutun sikan is menge gelemiten duen te valey te Nengazen ragkes en is menge halad he para gasa wey veyewà.

10 Netuenan ku he wazà meveǥayi is menge Levihanen te kandan he vahin. Umbe sikandan wey is menge perekanta he midseriǥan te menge vuluhaten diyà te valey te Nengazen nemen-ulì en is nemenerebahu ziyà te tanà. 11 Umbe, mibpemeukan ku is menge upisyal he ke siak te, “Maan is mibey-anan niw is baley te Megbevayà.” Impetawag ku is menge Levihanen wey menge perekanta ne impelikù ku sikandan diyà te menge vuluhaten dan diyà te valey te Nengazen. 12 Ne zutun mid-umanan uwita te langun he menge etew ziyà te Juda ziyà te menge budiga is ikepulù te trigu zan, binu zan, wey lana zan. 13 Is impezumala ku te menge budiga iyan si Shelemia he memumuhat, si Zadok he menunudlù te Kesuǥuan, wey si Pedaya he sevaha he Levihanen. Ne impeuǥup ku kandan si Hanan he anak ni Zacur wey apù ni Matania. Iyan sikandan mibpilì ku su egkeseriǥan sikandan. Insarig ku zaan kandan is kebpemeǥey te menge vahin te iring dan he ebpemenerebahu ziyà te valey te Nengazen.

14 Ne zutun mid-ampù a, ke siak te, “He Megbevayè ku, tentenuzi a wey kenè nu lipati is menge meupiya he mibeelan ku para te valey nu wey te menge vuluhaten kayi.”

15 Dutun he timpu zuen neehè ku he menge tig-Juda he egkeres te paras te Andew te Kedhimeley. Is duma kandan egkergahan dan is menge asnu zan te trigu, binu, paras, higus, wey zuma pa, su ed-uwiten dan diyà te Jerusalem su ibelegyè dan. Umbe mibpetizeenan ku sikandan he kenè dan mebelegyà te menge pruduktu zan emun Andew te Kedhimeley. 16 Duen daan menge tig-Tyre he nemen-ubpà diyà te Jerusalem he mid-uwit te menge isdà wey zuma pa he menge velegyà. Ne imbelegyè dan haazà diyà te menge tig-Juda he ziyà te Jerusalem dutun he Andew te Kedhimeley. 17 Umbe, mid-etuvang ku is menge pengulu ziyà te Juda, ne migkeǥiyan ku te, “Hengkey heini is mezaat ebeelan niw? Wazè niw isipa he segradu is Andew te Kedhimeley! 18 Kenè be iyan heini mibeelan te menge kepuun niw, umbe midsilutan kiw te Megbevayà wey zuen samuk kayi te inged tew? Ne ǥuntaan, ibpeiseg niw is kegkepauk te Megbevayà pinaaǥi te vaal niw, su wazè niw isipa he segradu is Andew te Kedhimeley.”

19 Umbe, insuǥù ku he edsireduwan is pultahan te inged emun mezukilem te Birnis, ne kenà heini ed-ebriyen taman te egketapus is Andew te Kedhimeley. Impeventayan ku te menge etew ku is menge pultahan su para wazà minsan hengkey he velegyà he igkeseled dutun te inged te Andew te Kedhimeley. 20 Usahay ed-ul-ulahan te menge nigusyanti is kedlipezeng diyà te guwà te Jerusalem emun mezukilem te Birnis. 21 Piru mibpetizeenan ku sikandan he ke siak te, “Maan is kayi kew edlipezeng te verengbeng te inged? Emun ed-umanan niw heini ed-ul-ulaha ne edekepen ku sikiyu.” Umbe puun dutun ne wazè en sikandan medlikù dutun te Andew te Kedhimeley. 22 Ne mibmenduan ku is menge Levihanen he mebpekelumpiyu zan, ne ventayi zan is menge pultahan su para isipa te menge etew he segradu he andew is Andew te Kedhimeley.

Ne zutun mid-ampù a, ke siak te, “He Megbevayè ku, is-isipa nu heini is mibeelan ku, ne kehizuwi a kenikew sumalà te kezekelà te gaǥew nu.”

23 Dutun daan he andew, netuenan ku he zuen menge tig-Juda he nengesawa te menge vahi he menge tig-Ashdod, tig-Amon, wey menge tig-Moab. 24 Is ketengà te menge anak dan egkaǥi te kineǥiyan te menge tig-Ashdod etawa kineǥiyan te menge etew ziyà te zuma pa he menge lugar, ne kenà sikandan ebpekekaǥi te kineǥiyan diyà te Juda. 25 Umbe, mibpemeukan ku wey midrewakan ku heini he menge tig-Juda. Midlagkut ku is duma kandan wey migingit ku. Impepenangdù ku sikandan pinaaǥi te ngazan te Megbevayà, he sikandan wey is menge anak dan, ne kenè en mebpengesawa etawa mebpeesawa te kenà menge Israilihanen. 26 Ne migkeǥiyan ku sikandan te, “Kenè be iyan heini hinungdan te kebpekesalà ni Hadì Solomon he hadì te Israel? Wazà hadì diyà te minsan hendei he nasyun he iring kandin. Pinelanggà sikandin te Megbevayè din, ne midhimu sikandin te Megbevayà he hadì te tivuuk he Israel. Piru liyu zutun nekevaal sikandin te salà tenged te ked-iniyata kandin te menge esawa zin he kenà menge Israilihanen. 27 Ne kenè dey idtuǥut keniyu is kebaal kayi te mezaat he vaal he paaǥi te kedluib te Megbevayè tew he iyan is kebpengesawa niw te kenà menge Israilihanen.”

28 Si Joyada he anak te lavew he memumuhat he si Eliashib duen din anak he nekeesawa te anak ni Sanbalat he tig-Horon, umbe midsegseg ku sikandin.

29 Ne zutun mid-ampù a, ke siak te, “He Megbevayè ku, kenè nu vey-ani zà sikandan tenged te kebpekehegkapa zan te kegkememumuhat dan wey menge penangdù dan dutun te kegkememumuhat dan wey kegke-Libihanen dan.”

30 Ne mibpeniguduwan ku he kenè en meuwit is menge etew ziyà te Israel te kenà menge Israilihanen. Ne mibeǥayan ku te terebahu is menge memumuhat wey menge Levihanen sumalà te buluhaten te kada sevaha kandan. 31 Midsiguru ku zaan he sikan is menge idtavun he para te kebpemuhat ne kenà melimpasi is ked-uwita zuen, ragkes is menge egkehuna he egkeraǥun.

Ne zutun mid-ampù a, ke siak te, “He Megbevayè ku, tentenuzi a kenikew wey tuvazi a.”