1 He Megbevayà, he edeliǥen ku, tevaka nu is ked-umew ku kenikew.

2 Su idsumbung a te lalung wey limbungan he menge etew.

Tarù is lalag dan mehitenged kedì.

3 Layun mezaat is menge lalag dan he ebpekesuǥat kedì minsan wazà hinungdan.

4 Minsan ebpekid-emiǥu a kandan, ne edtebeken e zan;

piru in-ampù ku ǥihapun sikandan.

5 Mibelesan e zan te mezaat te meupiya he mibeelan ku kandan,

wey mibelesan e zan te pauk te kebpekid-emiǥu ku kandan.

6 Ke sikandan te, “Ebpen-ehè kiw te lalung he etew he egkuntra wey edsumbung kandin diyà te hukmanan.

7 Berakat he led-ani sikandin te salà emun timpu en te kedhukumi kandin.

Berakat he isipa he salà is ked-ampù din!

8 Berakat he kenà mebmeluǥayad is untung din ne ikeveǥey en te zuma is buluhaten din.

9 Berakat he mebpatey en sikandin su para meilu is menge anak din wey para mevalu is esawa zin.

10 Berakat he mekeriǥuriǥu is menge anak din te kebpekilimus,

wey verakat he segseǥa sikandan puun te egkeregdas en he ubpeey zan.

11 Berakat he eǥawa te neutangan din is langun he menge azen din,

wey verakat he kuwaa te menge lumelengyawà is hineǥuan din.

12 Ne emun ebpatey en sikandin ne verakat he wazà mehizu kandin wey te egkeilu he menge anak din.

13 Berakat he mebpematey is menge kevuwazan din,

su para melipati en sikandan te ebpekesunud he lapis te kevuwazan.

14-15 Berakat he kenà peseyluwa wey kenà lipati te Nengazen is salà te menge ginikanan din wey te menge kepuun din;

berakat he ituǥut te Nengazen he melipati en sikandan kayi te kelibutan.

16 Su wazè din hizu;

midlisedlised din wey mibpenhimetayan din is menge egkaayuayu, menge pubri, wey sikan is utew dezekelà is seeng dan.

17 Igkelipey zin is kebpenrawak te zuma; berakat he ziyà mehitavu te kandin is rawak din.

Kenè din ebpenubtuvazan is duma; berakat he wazà daan mebpenuvadtuvad kandin.

18 Neleyaman din en is kebpenrawak te zuma;

iring en heini te visti he imbivisti zin.

Berakat he medlikù diyà te kandin is rawak din meiring te wahig he edreheb diyà te lawa zin

wey meiring te lana he edsenep diyà te menge tulan din.

19 Berakat he kenè en heini maawà diyà te kandin, iring te visti he imbivisti zin wey te vakes he layun diyà te hawak din.”

20 Nengazen, berakat he iyan heeyan isilut nu te menge etew he mibutangbutang kedì wey migkaǥi te mezaat he menge lalag mehitenged kediey.

21 Piru tevangi a mulà, Nengazen he MEGBEVAYÀ,

para ikeveǥey kenikew is dengeg.

Libriya a tenged te keupiya nu wey gaǥew nu.

22 Su egkaayuayu a wey pubri a, ne utew mibmesakit is gehinawa ku.

23 Egkenaneynaney en egkaawà is untung ku iring te lambung he egkahanew emun mezukilem.

Wey iring a zaan te terapan he mibpeyupas.

24 Wazè en desen te menge vuel ku tenged te kedtulung ku kebpuasa.

Utew ad migasà.

25 Utew ad edsusudia te menge kuntada ku.

Ebpemenggemenggemen dan emun egkeehè e zan.

26 Tevangi a, Nengazen he Megbevayè ku;

libriya a tenged te ǥaǥew nu.

27 Ipetueni nu te menge kuntada ku he iyan ka, is Nengazen, midlibri kedì.

28 Midrewakan e zan, piru edtuvazan a mulà kenikew.

Egkepeel-elezan is menge kuntada ku emun edsurungen e zan,

ne egkelipey a mulà is suluǥuen nu.

29 Berakat he mepurung mepeel-elezi heini is menge etew he mibutangbutang kedì; meiring te visti he ebpeketambun te lawa zan is keelezan dan.

30 Ebpeselematan ku is Nengazen;

edeliǥen ku sikandin diyà te etuvangan te mahabet he menge etew.

31 Su edlevanan din is menge etew he pubri,

su para melibri sikandan te edhukum kandan te kemetayen.