1 Nengazen he Megbevayà, sikew is ebpenimales;

ipeehè nu en is pauk nu.

2 Iyan ka edhukum te langun he menge etew;

umbe, sigi en, belesi nu en is menge gelbuwen te zait he ibales kandan.

3 Sengemenu pa keluǥayad is kedlipey te menge lalung, Nengazen?

4 Utew en ebpemahambug is langun he menge etew he memezaat is baal.

5 Edèdaaǥen dan is menge etew he ǥaked nu. 6 Mibpenhimetayan dan is menge valu he vahi, is menge ilu, wey is menge lumelengyawà.

7 Ke sikandan te, “Kenà egkaahà te Nengazen is menge vaal tew;

kenè en heini edseǥipaan te Megbevayà ni Jacob.”

8 Sikiyu is menge taleng wey menge tulebung, keenu kew pa ebpekesavut?

Sevuta niw kun be heini:

9 Kenè be is Megbevayà iyan mibaal te menge telinga tew wey menge mata tew?

Maan is egkeǥiyen niw he kela ke kenà sikandin ebpekezineg wey ebpekaahà?

10 Kenè be ebmensuwen din is menge nasyun?

Maan is egkeǥiyen niw he kela ke kenà sikandin edsilut?

Kenè be ebpenuruen din is menge etew?

Maan is egkeǥiyen niw he kela ke kenà sikandin metau?

11 Netuenan te Nengazen he is ed-isipen te menge etew,

ne pudu wazè din pulus.

12 Nengazen, utew zeyzey is etew he ebmensuwen nu pinaaǥi te kebpenurua nu kandin te menge kesuǥuan nu.

13 Ebpenuruen nu sikandin su para zuen din kelinew emun timpu te kesamuk,

wey taman en te timpu te kedsiluti nu te menge lalung.

14 Su kenè nu ed-engkezan, Nengazen, is menge etew he ǥaked nu.

15 Siguradu he egkeuman egkehitavù is metazeng he menge kedhukum,

ne ebpekeuyun kayi is langun he midtinazeng.

16 Wazà duma he ebpeketavang kedì ke edsurungen a te lalung he menge etew,

kekenà, iyan ke zà, Nengazen.

17 Emun wazà a kenikew tevangi, ne minatey ad guntaan.

18 Hein migkaǥi a ziyà te kenikew, Nengazen, he henduen be te ebpatey ad, midtevangan a kenikew su mibmahal a kenikew.

19 Hein utew a nesemuki, midlig-enan a kenikew ne nelipey a.

20 Kenà egkehimu he edepiǥan nu is lalung he menge menhuhusey, he ebaal te supak te kesuǥuan.

21 Nesevaha zan te kebpekidkuntada te menge metazeng,

ne midhukuman dan te kemetayen is wazè dan menge salà.

22 Piru, sikew, Nengazen he Megbevayè ku, iyan ka eputè ku wey endilungè ku he vatu.

23 Edsilutan nu wey edèdeetan nu sikandan tenged te menge salè dan.

Nengazen, he Megbevayè dey, edèdeetan nu sikandan.