36
Is menge Bahi he Nekezawat te Tanà
Dutun he timpu, is menge pengulu te pemilya ni Gilead te anak ni Makir wey apù ni Manase, te anak ni Jose midhendiyà te ki Moises wey ziyà te menge pengulu te Israel. Ne ke sikandan te, “Datù, hein mibmandù kenikew is Nengazen te kebahin duen te tanà he egkepengevilin te menge Israilihanen pinaaǥi te ripa, mibmandù daan sikandin he iveǥey is bahin te suled dey he si Zelofehad diyà te menge anak din he vahi. Ne penenglitan ke ebpeesawa sikandan te ebpuun diyà te selakew en he tribu, ne tenged dutun is tanè dan egkaangken en te tribu he ebpekeesawa kandan, ne tenged kayi egketerinan is tanà he vahin te tribu zey. Emun egkeuma is Tuig te Ked-ulì wey Kebeǥey te Bayàbayà, is tanè dan ebpekeuman te tanà te tribu he nekeesawa kandan, ne egkaawè en heini ziyà te vahin te tribu te menge kepuun dey.”
Ne tenged te kedsunud te suǥù te Nengazen, migkaǥi si Moises diyà te menge Israilihanen te, “Hustu is egkeǥiyen te tribu te menge kevuwazan ni Jose. Umbe, iyan heini lalag te Nengazen mehitenged te menge anak he vahi ni Zelofehad: Ebpekepeesawa sikandan te egkesuatan dan emun diyè dà te kandan he tribu. Is tanà he egkepengevilin te kada tribu ne kenà egkehimu ke egkaangken te zuma he tribu. Su kinahanglan he pirmeninti is kegkeengkena te kada tribu te tanà he egkepengevilin dan diyà te menge kepuun dan. Is minsan hentei he vahi he nesakup te minsan hentei ki tribu, emun ebpekepengevilin sikandin te tanà, kinahanglan he ebpeesawa sikandin te sakup gihapun te kandan he tribu su para kenà maawà diyà te kada Israilihanen is tanà he egkepengevilin din diyà te kepuun din. Is tanà he egkepengevilin te kada tribu kenà egkehimu ke egkaangken te zuma he tribu, su kinahanglan he pirmeninti is kegkeengkena te kada tribu te tanà he egkepengevilin dan.”
10 Umbe, midtuman te menge anak he vahi ni Zelofehad is migkaǥi te Nengazen pinaaǥi ki Moises. Is menge anak he vahi ni Zelofehad 11 iyan ensi Mala, Tirza, Hogla, Milca, wey Noa. Ne is nekeesawa kandan iyan is menge id-aǥew zan diyà te amey zan, 12 he menge kevuwazan ni Manase te anak ni Jose. Umbe is tanà he nepengevilin dan pirmeninti is kegkeengkena zuen te pemilya wey tribu te amey zan.
13 Iyan haazà menge suǥù wey menge sulunuzen he imbeǥey te Nengazen diyà te menge Israilihanen pinaaǥi ki Moises hein diyà sikandan te menge suǥud te Moab he ziyà te Jordan he uvey te Jerico.