1 Libriya a, Megbevayè ku, su neiring ad te etew he hapit en egkelened.

2 Henduen be te egkelenep e en diyà te mezalem he vasak he kenà egketegkad.

Ne henduen be zaan te egketembunan a te menge vaǥel su ziyà a te mezalem he wahig.

3 Neveley ad te kebuyù te tavang ne mesakit en is bekereng ku.

Mibmerusirem en is ked-ehè ku te kedtaǥad te tavang nu, Megbevayè ku.

4 Utew mahabet is edumut wey egkesuat he edhimatey kedì te wazà hustu he hinungdan.

Iyan erubasa ku he edhuna pa sikandan he mezakel te vulvul ku.

Ed-uluǥan e zan te kewusa ne idteǥel zan ibpeulì kedì is menge vutang he wazè ku tekawa.

5 He Megbevayè ku, netuenan nu is ketutulebungi ku;

wazà mekeeles kenikew is menge salè ku.

6 He Nengazen he MEGBEVAYÀ he Mekeǥeǥehem he Megbevayà te Israel,

berakat he kenà mepeel-elezi tenged kediey is menge etew he edsarig wey edangep diyà te kenikew.

7 Su tenged kenikew ed-insultuwan a wey ebpeel-elezan.

8 Su in-iring a te langyew te menge kezuzumahi ku,

ne is menge suled ku wazè e zan isipa he suled dan.

9 Ebpesipelahan a tenged te kebmahala ku te valey nu.

Ibmesakit te gehinawa ku is lalag te menge etew he insultu kenikew.

10 Emun edsineǥew a wey ebpuasa a, ne ebpeel-elezan e zan.

11 Emun ebivisti a te saku su wey maahà he egkeseeng a, ne edsudien e zan.

12 Iyan a layun ed-ituka te menge etew he ebpemimpinuu ziyà te pultahan te inged,

ne egkekanta is egkengelangut te kanta he idsudì kedì.

13 Iyan, ed-ampù a ziyà te kenikew, Nengazen.

Ne zeyzey ke zutun te timpu te kegkehizuwi nu en kedì, ne edtevaken nu is ampù ku tenged te zekelà he ǥaǥew nu kedì.

Su metinumanen ka te saad nu te kedlibri,

14 tevangi a para kenà a melenep diyà te vasak.

Libriya a kenikew te menge edezaat kedì he iring te edlibriyen a kenikew ziyà te mezalem he wahig.

15 Kenè nu ituǥut he mebpatey a tenged te kegketembuni kedì te menge vaǥel.

16 Nengazen, tevaka a tenged te keupiya nu wey kebmahala nu kedì.

Seǥipaa a tenged te zekelà he hizu nu kedì.

17 Kena a kenikew elesi is suluǥuen nu.

Tevaka ad kenikew ǥuntaan su melised is kebpekesavuk ku.

18 Uvey ka kayi te kediey ne libriya a te kedezaat kedì te menge kuntada ku.

19 Netuenan nu is kebpeel-elezi kedì, is ked-insultuwi kedì, wey is kedezeeti te zengeg ku.

Neehè nu is langun he menge kuntada ku.

20 Inmesakit te ǥehinawa ku is kebpeel-elezi zan kedì

ne mibmezaat is isip ku.

Ebperetengen ku is kegkehizuwi kedì, piru wazà nehizu kedì.

Ebperetengen ku is kedlipaya kedì, piru wazà midlipey kedì.

21 Midsevukan dan hinuun te hilu is keenen ku,

ne hein egkemezahan a, sukà is imbeǥey zan kedì.

22 Emun egastu sikandan, berakat he mehimu haazà he igkezeeti zan duma te menge meǥeliyug dan.

23 Berakat he mengelakap sikandan wey pen-elia.

24 Nengazen, ivusbus nu ziyà te kandan is pauk nu.

Ipeǥezami nu kandan is rerangit nu.

25 Berakat he ewai zan en is ed-ubpaan dan wey wazè en dutun ed-ubpà.

26 Su ebpesipelahan dan is menge etew he edsilutan nu,

ne idantal zan is kebpekebmereǥen dutun te midsilutan nu.

27 Ne iuman nu heeyan te menge salè dan ne kenè nu en sikandan libriya.

28 Penasa nu is menge ngazan dan diyà te libru he edlistahan nu te menge uuyag,

ne kenè nu sikandan ilista zuma te menge metazeng.

29 He Megbevayà, nesekitan a wey nekaantus a,

umbe levani a kenikew pinaaǥi te kedlibriya nu kediey.

30 Edeliǥen ku is Megbevayà pinaaǥi te kanta.

Ibeǥey ku kandin is dengeg pinaaǥi te kebpeselamat ku.

31 Ebpekelipey pa heini te Nengazen kenà te menge pemuhat he vaka.

32 Emun egkaahà heini te menge egkaayuayu, ne egkengelipey zan;

ebmelig-en is menge etew he midangep diyà te Megbevayà.

33 Ebpemineǥen te Nengazen is menge egkaayuayu,

ne kenè din egkelipatan is menge etew zin he mibihag.

34 Deliǥa niw is Megbevayà, sikiyu is langun he ziyà te langit, kayi te kelibutan, wey ziyà te zaǥat.

35 Su edlibriyen te Megbevayà is Jerusalem,

ne ed-umanan din ebenguna is menge inged diyà te Juda.

Dutun ed-ubpà is menge etew zin ne iyan dan ebpekaangken keniyan he tanà.

36 Is menge kevuwazan te menge suluǥuen din iyan ebpekepengevilin kayi,

ne sikan is mibmahal kandin ne ebpekeubpà dutun.