1 Is Nengazen iyan kerayag ku, menluluwas ku, wey eputè ku,

umbe wazà ereg he igkahandek ku.

2 Emun edsurungen a te lalung he menge kuntada ku su edhimetayan e zan,

ne iyan dan egkezaag ne kenà a iyan.

3 Minsan edliǥuyan a te mahabet he menge sundaru, ne kenà a egkahandek.

Minsan pa ke edsurungen e zan, edsarig a te Megbevayà.

4 Duen sevaha he mibuyù ku ziyà te Nengazen he utew ku en egkesuati he iyan is:

kebpekeubpè ku ziyà te valey zin seled te tivuuk he untung ku,

ne zutun egkepurung ku egkengunùngunù is keupiya zin,

ne ebpekahangyù a ziyà te kandin he giyahi e zin.

5 Emun timpu te kesamuk id-eles e zin wey edhimu sikandin te paaǥi wey a kenà memenu zutun te valey zin.

Diyè e zin ibpehulenà te lugar he kenà a zuen egkekeizan.

6 Umbe, egkezaag ku is menge kuntada ku he edliǥuy kediey.

Ne ebpemuhat a zutun te valey te Nengazen duma is ked-uruhuy ku su utew a egkelipey.

Ne egkentahan ku sikandin.

7 Pemineǥa a, Nengazen, ke ebpengum-umawen ku sikew;

kehizuwi a ne iveǥey nu kedì is ebuyuen ku.

8 Neǥezam ku kayi te ǥehinawa ku he ibpezangep a kenikew ziyan te kenikew,

umbe kenà duwazuwa is kedangep ku ziyan te kenikew, Nengazen.

9 Kenà a kenikew elesi!

Kenà a kenikew iselikwey tenged te pauk nu kedì te suluǥuen nu.

Iyan ka neketavang kedì,

umbe kenà a pesegdana wey iselikwey,

Megbevayà he menluluwas ku.

10 Minsan pa ke ed-engkezan a te amey ku wey iney ku,

ed-eturen e zed gihapun kenikew, Nengazen.

11 Impenurù nu kedì is kenikew he menge paaǥi.

Ne ziyà a kenikew ipeikul te hustu he zalan, su zuen ku menge kuntada.

12 Kenà a kenikew ipalad diyà te kandan;

edèdeetan e zan kun su egkeǥiyen dan he neveelan ku is wazè ku meveeli.

13 Piru midtuu a he egkeseǥazan ku is keupiya nu mintras ebpengungubpaan e pa kayì te tanà.

14 Sarig kew te Nengazen!

Mebpekelig-en kew ne kenè kew medarà.

Purung kew sarig diyà te Nengazen!