1 “Diyà te egkehuna he andew te ikepitu he vulan, tiǥum kew para te ked-azap te Nengazen, ne kenè kew terebahu. Iyan heini andew te kebpezaǥing niw te menge trumpita. 2 Dutun he andew, pemuhat kew te pemuhat he edtutungen he ebpekepenunuat te Nengazen is kehemut din. Is ibpemuhat kayi he pemuhat iyan is: sevaha he turiti he vaka, sevaha he meemahan he kerehidu he meǥurang en, pitu he meemahan he nati he menge kerehidu he tig senge-tuig is keǥurang dan. Ne heini is langun kinahanglan he wazè dan sazir. 3 Ne kebpemuhat niw kayi, lepiki niw te pemuhat he para gasa he meupiya he kelasi te herina he midsehuǥan te lana–heenem he kilu is idlapik diyà te kada sevaha he turiti he vaka, heepat he kilu is idlapik diyà te meǥurang en he kerehidu. 4 Ne zezuwa he kilu is idlapik diyà te kada sevaha he nati he kerehidu. 5 Pemuhat kew zaan te sevaha he meemahan he kambing he pemuhat he para idlumpiyu su wey kew mevelukasi tenged te menge salè niw. 6 Ipemuhat niw heini he id-uman duen te vinulan wey kada andew he menge pemuhat he edtutungen he edlepikan te menge pemuhat he para gasa wey pemuhat he inumen. Menge pemuhat heini he pinaaǥi te hapuy, is kehemut kayi ebpekepenunuat te Nengazen.

7 “Dutun te ikesepulù he andew kayi te ikepitu he vulan, tiǥum kew para te ked-azap te Nengazen. Kinahanglan he ebpuasa kew wey kenè kew edterebahu. 8 Ne pemuhat kew te menge pemuhat he edtutungen he ebpekepenunuat te Nengazen is kehemut din: he sevaha he meemahan he nati he vaka, sevaha he meǥurang en he meemahan he kerehidu, wey pitu he nati he meemahan he menge kerehidu he tig senge-tuig is keǥurang dan. Ne langun kayi kinahanglan he wazè dan sazir. 9 Dutun te kebpemuhat niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik te kada turiti he vaka, heepat he kilu is para te meǥurang en he kerehidu, 10 ne zezuwa he kilu is idlapik niw ziyà te kada sevaha he nati he kerehidu. 11 Pemuhat kew zaan te sevaha he meemahan he kambing he pemuhat he para idlumpiyu, he id-uman duen te sevaha pa he pemuhat he para idlumpiyu, su wey mevelukasi kew tenged te menge salè niw wey te kada andew he pemuhat he edtutungen he edlepikan te pemuhat he para gasa wey pemuhat he inumen.

12 “Dutun te ike-15 he andew te iyan ded he vulan, tiǥum kew en maan para te ked-azap te Nengazen ne kenè kew terebahu zutun he andew. Silibra kew te pista para te Nengazen seled te pitu he andew. 13 Pemuhat kew te menge pemuhat he edtutungen he ebpekepenunuat te Nengazen is kehemut din. Diyà te egkehuna he andew iyan heini ipemuhat niw: 13 he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang dan. Ne heini is langun kinahanglan he wazè dan sazir. 14 Dutun te kebpemuhat niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik diyà te kada sevaha he turiti he vaka, heepat he kilu is idlapik te kada sevaha he meǥurang en he kerehidu, 15 ne zezuwa he kilu is idlapik diyà te kada sevaha he nati he kerehidu. 16 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.

17 “Ne ziyà te ikezuwa he andew te kedsilibra niw, ne iyan heini ipemuhat niw: 12 he turiti he vaka, dezuwa he meemahan he menge kerehidu he meǥurang en, wey 14 he nati he meemahan he menge kerehidu he tig senge-tuig is keǥurang din. Ne heini is langun kinahanglan he wazè dan sazir. 18 Dutun te kebpemuhata niw kayi, lepiki niw heini te hustu is kezekelè din he pemuhat he para gasa wey pemuhat he inumen. 19 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he menge pemuhat he edtutungen he edlepikan te pemuhat he para gasa wey pemuhat he inumen.

20 “Diyà te iketelu he andew te kedsilibra niw iyan heini ipemuhat niw: 11 he meemahan he turiti he vaka, dezuwa he meǥurang en he meemahan he menge kerehidu wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 21 Is kada sevaha kayi, lepiki niw te pemuhat he hustu is kezekelè din he pemuhat he para gasa wey pemuhat he inumen. 22 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen wey te zuma zin he pemuhat he para gasa wey pemuhat he inumen.

23 “Dutun te ikeepat he andew te kedsilibra niw iyan heini ipemuhat niw: 10 he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 24 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen. 25 Pemuhat kew zaan te sevaha he meemahan he kambing he pemuhat para te idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.

26 “Dutun te ikelima he andew te kedsilibra niw iyan heini ipemuhat niw: siyam he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 27 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen. 28 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.

29 “Emun ikeenem he andew te kedsilibra niw, iyan heini ipemuhat niw: walu he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 30 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen. 31 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen. 32 Dutun te ikepitu he andew te kedsilibra niw iyan heini ipemuhat niw: pitu he turiti he vaka, dezuwa he meǥurang en he meemahan he menge kerehidu wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 33 Dutun te kebpemuhata niw kayi, lepiki niw te hustu is kezekelè din he pemuhat he para gasa wey pemuhat he inumen. 34 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.

35 “Dutun te ikewalu he andew te kedsilibra niw, sevaha kew te ked-azap te Nengazen ne kenè kew terebahu keniyan he andew. 36 Pemuhat kew te pemuhat he edtutungen he ebpekepenunuat te Nengazen is kehemut din: sevaha he turiti he vaka, sevaha he meǥurang en he meemahan he kerehidu wey pitu he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir. 37 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen. 38 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.

39 “Ne liyu zuen te menge pemuhat he para te kedtuman te menge penaad niw wey menge keugelingen niw he suat, pemuhata niw zaan is Nengazen dutun te midtelaan he menge pista kayi he menge pemuhat: menge pemuhat he edtutungen, menge pemuhat he para gasa, menge pemuhat he inumen, wey menge pemuhat he para te meupiya he kedepità.”

40 Migkaǥi ni Moises heini is langun diyà te menge Israilihanen sumalà te insuǥù kandin te Nengazen.