1 Pemineǥa nu, Nengazen, is pengemuyù ku, para kenà a mevintahai.

Pemineǥa nu is utew tutuu he ked-ampù ku.

2 Netuenan nu ke hengkey is hustu,

umbe iyan ka zait he ebpekekaǥi he wazà mezaat he mid-ulaula ku.

3 Minsan is gehinawa ku ke mezukilem ne midsusi nu.

Migezaman a kenikew ne wazè nu naahà he mezaat kayi te kediey.

Midisisyun a he kenà a egkaǥi te mezaat

4 iring te ed-ul-ulahan te zuma.

Midtuman ku is menge suǥù nu, ne pinaaǥi kayi, nelikayan ku is kebpesipala.

5 Layun ku ed-ikula is dalan nu,

ne wazà a medsuwey zutun.

6 Megbevayè ku, ed-ampù a ziyà te kenikew

su netuenan ku he edtevaken a kenikew.

Pemineǥa nu is ampù ku.

7 Ipeehè nu is egkein-inuwan he ǥaǥew nu.

Pinaaǥi te ǥehem nu, edlibriyen nu is menge etew he ebpekelasag kenikew tenged te menge kuntada zan.

8 Ilikey a kenikew te kezeetan iring te kedlikaya te etew te mata zin wey kenà mesazir,

ne pengelangi a kenikew iring te kebpengalang te tagbis te menge anak din pinaaǥi te kedlekupi zin kandan.

9 Kelesaǥi a te menge kuntada ku he edsurung kediey kayi te nekeliǥuy su edhimetayan e zan.

10 Wazè dan hizu, ne pinaaǥi te kegkagi zan, ebpelavew zan.

11 Midpen-ehè e zan, ne ǥuntaan edliǥuyan e zan en.

Edtaǥad dan dà te kebpekelugar zan te kedezaat kedì.

12 Iring sikandan te ed-ayan he erimaung diyà te elesè din,

he andam he ebpitaspitas te egkezawi zin.

13 Nengazen, tebeka nu en sikandan wey zaaǥa nu is lalung he menge kuntada ku.

Libriya a pinaaǥi te ǥehem nu, su wey e zan kenà mekeizi.

14 Libriya a wey a kenà mekeizi kayi te menge etew he iyan dà ed-isipen dan is kelibutanen he menge vutang.

Siluti nu sikandan te silut he inteǥana nu kandan,

ne iragkes nu en daan is menge anak dan.

Ne elin nu teǥenahi te silut is menge apù dan.

15 Piru siak mulà, egkeehè ku sikew,

su wazà a mebaal te salà.

Emun egkepukew e en ne utew a zutun melipayen su egkeehè ku en sikew.