1 Edhadì is Nengazen ne ebpimpinuu sikandin diyà te pinuuwè din te kedhadì he ziyà te teliwazà te menge kirubin.

Nehuyung is kelibutan tenged te ǥehem din; ebpengerkeren is menge etew te kezekelà te kedtahud dan kandin.

2 Mekeǥeǥehem is Nengazen he ziyà te Zion;

iyan sikandin ebayàbayà te tivuuk he kemenmenusiyaan.

3 Edeliǥen sikandin te menge etew su mekeǥeǥehem wey egkein-inuwan sikandin.

Waǥas sikandin!

4 Mekeǥeǥehem sikandin he Hadì, ne zekelà diyà te ǥehinawa zin is hustu he kukuman.

Wazè din ibpelavi ke edhukum sikandin,

ne metazeng wey hustu is ebeelan din diyà te Israel.

5 Deliǥa is Nengazen he Megbevayè tew.

Ezapa niw sikandin diyà te valey zin.

Waǥas sikandin!

6 Si Moises wey si Aaron, dezuwa sikandan duen te menge memumuhat din dengan,

ne si Samuel, sevaha sikandin duen te mid-ampù diyà te kandin.

Nengumew-umew sikandan kandin ne midtavak din sikandan.

7 Nekidlalag sikandin kandan hein diyà sikandin te mekepal he ǥapun;

ne midtuman dan is menge penurù din wey menge sulunuzen he imbeǥey zin kandan.

8 Nengazen he Megbevayè dey, midtavak nu is menge kebpengemuyù te menge etew nu.

Impeehè nu kandan he mepeseyluwen ka he Megbevayà minsan midsilutan nu sikandan tenged te menge salè dan.

9 Deliǥa is Nengazen he Megbevayè tew.

Simbaha niw sikandin diyà te segradu he vuvungan he migaked din,

su waǥas is Nengazen he Megbevayè tew.