1 Mama, purungi nu pemineǥa is menge lalag ku he egkezumahan te ketau, 2 su wey nu ikepaahà is hustu wey kedlalag he egkezumahan te ketau. 3 Is lalag te vahi he mengungumpadi meemis pa te teneb, ne is kegkaǥi zin ebpekevihag iring te idhamham he lana te ulibu. 4 Piru ziyà te egkehuziyanan is igketaǥak din diyà te kenikew iyan is keseengan wey kemereǥenan. 5 Emun eduma ka kandin ne edumahan ke zin diyà te lugar te menge minatey; is dalan he ed-ikulen din ne ebpekepehendiyà te kemetayen. 6 Wazè din seǥipaa is dalan pehendiyà te untung. Bulegkù is dalan he ed-ikulen din, ne wazè din heini metueni.

7 Umbe, menge anak, pemineǥa a keniyu wey pezumdumahi. 8 Likayi niw is bahi he mengungumpadi, minsan is ked-uvey zà diyà te ǥemawan te valey zin ne kenè niw ul-ulaha. 9 Su emun ebeelan niw heini, egkaawà is dengeg niw ne egkaangken heini te zuma, ne edhimetayan kew te menge etew he wazà kegkehizu. 10 Ne is langun he ketiǥeyunan niw wey is duma pa he hineǥuan niw egkuwaan te menge lumelengyawà. 11 Ne ebpekezag-es kew emun edserupatey kew en, ne egkeǥuǥus en utew is lawa niw. 12 Ne ebpekekaǥi kew te, “Geina iyan te igkeepes ku zà is kebmensuwa kedì; geina iyan te midsupak ku is indawey kedì. 13 Wazè ku pemineǥa is ebpemenurù kedì. 14 Umbe, iyan nepengkusan ku is hapit a egkepeel-elezi ziyà te etuvangan te nevurun he menge etew.”

15 Iring te ed-inum ka te wahig he ebpuun te sekezuwè nu, iyan nu zà daan hileveti is esawa nu. 16 Kenè nu ituǥut he egkehimu ka he iring te serebseb he minsan hentei zà he vahi is ebpekekuwa wey ebpekeinum duen. 17 Kinahanglan he para zà heini keniyu te teleesawa; ne kenè niw heini peǥezami te zuma. 18 Umbe, lipey ka pinaaǥi te esawa nu, ne verakat he tuvazi sikandin te Megbevayà. 19 Mekempet sikandin wey ebpekahalin te ǥehinawa su iring is kekempet din te nati he selazeng, umbe zeyzey ke mewili ka kandin wey layun nu egkeisip is kebmahal zin.

20 Mama, kenè nu iyan isipa is bahi he mengungumpadi. Kenè nu iyan egkesuati is esawa te sengememaama. 21 Su egkaahà te Nengazen is langun he menge vaal nu. Ne minsan hendei ka ebpevayà ne egkeehè ke zin. 22 Is mezaat he menge ulaula te lalung he etew iring te litag he ebpekehiket kandin. 23 Ebpatey sikandin tenged te kebpezumdumahi zin te mezaat he suat te lawa zin. Is ketutulebungi zin iyan ed-uwit kandin pehendiyà te penlevengà.