1-2 Nengazen he Megbevayè ku,

iyan ka ed-empuan ku wey edseriǥan ku.

Kenè nu ituǥut he mezaag a te menge kuntada ku,

su para kenà a meeled-eled.

3 Is edsarig kenikew kenà egkepeel-elezan,

iyan, egkepeel-elezan sikan is edluib kenikew.

4 Penurua a, Nengazen, te menge paaǥi nu.

5 Penurua a te paaǥi para kenà a mekesuwey te tutuu,

su iyan ka Megbevayà he menluluwas ku.

Layun a edsarig kenikew.

6 Tentenuzi nu, Nengazen, is hizu wey ǥaǥew nu he impeehè nu puun pa zengan.

7 Ne kenè nu en tentenuzi is menge salà he neveelan ku hein betan-en e pa.

Tenged te ǥaǥew nu, tentenuzi a, Nengazen,

su wey nu ikepaahà is keupiya nu.

8 Meupiya ka wey metazeng ka, Nengazen,

umbe ipenurù nu ziyà te menge nengetazin is hustu he zalan.

9 Egiyahan nu is kenà menge mepelevawen te kebaal te hustu.

Ipenurù nu kandan is kenikew he menge paaǥi.

10 Dutun te langun he ebeelan nu, ipeehè nu is gaǥew nu wey kegkemetinumanen nu ziyà te menge edsunud te ibpetuman diyà te kesuǥuan nu.

11 Nengazen, minsan mahabet is menge salè ku, peseyluwa a kenikew,

su para mezeliǥi ka.

12 Nengazen, is menge etew he edtahud kenikew, egiyahan nu wey zan meikul is dalan he ereg he ed-ikulen.

13 Meuswaǥen is ked-ubpè dan,

ne ebpedayun is ked-ubpà te menge kevuwazan dan diyà te tanà he Israel.

14 Nengazen, utew nu emiǥu is menge etew he edtahud kenikew

ne ibpetentenuzan nu kandan is kebpekid-uyun nu kandan.

15 Diyè e zà layun edangep te kenikew,

su iyan ka edlibri kedì te ebpekezezaat kedì.

16 Pemineǥa a wey kehizuwi a,

su midsebsevaha a ne edèdaaǥen a.

17 Mid-iseg en is menge kemereǥenen ku;

libriya a te kegkeliveg ku.

18 Is-isipa a kenikew kayi te menge elentusen ku,

ne peseyluwa a te langun he menge salè ku.

19 Ahaa nu man, utew mahabet is menge kuntada ku

ne zekelà is kedumut dan kedì.

20 Tipiǥi nu is untung ku, ne libriya a kenikew!

Kenà a kenikew peel-elezi, su ziyà a med-aput te kenikew para kenà a mekeizi.

21 Metazeng a wey wazà igkesawey kediey;

umbe iyan ke en metau he kenà a mekeizi.

Edsarig e zà kenikew.

22 Ipelingkawas nu, Megbevayè ku, is menge tig-Israel te langun he menge kelised dan.