1 Nengazen, minsan egkepeukan a kenikew ne kenà a kenikew sewaya.

2 Henduen be te mibpanà a kenikew wey midlepadu te mesakit.

3 Tenged te kegkepauk nu te kebpekevaal ku te menge salà, ne kenà meupiya is kegezamgezam ku kayi te lawa ku.

4 Henduen be te egkelened ad te menge salè ku,

iring heini te meveǥat he uwiten he kenè ku egkehenat.

5 Tenged te kezuzupangi ku, nengeredak is menge palì ku ne mibmemahù.

6 Egkevekut e en te utew ku kegkesekiti,

ne tivuuk he andew is kedlalew ku.

7 Ne kenà meupiya is kegezamgezam ku kayi te tivuuk he lawa ku su ed-al-al is peka ku.

8 Ne utew e en meluya.

Ebpekezag-es a tenged te mesakit he egkeǥezam ku.

9 Nengazen, netuenan nu is langun he penganduy ku he meulii a,

wey nezineg nu is kedag-es ku.

10 Ebpekehuyab is kumeng ku; wazè ku en desen,

ne kenè e en utew ebpekaahà.

11 Midlikayan ad te menge emiǥu ku wey menge zuma ku tenged te zaru ku.

Minsan is menge kezuzumahi ku ne mibpekeziyuan e zan en.

12 Edtuǥesen a te menge etew he egkesuat he edhimatey kedì.

Ne sikan is egkesuat he ebpaantus kedì, midhisgutan dan is paaǥi te kedezeeti zan kedì.

Tivuuk he andew is kebpelanu zan te kedluib kedì.

13 Mibpevevengel e zà wey mibpeeemew he henduen be te kena a ebpekezineg wey ebpekekaǥi.

14 Ebpevevengelan ku zà is mezaat he menge pelanu zan ne wazà ad megkaǥi.

15 Su midsarig a kenikew, Nengazen.

Iyan ka, Nengazen he Megbevayè ku, iyan ka edtavak te ampù ku.

16 Su mid-ampù a ziyà te kenikew he kenè nu ituǥut he melipey wey mekepahambug is menge kuntada ku tenged te kegkezèdeeti zan kediey.

17 Henduen be te egkezeetan ad, ne kenà egkeengked is ked-antus ku.

18 Idtug-an ku is menge salè ku he nekesamuk kediey.

19 Melig-en wey mahabet is menge kuntada ku.

Egkeepesan e zan minsan te wazà hustu he hinungdan.

20 Mezaat is ibales dan te menge meupiya he vaal ku kandan.

Ne egkuntedahan a zan su ebpeninguhà a he ebaal te meupiya.

21 Nengazen he Megbevayè ku, kenà a kenikew pesegdana;

kenà a kenikew pekeziyui.

22 Tevangi e en guntaan kenikew, Nengazen he menluluwas ku.