1 Kenè ka mesina te menge etew he lalung etawa tinguhà te kebpekid emiǥu kandan. 2 Su iyan dà ed-isipen dan is kebpesipala wey edhisgutan dan is kedsinamuk.

3-4 Emun metau ka, egkevangun nu wey igkepeuswag nu is pemilya nu.

5 Is etew he uluwanen dekelà is igkeuǥup din he med-iseg is kebpekegaga te menge ebpekidtebek, 6 su kinahanglan dan is menge sambag din te kebpekidtebek. Ne kelegmitan iyan ebpekezaag is mahabet is menge peresambag dan.

7 Is tulebung kenè din egkesavut is mezalem he menge lalag. Wazè din igkesambag emun impurtanti is egkevitiyeraan.

8 Is etew he ebpelanu layun te mezaat ne egkilelaan he iyan ebaal te kezeetan. 9 Salà is minsan hengkey he pelanu te etew he tulebung, ne egkeepesan te menge etew is ked-undaunda.

10 Emun egkeewaan ka te perateng te timpu te kemereǥenan, tuus heeyan he meluya ka.

11 Kenè ka peneǥana te kedlibri te menge etew he wazà salà he midsintinsiyahan he edhimetayan. 12 Egkehimu he ebpemarew ka he wazè nu metueni heini. Piru netuenan te Megbevayà ke tutuu ve is migkaǥi nu wey kekenà, su ebentayan ke zin ne netuenan din ke hengkey is diyà te isip nu. Ebelesan ke zin sumalà te nengeveelan nu.

13 Mama, kaan ka te teneb su meupiya heini para kenikew, 14 su iring keniyan is ketau. Su ke uluwanen ka, duen meupiya he egkeperateng nu ne kenà egkehimu he wazà pulus te menge penganduy nu.

15 Kenè nu iringi is lalung he etew, he ebpeniid su ebpenulis diyà te valey te etew he metazeng. 16 Su minsan kepipitu pa mepiley is etew he metazeng, iyan, layun sikandin ebpekeenew. Ne emun iyan is lalung egkepiley, kenè en sikandin ebpekeenew.

17 Kenè nu ikelipey emun duen mezaat he egkeulaula te kuntada nu. 18 Egkaahà te Nengazen is baal nu, ne kenè din heeyan egkesuatan; ne kenè din en edsilutan haazà is kuntada nu.

19 Kenè ka mesemuki wey mesina te menge lalung he menge etew, 20 su wazà meupiya he egkepaabut dan, su is untung dan iring te sulù he egkeevukan.

21 Mama, tehuza nu is Nengazen wey is hadì. Kenè ka medtampu te menge etew he edsukul kandan, 22 su egketik-awan sikandan te silut. Wazè nu metueni ke hengkey he kelasi te kemeresayan is ibpigada te Megbevayà etawa te hadì diyà te kandan.

23 Heini pa is duma he menge erubasa te menge etew he uluwanen:

Kenà meupiya is kedhukum nu he zuen nu ibpelavi. 24 Emun egkaǥi ka he wazà salà dutun te nekesalà, ebpenrewakan ka wey egkepeukan ka te menge etew. 25 Piru emun ebpigedahan nu haazà is nekesalà, edtuvazan ka wey ed-uswag ka.

26 Is tavak he hustu ne tuus te tutuu he teleemiǥu.

27 Hunaa nu endama is igkeuyag-uyag nu, iring te pemuleey nu, ne human ka tukud te pemilya.

28 Kenè ka penistiǥus he kaatbang te idsumbung he siringan nu emun kenè ka zait he ebpenistiǥus dutun he kasu. 29 Kenè ka megkaǥi te, “Ed-ul-ulahan ku ziyà te kandin is mid-ulaula zin kayi te kedì, ne ibpevayad ku sikandin tenged te mezaat he mid-ulaula zin kayi te kedì.”

30 Nekesaǥad a ziyà te vevesukà te etew he tepulan he wazè din utew emet. 31 Mid-erikumunan en heini te ribpes wey zuǥiyen he menge zezeisey he kayu, ne nerundus en is menge alad kayi. 32 Ne mibpurungan ku is-isipa ke maan is neulaula haazà is neehè ku, ne neisip ku is penurù he iyan is: 33 Is ed-isipen te etew he mevavè dà he kedlipezeng, mevavè dà he kebpeuurek wey mevavè dà he kebpahareyharey su wey mekehimeley; 34 ne iring te ebpekeuma he tulisan he egkeǥumeenan is kewewezai.