1 Ne midriklamu is menge Israilihanen mehitenged te kelised dan. Kegkezineǥa kayi te Nengazen, nepauk sikandin ne midretem din is hapuy he nekevinsul te nepipira he vahin te peliǥuy te kampu zan. 2 Tenged kayi mibuyù te penavang is menge Israilihanen diyà te ki Moises, ne mid-ampù si Moises diyà te Nengazen, ne neevukan haazà is hapuy. 3 Umbe, migngezanan dan haazà is lugar te Tabera, su midretem is Nengazen te hapuy ziyà te kandan.

4 Dutun he timpu, is grupu te kenà menge Israilihanen he nemenduma te menge Israilihanen midriklamu su egkesuat dan he egkaan te zuma he kelasi te menge keenen, ne is menge Israilihanen midriklamu zaan he ke sikandan te, “Deyzey pezem ke ebpekekaan kiw te usa. 5 Hein diyè kiw pa te Ehipto ebpekekaan kiw te isdà he wazè din bayad wey menge timun, menge milun, menge sibuyas, wey menge ahus. 6 Piru kayi kenè kiw egenahan he egkaan su pudu zà ‘manna’ is keenen tew.”

7 Is ‘manna’ henduen be te dezeisey he menge lisu ne meputì heini. 8 Ebpengemien heini te menge Israilihanen diyà te tanà kada meselem, ne egelingen dan, ne emun kenà, ne ebeveyuwen dan. Edhilutuen dan heini ziyà te ziniyun ne ebeelan dan he menipis he supas. Is taam kayi iring te taam te pan he midlutù te lana he ulibu. 9 Ebpekelapik heini te kebpeketanà te menge zehemug dutun te kampu emun mezukilem.

10 Nezineg ni Moises he edriklamu is kada pemilya ziyà te ǥemawan te menge tulda zan. Umbe utew sikandan nepeuki te Nengazen, ne neselekawan daan si Moises tenged kayi te mibeelan dan. 11 Mid-insà sikandin diyà te Nengazen te, “Maan is mibeǥayan a kenikew is suluǥuen nu te zekelà he prublima? Hengkey is neveelan ku he wazè nu ikesuat he iyan imbeǥayi nu kediey te prublima kayi te menge etew? 12 Menge anak ku ve sikandan? Iyan e ve mid-anak kandan? Maan is egkeǥiyan a kenikew he ed-eturen ku sikandan iring te ked-atur te perevantey te vatà he edsepipiyen din wey ibpesusu zin. Ne ibpezuma nu sikandan kedì diyà te tanà he insaad nu ziyà te menge kepuun dan? 13 Hendei a egkuwa te usa he para kayi he menge etew? Edtulung dan edriklamu kayi te kedì he veǥayi ku sikandan te usa he egkekaan dan. 14 Kenè ku egkehimu is ked-atur kandan te langun emun iyan e zà. Utew heini meveǥat para kediey. 15 Emun iyan heini ebeelan nu kediey ne himetayi ad nasì kenikew ǥuntaan. Emun nekepenunuat a kenikew, ne kenà a kenikew vey-ani he egkerasey!”

16 Umbe, migkaǥi is Nengazen diyà te ki Moises te, “Tiǥuma nu is 70 he menge edumala te menge Israilihanen he nekilala nu he nengulu te menge etew, ne ipehendiyè nu sikandan te Tulda he Edtelevukaayan ne ipehitindeg nu sikandan dutun duma kenikew. 17 Ebulus a ne ebpekidlalag a kenikew zutun, ne ibeǥey ku kandan is duma he keǥehem he imbeǥey ku kenikew su wey zan mekeuǥup kenikew te kedumala te menge etew su para zuen nu zuma te kedumala kandan.

18 “Ne keǥiyi nu is menge etew he mebpekelumpiyu sikandan, su keeselem duen en egkekaan dan he usa. Keǥiya nu heini ziyà te kandan: ‘Siak is Nengazen, nezineg ku sikiyu he edriklamu su egkesuat kew he egkaan te usa. Ne migkaǥi kew pa he meupiya pa is kebpekesavuk niw ziyà te Ehipto kenà guntaan. Umbe ebeǥayan ku sikiyu te usa keeselem su wey kew mekekaan te usa. 19 Ne is kebpekekaan niw kayi, ne kenè dà seled te senga andew, etawa zezuwa he andew, etawa lelima, etawa sepulù, etawa 20 he andew, 20 kekena, senge vulan, taman te igkeutè niw heini su edsemuwen kew en. Su inselikwey a keniyu is nekiduma keniyu, ne midriklamu kew kayi te kedì he ke sikiyu te, deyzey pa ke wazè kew en med-awà diyà te Ehipto.’ ”

21 Piru migkaǥi si Moises te, “600,000 langun is menge etew he zuma ku, ne ǥuntaan migkaǥi ka he ebeǥayan nu sikandan te usa he egkekaan dan seled te senge vulan? 22 Minsan edlepaan dey pa is langun he menge kerehidu wey menge vaka etawa edhingutelen dey is langun he isdà diyà te zaǥat ne kenè pa ereg kandan.” 23 Migkaǥi is Nengazen diyà te ki Moises te, “Duen be edtemanan te ǥehem ku? Egkeehè nu ǥuntaan ke egkeulaula ve is migkaǥi ku etawa kenà.”

24 Umbe, migenat si Moises ne migkeǥiyan din is menge etew zuen te migkaǥi kandin te Nengazen. Midtiǥum din sikan is 70 he menge perezumala ne impehitindeg din diyà te peliǥuy zuen te tulda. 25 Ne mibulus is Nengazen pinaaǥi te ǥapun ne nekidlalag ki Moises. Ne imbeǥey zin duen te 70 he menge perezumala is duma he keǥehem. Ne hein diyè en haazà te kandan ne nenagnà sikandan, piru wazè en haazà meuman-uman.

26 Duen dezuwa zuen te 70 he menge perezumala he wazà med-awà diyà te kampu ne wazè dan medhendiyà te tulda he iyan si Eldad wey si Medad. Piru nekaangken gihapun sikandan te keǥehem ne ebpemenagnà daan sikandan dutun te kampu. 27 Ne zuen betan-en he maama he mibpelelaǥuy pehendiyà te ki Moises he ke sikandin te, si Eldad wey si Medad ne nenagnà diyà te kampu. 28 Ne si Josue he anak ni Nun, he nehimu he timbang ni Moises puun te vetan-en pa sikandin, migkaǥi ziyà te ki Moises te, “Datù, ipeengked nu sikandan.” 29 Piru midtavak si Moises te, “Ingkeipeng nu ve he ebpekezezaat heini te kegkepengulu ku? Emun iyan e zà ebpekevayàbayà, egkesuat a he pudu veǥayi te keǥehem te Nengazen is menge etew zin su para pudu zan mekepenagnà iring te menge ebpeneuven.” 30 Ne kegkepasad dutun midlikù si Moises wey haazà is menge perezumala te menge Israilihanen diyà te kampu.

31 Ne zutun impepengeramag te Nengazen te ebpekeuwit te menge piyuǥù puun te zaǥat. Ne nemenlayang dan diyà te peliǥuy te kampu he tetelu he ǥiek is ketikang dan puun te tanà, ne nepipira he kilumitru is keluǥayad wey keluag te tanà he nezebpakan dan. 32 Umbe, zutun te tivuuk he andew nengapul is menge etew taman te mezukilem wey taman en te sunud he andew. Ne wazà mebminus te nengkelibu he kilu is nekuwa te kada sevaha kandan, ne impengagkag dan haazà diyà te peliǥuy te kampu. 33 Iyan, wazè dan pa haazà maamin ne utew en sikandan nepeuki te Nengazen, ne mibpeeǥiyan din sikandan te kezeetan. 34 Umbe, migngezanan haazà he lugar te Kibrot Hataava su zutun ipenleveng is menge etew he seseveleken te usa. 35 Puun dutun midhipanew is menge Israilihanen pehendiyà te Hazerot ne zutun dan megkampu.