1 Mibpekezaǥing a is ebuyù te tavang diyà te Megbevayà.

Nengumew a su wey e zin mezineg.

2 Dutun te timpu te kelised ed-ampù a ziyà te Nengazen.

Ne zutun te ked-ampù ku ke mezukilem kenà a egkeveley he ebayew te menge velad ku,

piru wazè ku ǥihapun kelipey.

3 Emun ebpurungan ku egngunngunua is Megbevayà egkesuǥey a ne egkaawà is perateng ku.

4 Wazè e zin ipelipezeng;

kenè ku egketuenan ke hengkey is egkeǥiyen ku, su utew a nesemuki.

5 Ed-isipen ku is nemenlavey he menge andew wey is menge tuig he neuǥet en he nenlavey.

6 Emun mezukilem ne mezalem is ed-is-isipen ku.

Ebpurung a egngunùngunù ne iyan heini menge insà he neuma te isip ku:

7 “Taman en be vuwa te taman is ked-iniyuǥi kenami te Nengazen?

Kenà key en buwa ebpekepenunuat kandin?

8 Kela ke naawè en is kebmahala zin kenami?

Kenè din en buwa edtumanen is penangdù din?

9 Kela ke nelipat en sikandin he egkehizu?

Kenè en be sikandin egkehizu tenged te pauk din?”

10 Ne ke siak te, “Is ibmesakit te ǥehinawa ku iyan is: kenè en bes edtavang kenami is lavew he Megbevayà.”

11 Nengazen, edtentenuzan ku is menge vaal nu.

Uya, edtentenuzan ku is egkengein-inuwan he mibeelan nu zengan.

12 Ed-isipen ku wey egngunùngunuen is langun he mekeǥeǥehem he menge vaal nu.

13 He Megbevayà, is menge paaǥi nu ne kenà iring te menge paaǥi te zuma.

Wazà ebpekerepeng te kegkemekeǥeǥehem nu.

14 Iyan ka Megbevayà he mibaal te egkengein-inuwan.

Ibpeehè nu te menge etew is gehem nu.

15 Midlibri nu is menge etew nu he menge kevuwazan ni Jacob wey ni Jose pinaaǥi te ǥehem nu.

16 He Megbevayà, is menge wahig neiring te etew he emun egkeehè ke zin ebpengerkeren te kegkahandek din.

17 Mibusbus te uzan is menge kivel;

midruǥung diyà te zivavew ne nengilat diyà te minsan hendei.

18 Ne egkezineg is selenuhug te menge vagyu;

is menge kilat neketayew te kelibutan;

ne neyunggat is kelibutan.

19 Midlayun nu is daǥat he nemaǥel te dezekelà he menge vaǥel,

piru wazè ka maahà is edsaǥad.

20 Migiyahan nu is menge etew nu he iring te menge kerehidu,

pinaaǥi ki Moises wey ki Aaron.