1 Nengazen, puun pa zengan ne ziyè key en med-ubpà te kenikew.

2 Hein wazà nu pa limbaǥa is menge vuntud wey is kelibutan, ne Megbevayè ke en,

ne iyan ka ǥihapun Megbevayà te wazà pidtemanan.

3 Kenikew he vayàbayà is kemetayen te etew;

idlikù nu sikandin diyà te tanà he iyan kes ebpuunan din.

4 Is nengkelibu he tuig kayi te kenami ne iring dà mulà te senga andew ziyà te kenikew,

etawa iring dà heini te nepipira zà he uras te mezukilem.

5 Edsevukan nu te ketepusan is untung dey iring heini te teǥeinep he meǥaan dà egkahanew.

6 Wey iring te sagbet he edreteb wey edtuvù te meselem,

ne emun mahapun en ne egkelay-ub ne egkeǥangu en.

7 Igkeherati zey is pauk nu;

igkezeeti zey is rerangit nu.

8 Neehè nu is menge salè dey.

Minsan is meeles is kebeeli zey zuen ne nepurung nu heini maahà.

9 Ibpatey zey is pauk nu kenami;

ne henduen dà te naasnaas is kegketapus te untung dey.

10 Is keluǥayad te untung dey ne 70 dà he tuig, etawa 80 he tuig emun melig-en is kedlelawa zey.

Piru minsan pa is kineupiyahan he menge tuig te ked-ubpè dey, ne mahabet gihapun he menge keseengan wey menge kelised is egkengeseǥazan dey.

Tutuu iyan he meǥaan dà egketapus is untung dey ne egkahanew key en.

11 Wazè pa nekesaǥad te ipiktu te zekelà he pauk nu.

Ne zutun te ked-iseg te keuluwanen dey te pauk nu, ne ed-iseg daan is kedtahud dey kenikew.

12 Ipeisip-isip nu kenami he mevavè dà is untung dey,

su para mebmetau key kayi te kebpengungubpaan dey.

13 Nengazen, sengemenu keluǥayad is kegkepeuki nu kenami?

Seǥipaa key en wey kehizuwi key en is menge suluǥuen nu.

14 Kada meselem ipetuusi nu kenami is kebmahala nu kenami su para mekekanta key te kedlipey,

ne ebmelipayen key te tivuuk he untung dey.

15 Beǥayi key kenikew te kelipey he iring keluǥayad te menge tuig te kedsiluti nu wey kebpeentusa nu kenami.

16 Ipeehè nu kenami te menge suluǥuen nu wey te menge kevuwazan dey, is egkein-inuwan he vaal nu wey is kegkemekeǥeǥehem nu.

17 Nengazen he Megbevayè dey, berakat he edtuvazan key kenikew,

wey ebeǥayan key kenikew te kelempusan te langun he ebeelan dey.