1 Migkaǥi is Nengazen diyà te ki Moises te, 2 “Keǥiya nu ziyà te menge Israilihanen he emun duen bahi etawa maama he edhimu te ispisyal he penaad he ibpehinungud din is keugelingen din kayi te kedì pinaaǥi te kedhimuwa zin kayi he Nazareo, 3 kinahanglan he kenà sikandin med-inum te vinu he paras wey te zuma pa he ebpekelangut he menge inumen. Kenà daan sikandin megamit te sukà he paras, wey te sukà he iyan mibeelan is duma pa he ebpekelangut he inumen. Ne kenà sikandin med-inum te wahig te paras wey kenà megkaan te wazà genguwa etawa migangu he paras. 4 Dutun te Nazareo sikandin, kinahanglan he kenà sikandin megkaan te minsan hengkey he ebpuun diyà te paras, minsan lisu zin etawa luwit din.

5 “Kenè din daan petempezi is bulvul zin dutun te wazè din pa mepasad is penaad din te kebpenilbi te Nengazen. Kinahanglan he idsivey sikandin he para te Nengazen taman te egkepasad is timpu te penaad din, ne vey-ani zin en ke ebmelayat is bulvul zin. 6 Dutun te wazè din pa mepasad is penaad din te kebpenilbi te Nengazen, kinahanglan he kenà sikandin med-uvey te minatey, 7 minsan amey zin, iney zin, etawa suled din. Kenè din remeriki is keugelingen din tenged kandan, su is bulvul zin simbulu te kebpehinunguza zin te untung din diyà te Megbevayà. 8 Umbe, zutun te tivuuk he timpu te kebpehinunguza zin te untung din, insivey sikandin he para te Nengazen.

9 “Emun duen edtik-ew ebpatey ziyà te avey zin, he tenged dutun neremerikan sikan is bulvul zin he simbulu te kebpehinungud din te keugelingen din diyà te Nengazen, kinahanglan he medtaǥad sikandin te pitu he andew, ne zutun mebpevangul sikandin. Is ikepitu he andew, iyan kes andew te kebpekelumpiyuwa zin te keugelingen din. 10 Ne emun ikewalu en he andew, kinahanglan he med-uwit sikandin te zezuwa he merepatik etawa limuken diyà te memumuhat diyà te ǥemawan te Tulda he Edtelevukaayan. 11 Is sevaha, ibpemuhat te memumuhat he pemuhat he para idlumpiyu ne is sevaha pa, pemuhat he edtutungen. Ne pinaaǥi kayi egkevelukasan sikandin tenged te salè din te kebpekeǥawed te minatey. Dutun mismu he andew, iuman din ipehinungud is keugelingen din ne ipeuman din ipemelayat is bulvul zin. 12 Sikan is nehuna he menge andew te kebpenilbi zin te Megbevayà, kenè en idtarin te keluǥayad te timpu he impenaad din, su neremerikan man sikandin tenged te kebpekeǥawed te minatey. Kinahanglan he iuman din ipehinungud is keugelingen din ne med-uman mebpuun taman te egkepasad din is penaad din. Kinahanglan daan he ed-uwit sikandin te meemahan he kerehidu he ibpemuhat para te vayad te salè din.

13 “Iyan heini ebeelan diyà te kandin emun egkepasad en is penaad din he kedhimuwa zin te keugelingen din he Nazareo: Kinahanglan he ibpehendiyà sikandin te ǥemawan te Tulda he Edtelevukaayan. 14 Dutun ebpemuhat sikandin diyà te Nengazen te menge uyaǥen he wazè dan sazir he iyan is: sevaha he meemahan he kerehidu he senge-tuig is keǥurang din he pemuhat he edtutungen, sevaha he vehiyan he kerehidu he senge-tuig gihapun is keǥurang din he pemuhat para idlumpiyu, wey sevaha he meǥurang en he meemahan he kerehidu he pemuhat he para te meupiya he kedepità. 15 Ne liyu zutun, mebpemuhat daan sikandin te menge pemuhat he para gasa, pemuhat he inumen, wey senge vaskit he supas he wazè din tapey he iyan ebeelan is meupiya he kelasi te herina. Is duma he supas, ne ebpekekepalen ne edsehuǥan te lana ne is duma pa ebpekenipisen he edezasan te lana.

16 “Iyan is memumuhat ebpemuhat kayi ziyà te etuvangan te Nengazen: Ibpemuhat din is pemuhat he para idlumpiyu wey is pemuhat he edtutungen. 17 Ne ibpemuhat din daan is meemahan he kerehidu he pemuhat he para te meupiya he kedepità duma zuen te senge vaskit he supas he wazè din tapey. Ne ibpemuhat din daan sikan is menge pemuhat he para gasa wey is pemuhat he inumen.

18 “Ne kegkepasad dutun, mebpevangul haazà is Nazareo he simbulu te kebpehinunguza zin te untung din diyà te Nengazen, diyà te ǥemawan te Tulda he Edtelevukaayan. Ne vinsuli zin is bulvul zin te hapuy he tutungà te pemuhat he para te meupiya he kedepità. 19 Ne idsavuk duen te memumuhat diyà te palad duen te Nazareo is pemenayen he vahin duen te sinevawan he kerehidu wey sikan is menipis wey mekepal he menge supas he wazè din tapey puun duen te vaskit. 20 Ne egkuwaan duen te memumuhat haazà ne ibayew zin diyà te etuvangan te Nengazen su pemuhat haazà he ibayew. Segradu heini he vahin te pemuhat, ne ǥaked en heini te memumuhat, ragkes is kumeng wey vuvun duen te kerehidu he imbayew zaan diyà te Nengazen. Ne kegkepasad kayi egkehimu en he ed-inum te vinu haazà is Nazareo.

21 “Iyan heini sulunuzen he para te sevaha he Nazareo. Piru emun edsaad is sevaha he Nazareo he ebpemuhat sikandin diyà te Nengazen he ebpesubrahan din is ibpetuman kandin he penaad he egkehimu he Nazareo, kinahanglan he edtumanen din heini.”

22 Migkaǥi is Nengazen diyà te ki Moises te, 23 “Keǥiyi nu si Aaron wey is menge anak din he maama te iyan heini keǥiya zan emun ebpenubtuvazan dan is menge Israilihanen:

27 “Pinaaǥi kayi igkepehayag dan diyà te menge Israilihanen ke hentei a, ne edtuvazan ku sikandan.”