1 Wazà a medarà he edtaǥad te Nengazen,

ne mibpemineg din is kebuyù ku te tavang diyà te kandin.

2 Henduen be te mibatun e zin puun te mekulbà he vudsi etawa tunaan,

ne iring te impeuntud e zin diyà te vatu su para kenà a mekeizi.

3 Mibpenurù e zin te veǥu he kanta,

kanta te kedalig kandin te Megbevayè tew.

Ne mahabet he etew is ebpekaahà te mibeelan te Megbevayà

ne ebpeketahud wey ebpekesarig dan kandin.

4 Utew zeyzey is etew he edsarig te Nengazen,

ne kenà edangep diyà te menge gelbuwen he iyan edsunuzen dan is tarù.

5 Nengazen he Megbevayè ku, wazà ebpekeiring kenikew.

Mahabet is egkein-inuwan he mibeelan nu,

wey mahabet is menge pelanu nu para kenami.

Ne kenè ku heini igkeseysey pudu su utew medmezakel.

6 Wazà mekepenunuat kenikew is nekedseselekawà he kelasi te menge pemuhat.

Wazè ka mebuyù te menge pemuhat he edtutungen wey pemuhat he para idlumpiyu.

Kekenà, midhimu a kenikew he mepezumdumahan kenikew.

7 Umbe, migkaǥi a te,

“Heini e zed, andam a he edtuman te menge suǥù nu sumalà is ingkesurat he menge lalag nu mehitenged kedì.

8 Megbevayè ku, igkelipey ku is kedtuman te egkesuatan nu.

Edtipiǥan ku ziyà te ǥehinawa ku is menge kesuǥuan nu.”

9 Edtudtulen ku is kedlibriya nu kedì diyà te egketiǥum he menge etew nu.

Netuenan nu Nengazen he kenà a ed-engked he edtudtul kayi.

10 Is kedlibriya nu kediey wazè ku ziyè dà tipiǥi te ǥehinawa ku,

kekenà, ibpenudtul ku zaan he metinumanen ka wey edluwas ka.

Ne wazè ku ieles is gaǥew nu wey ketutuanan diyà te ketiǥuman dey te menge etew nu.

11 Nengazen, kenè nu eǥena is hizu nu kediey.

Berakat he is gaǥew nu wey kebmetinumanen nu egkehimu he iyan layun pengalang ku.

12 Henduen be te edliǥuy kedì is menge kelised he utew subra is kahabet.

Henduen be te egketembunan ad te menge salè ku, ne kenà ad ebpeketuredu te hustu he ibayè ku.

Henduen be te edhuna pa he mezakel is menge salè ku te vulvul ku,

ne tenged kayi naawè en is kevurut ku.

13 Nengazen, libriya a kenikew.

Tevangi ad guntaan.

14 Berakat he is langun he edtinguhà he edezaat kedì ne egkepeel-elezan wey egkeliveg.

15 Berakat he is menge etew he edsudì kedì egkeinuinu ne egkepeel-elezan sikandan.

16 Berakat he melipey is langun he midangep diyà te kenikew.

Berakat he layun mekekaǥi sikan is menge etew he mepeselematen te kedlibriya nu kandan te,

“Dait he edeliǥen is Nengazen”

17 Bahin kedì, egkaayuayu a wey pubri a.

Berakat he isipa a kenikew, Nengazen.

Iyan ka ebpeketavang wey ebpekelibri kedì.

He Megbevayè ku, tevangi e en guntaan.