1 Deliǥa is Nengazen! Deliǥa niw sikandin, sikiyu is menge suluǥuen din

2 he edterebahu ziyà te valey te Nengazen he Megbevayè tew.

3 Deliǥa is Nengazen su meupiya sikandin.

Kanta kew te kedalig kandin su hihizuwen sikandin.

4 Deliǥa niw sikandin su mibpilì din is menge etew te Israel he menge kevuwazan ni Jacob,

para mehimu he ispisyal he menge etew zin.

5 Netuenan ku he mekeǥeǥehem is Nengazen,

he lavew te langun he zuma he menge ed-ezapen.

6 Midhimu te Nengazen is minsan hengkey he egkesuatan din, diyà te langit, dini te tanà, diyà te menge zaǥat, wey ziyà te kinezizeleman kayi.

7 Impezivavew zin is menge ǥapun he ebpuun diyà te meziyù he menge vahin kayi te kelibutan,

ne midhimu zin he mebpengilat duma is ked-uzan.

Ibpeǥawas din is keramag puun te neteǥuan kayi.

8 Mibpenhimetayan din is kinekekayan he menge anak he maama te menge tig-Ehipto,

wey is kinekekayan he menge anak te menge uyaǥen dan.

9 Diyà te Ehipto, mibaal sikandin te menge singyal wey menge egkein-inuwan he menge vaal te kedsilut te hadì te Ehipto wey is langun he menge upisyal zin.

10 Mibpendezeetan din is menge meǥinged diyà te mahabet he menge nasyun

wey mibpenhimetayan din is mekeǥeǥehem he menge hadì,

11 iring ki Sihon te hadì te menge Amorihanen, ki Og he hadì diyà te Bashan,

wey is langun he menge hadì diyà te Canaan.

12 Ne imbeǥey zin is menge tanè dan diyà te menge etew zin he menge Israilihanen para maangken dan haazà.

13 Nengazen, is ngazan nu wey is kegkevantug nu egketenuzan taman te taman.

14 Su ibpeehè nu, Nengazen, he wazà mekesalà is menge etew nu he menge suluǥuen nu,

ne egkehizuwan nu sikandan.

15 Is menge ed-ezapen diyà te zuma he menge nasyun pelata wey vulawan, ne etew zà is mibaal zuen.

16 Duen dan menge vèbà, piru kenè dan ebpekekaǥi,

duen dan menge mata, piru kenè dan ebpekaahà,

17 duen dan menge telinga, piru kenè dan ebpekezineg,

wey kenè dan ebpekeǥehinawa.

18 Is menge mibaal kayi te menge ed-ezapen wey is langun he edsarig kayi ne egkehimu zaan sikandan he iring kayi te menge ed-ezapen he wazà pulus.

19-20 Sikiyu is menge etew te Israel, ragkes en is menge kevuwazan ni Aaron wey is duma pa he menge kevuwazan ni Levi, deliǥa niw is Nengazen!

Sikiyu is edtahud te Nengazen, deliǥa niw sikandin!

21 Deliǥa niw is Nengazen he ziyà te Zion. Diyà sikandin med-ubpà te inged he Jerusalem.

Deliǥa is Nengazen!