1 Is kebpenginahanglan ku kenikew te Megbevayè ku,

iring te kebpenginahanglan te selazeng te wahig emun egkemezahan sikandin.

2 Egkemezahan a kenikew he iyan uuyag he Megbevayà.

Keenu e pa vuwa ebpekehendiyà te valey nu te ked-uvey ziyà te etuvangan nu?

3 Maandew wey mezukilem is kebpekesineǥew ku ne samè dà kenè ku meinum is luhè ku, ne zutun edtulung ed-insà is menge etew te,

“Hendei en be is Megbevayè nu he edtavang kenikew?”

4 Kenà meupiya is isip ku emun egketenuzan ku he zutun te nehuna he timpu iyan a nengulu te mezakel he menge etew te kedhendiyà te valey nu.

Ne edsilibra key zuma is ked-ugyab te kegkelipey wey kebpeselamat kenikew.

5 Piru kenà a ereg he egkeseeng wey egkeǥiyaǥiya.

Ereg a he edsarig kenikew. Uya, ed-umanan ku sikew edeliǥa, is menluluwas wey Megbevayè ku.

6-7 Utew a neseeng; is kegkeseeng ku iring te edeǥurus he seleg te evaǥa he ebpeketambun kediey.

Umbe edtentenuzan ku sikew ǥuntaan te kayi a te tanà he uvey te Jordan wey Hermon, kayi te Buntud he Mizar.

8 Emun maandew ibpeehè nu is gaǥew nu Nengazen,

umbe emun mezukilem en, egkanta a te ked-ampù diyà te kenikew te Megbevayà he mibeǥey kedì te untung ku.

9 He Megbevayà he endilungè ku, egkaǥi a ziyà te kenikew te,

“Maan is edlipatan a kenikew?

Maan is kinahanglan pa he egkeseeng a tenged te kedèdaaǥa kedì te menge kuntada ku?”

10 Henduen be te nerupet en is menge tulan ku tenged te kebpeel-elezi zan kedì.

Egkeǥiyan e zan te, “Hendei en be is Megbevayè nu he edtavang kenikew?”

11 Maan is egkeseeng a wey egkeǥiyaǥiya?

Te ereg e man he edsarig kenikew,

ne ed-umanan ku sikew edeliǥa is menluluwas ku he Megbevayè ku.